ପାରାଦୀପ,୧ା୩(ସ୍ବ.ପ୍ର.): ଜଗତ୍ସିଂହପୁର ଜିଲା କୁଜଙ୍ଗ ବ୍ଲକ ଅଧୀନ ନୂଆଗଡ଼ ଗ୍ରାମର ଗ୍ରାମବାସୀ ଏବେବି ଯେଉଁଠି କ୍ରିକେଟ ଖେଳ ଦେଖନ୍ତି ତାଙ୍କ ଆଖିରେ ଲୁହ ଆସିଥାଏ। କାରଣ ସେହି ଗ୍ରାମ ପାଇଁ କ୍ରିକେଟ ଖେଳ ସବୁଦିନ ପାଇଁ ଦୁଃଖ ଦେଇଛି। ନୂଆଗଡ ଗ୍ରାମର ୧୩ଜଣ ପିଲା କ୍ରିକେଟ ଖେଳିବାକୁ ଯାଉଥିବାବେଳେ ମହାନଦୀରେ ବୁଡ଼ି ପ୍ରାଣ ହରାଇଥିଲେ। ଏହି ଘଟଣା ଥିଲା ୨୦୦୪ ମାର୍ଚ୍ଚ ୧ ତାରିଖର। ଯାହାକୁ ଏବେ ୧୬ ବର୍ଷ ପୂରିଛି। ପ୍ରତିବର୍ଷ ମାର୍ଚ୍ଚ ୧ ତାରିଖ ହେଲେ ମୃତକଙ୍କ ସାଥି ଓ ପରିବାର ଗଁା ସ୍କୁଲ ପାଖରେ ଥିବା ସ୍ମୃତିସ୍ତମ୍ଭ ନିକଟରେ ଯାଇ ଶ୍ରଦ୍ଧାଞ୍ଜଳି ଜଣାଇଥାନ୍ତି। ସେ ଦିନର ଘଟଣାକୁ ନେଇ ଆଜି ବି ଗ୍ରାମବାସୀ ଓ ମୃତକଙ୍କ ମା’ବାପା ଗୁମୁରି କାନ୍ଦୁଛନ୍ତି।
ସୂଚନାଯୋଗ୍ୟ, ନୂଆଗଡର ଉତ୍କଳମଣି କ୍ରିକେଟ କ୍ଲବ୍ ପିଲା ଏକ ଟୁର୍ନାମେଣ୍ଟ ଖେଳିବା ପାଇଁ କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଧୀନ ପିତାପାଟ ଗ୍ରାମକୁ ଯିବାର ଥିଲା। ନୂଆଗଡ଼ ଗ୍ରାମ ପଛପଟେ ମହାନଦୀ ଘାଟ ପାରି ହୋଇଥିଲେ ସେମାନେ ପିତାପାଟ ଗ୍ରାମରେ ପହଞ୍ଚତ୍ଥାନ୍ତେ। ଗଁାର ୧୮ଜଣ ପିଲା ମହାନଦୀ ବାହାକୁଦ ଘାଟ ପାଖକୁ ଯିବା ବେଳକୁ ଘାଟିଆ ନ ଥିଲେ। ୧୮ଜଣ ଯୁବକ (ଜଣେ ବିବାହିତ ଅନ୍ୟ ସମସ୍ତେ ୧୫ରୁ ୧୮ ବର୍ଷ ମଧ୍ୟରେ) ଯୁବ କ୍ରିକେଟର ନିଜେ ଡଙ୍ଗା ନେଇ ଯିବାବେଳେ ମଝି ନଈରେ ଡଙ୍ଗା ଭାରସାମ୍ୟ ହରାଇ ବୁଡ଼ିଯାଇଥିଲା। ଫଳରେ ସମସ୍ତେ ନଦୀରେ ବୁଡ଼ିଯାଉଥିବାବେଳେ ଜଣେ ୭ ବର୍ଷର ନାବାଳିକା ନଦୀପଠାରେ ଛେଳି ଚରାଉଥିବା ବେଳେ ଏହା ଦେଖି ଡାକ ପକାଇଥିଲେ। ତାଙ୍କ ଡାକଶୁଣି ମହାନଦୀରେ ମାଛ ଧରୁଥିବା କେତେକ ଲୋକ ଯାଇ ୫ଜଣଙ୍କୁ ଉଦ୍ଧାର କରିଥିଲେ। ଅନ୍ୟ ୧୩ଜଣଙ୍କ ମୃର ଶରୀର ପରେ ଉଦ୍ଧାର କରାଯାଇଥିଲା। ଗୋଟିଏ ଗଁାର ୧୩ଜଣ ଛାତ୍ରଙ୍କ ଜୀବନ ଯିବା ସେତେବେଳେ ଜାତୀୟ ସ୍ତରରେ ଚର୍ଚ୍ଚା ହୋଇଥିଲା। ପରେ ସେହି ଗଁାର ଯୁବକମାନେ ତାଙ୍କ ସାଥିଙ୍କ ସ୍ମୃତିରେ ଖେଳପଡ଼ିଆରେ ଏକ କ୍ରିକେଟ ବ୍ୟାଟ୍, ବଲ୍ ଓ ହେଲମେଟ୍ ଷ୍ଟମ୍ପ ଆକୃତିର ସ୍ମୃତିସ୍ତମ୍ଭ ନିର୍ମାଣ କରିଛନ୍ତି। ଗଁାରେ କିଛିବର୍ଷ ପର୍ଯ୍ୟନ୍ତ କ୍ରିକେଟ ଖେଳିବା ଏବଂ ଦେଖିବା ସମ୍ପୂର୍ଣ୍ଣ ବନ୍ଦ ହୋଇଥିଲା। ଏ ସମ୍ପର୍କରେ ଜଣେ ମୃତକଙ୍କ ବନ୍ଧୁ ସୁଢ଼ଳ ସ୍ବାଇଁ କହିଛନ୍ତି, ଏବେ ଗ୍ରାମର କେତେଜଣ ପିଲା ବେଳେବେଳ କି୍ରିକେଟ ଖେଳୁଛନ୍ତି। କ୍ରିକେଟ ଖେଳ ଗୂଆଗଡ଼ ଗ୍ରାମବାସୀଙ୍କ ପାଇଁ କାଳ ହୋଇ ରହିଯାଇଛି। ବାହାକୁଦ ଘାଟରେ ପ୍ରତ୍ୟହ ହଜାରରୁ ଊର୍ଦ୍ଧ୍ୱ ଲୋକ ଯାତାୟାତ କରୁଛନ୍ତି। ଗତବର୍ଷ ସେହି ବାହାକୁଦ ଘାଟରୁ ଏକ ଡଙ୍ଗା ମହାକଳପଡ଼ା ଯାଇଥିବାବେଳେ ଦୁର୍ଘଟଣା ଘଟି ୮ରୁ ଊର୍ଦ୍ଧ୍ୱ ଲୋକଙ୍କ ମୃତ୍ୟୁ ଘଟିଥିଲା। ଏହା ସତ୍ତ୍ୱେ ଏବେ ବି ବିପଦପୂର୍ଣ୍ଣ ଭାବେ ଲୋକେ ସେହି ସ୍ଥାନରେ ଯାତାୟାତ କରୁଛନ୍ତି।
