ବୋଲଗଡ଼,୩ା୬(ଡି.ଏନ.ଏ.)-ବୋଲଗଡ଼ ବ୍ଲକ ବାଙ୍କୋଇଠାରେ ଚାଲିଥିବା ରାମଲୀଳା ଯାତ୍ରାର ଅନ୍ତିମ ପର୍ବ ରାବଣପୋଡି ଉତ୍ସବ ଅନୁଷ୍ଠିତ ହୋଇଯାଇଛି। ଏଠାରେ ରାମଲୀଳା ଯାତ୍ରା ପ୍ରାୟ ଏକମାସ ଧରି ଚାଲିଥିଲା। ଶନିବାର ରାତ୍ରିରେ ରାମଲୀଳା ସ୍ଥଳୀରେ ରାମରାବଣ ଯୁଦ୍ଧ ଦୃଶ୍ୟ ପରିବେଷିତ ହୋଇଥିଲା। ଗୋଟିଏ ପକ୍ଷରେ ରାମ, ଲକ୍ଷ୍ମଣଙ୍କ ସମେତ ତାଙ୍କ ସେନା ଓ ଅନ୍ୟପକ୍ଷରେ କାଷ୍ଠ ମୁଖାଧାରୀ ରାବଣ ଓ ଅନ୍ୟ କଳାକାର ଯୁଦ୍ଧରେ ଅବତୀର୍ଣ୍ଣ ହୋଇଥିଲେ। ମାତ୍ର ରାବଣ ନିହତ ଦୃଶ୍ୟ ନିଆରା ଭାବେ ଆୟୋଜିତ ହୋଇଥିଲା ା ଏଥିପାଇଁ ଗ୍ରାମ ବାହାରେ ୪୦ ଫୁଟ ଉଚ୍ଚର ବାଉଁଶ ଓ କାଗଜରେ ନିର୍ମିତ ରାବଣର ପ୍ରତିକୃତି ରଖାଯାଇଥିଲା। ରାବଣର ସମସ୍ତ ୧୦ଟି ମୁଣ୍ଡରେ ୧୦ଟି ବାଣ ଖଞ୍ଜାଯାଇଥିଲା ା ସେହିପରି ରାବଣ ପ୍ରତିକୃତିର ବକ୍ଷସ୍ଥଳରୁ ଏକ ତାର ଦ୍ୱାରା ପ୍ରାୟ ୫୦ ମିଟର ଦୂରତା ପର୍ଯ୍ୟନ୍ତ ବାଣ ସଂଯୋଗ କରାଯିବା ପାଇଁ ବ୍ୟବସ୍ଥା ହୋଇଥିଲା। ଏଥିପାଇଁ ରାମଲୀଳା ସ୍ଥଳୀରୁ ରାମ, ଲକ୍ଷ୍ମଣ ଓ ଅନ୍ୟ କଳାକାରମାନେ ରାବଣପୋଡି ସ୍ଥଳକୁ ଆସିଥିଲେ। ସେଠାରେ ରାମଲୀଳା ପୋଥି ସାଙ୍ଗକୁ ରାବଣ ନିହତ ପଠନ ସମୟରେ ରାମଚନ୍ଦ୍ରଙ୍କ ଅଭିନୟ କରୁଥିବା କଳାକାର ବ୍ରହ୍ମ ଶର ନିକ୍ଷେପ କରିଥିଲେ। ଅଗ୍ନି ସଂଯୋଗ କରାଯିବା କ୍ଷଣି ବାଣର ଗୁଳାଟି ଯାଇ ରାବଣ ପ୍ରତିକୃତିର ବକ୍ଷଭେଦ କରିଥିଲା। ଗୋଟିଏ ପରେ ଗୋଟିଏ ଏପରି ୧୦ଯାକ କାଗଜ ନିର୍ମିତ ମୁଣ୍ଡ ଛିଣ୍ଡିପଡିଥିଲା। ରାବଣ ନିହତର ଏହି ଦୃଶ୍ୟ ଆକର୍ଷଣୀୟ ହୋଇଥିଲା। ଏହାସହିତ ଆତସବାଜି ପ୍ରତିଯୋଗିତା ହୋଇଥିଲା। ଏହି ଦୃଶ୍ୟକୁ ଉପସ୍ଥିତ ଦର୍ଶକମାନେ ବିଳମ୍ବିତ ରାତି ପର୍ଯ୍ୟନ୍ତ ଉପଭୋଗ କରିଥିଲେ। ରବିବାର ପୂର୍ବାହ୍ନରେ ରାମଲୀଳା ସ୍ଥଳୀରେ ରାମଚନ୍ଦ୍ରଙ୍କ ରାଜ୍ୟାଭିଷେକ ଅନୁଷ୍ଠିତ ହୋଇଛି।
