ବ୍ରହ୍ମପୁର ଅଫିସ/ମୋହନା, ୧୯ା୯(ଡି.ଏନ୍.ଏ.)-ଗଜପତି ଜିଲା ମୋହନା ଗୋଷ୍ଠୀ ଶିକ୍ଷାଧିକାରୀଙ୍କ କାର୍ଯ୍ୟାଳୟର କନିଷ୍ଠ କିରାଣି ଜିତେନ୍ଦ୍ର ନାଥ ନାୟକ ୩ ହଜାର ଟଙ୍କା ଲାଞ୍ଚ ନେଉଥିବାବେଳେ ଭିଜିଲାନ୍ସ ଦ୍ୱାରା ଧରାପଡି ଗିରଫ ହୋଇଛନ୍ତି। ନଂ.୨୫/୧୯ରେ ବୁଧବାର ସନ୍ଧ୍ୟାରେ ଜିତେନ୍ଦ୍ରଙ୍କୁ ତାଙ୍କ ଘରୁ ଗିରଫ କରାଯାଇଥିବା ଭିଜିଲାନ୍ସ ଏସ୍ପି ମାୟାଧର ସ୍ବାଇଁ ସୂଚନା ଦେଇଛନ୍ତି।
ପ୍ରକାଶ ଯେ, ଗୋପଟିମାର ଗଣ ଶିକ୍ଷକ ଦଣ୍ଡପାଣି ମଲ୍ଲିକ ଗତ ୪ ବର୍ଷତଳେ ପରମଙ୍ଗା ସ୍କୁଲରୁ ଡେପୁଟେସନରେ ଗତିମା ସ୍କୁଲକୁ ଯାଇଥିଲେ। ସେ ପୁଣିଥରେ ପରମଙ୍ଗା ସ୍କୁଲକୁ ବଦଳି ହୋଇ ଆସିବା ପାଇଁ ଶିକ୍ଷାଧିକରିଙ୍କ ନିକଟରେ ଆବେଦନ କରିଥିଲେ। ତାଙ୍କ ବଦଳି ଆବେଦନ ଫାଇଲଟି ଗୋଷ୍ଠୀ ଶିକ୍ଷାଧିକାରିଙ୍କ ନିକଟରେ ରହିଥିଲା। ଫାଇଲ ପ୍ରୋସେସିଂ ପାଇଁ ସେଠାରେ କାର୍ଯ୍ୟରତ କନିଷ୍ଠ କିରାଣି ଜିତେନ୍ଦ୍ରନାଥ ନାୟକ ଆବେଦନକାରୀଙ୍କୁ ୫ ହଜାର ଟଙ୍କା ଲାଞ୍ଚ ମାଗିଥିଲେ। ଶେଷରେ ୩ ହଜାର ଟଙ୍କା ଦେବାକୁ ସ୍ଥିର ହୋଇଥିଲା। ଏନେଇ ଶିକ୍ଷକ ଦଣ୍ଡପାଣି ଭିଜିଲାନ୍ସ ନିକଟରେ ଜଣାଇଥିଲେ। ଯୋଜନା ଅନୁଯାୟୀ ଦଣ୍ଡପାଣି ବୁଧବାର ସନ୍ଧ୍ୟାରେ କିରାଣୀଙ୍କୁ ତାଙ୍କ ଦାବି ମୁତାବକ ଟଙ୍କା ଦେବାକୁ କହିଥିଲେ। କିରାଣି ଜିତେନ୍ଦ୍ର ଶିକ୍ଷକ ଦଣ୍ଡପାଣିଙ୍କୁ ତାଙ୍କ ବାସଭବନକୁ ଆଣି ଟଙ୍କା ଦେବାକୁ କହିଥିଲେ। ଦଣ୍ଡପାଣି ସେଠାରେ ପହଞ୍ଚତ୍ ଜିତେନ୍ଦ୍ରଙ୍କୁ ୩ ହଜାର ଟଙ୍କା ଲାଞ୍ଚ ଦେଇଥିଲେ। ପୂର୍ବରୁ ଛକି ରହିଥିବା ଭିଜିଲାନ୍ସ ଟିମ୍ ଚଢଉ କରି ଉକ୍ତ ଲାଞ୍ଚ ଟଙ୍କା ସହ କିରାଣି ଦଣ୍ଡପାଣିଙ୍କୁ ଗିରଫ କରିଥିବା ଏସ୍ପି ସ୍ବାଇଁ କହିଛନ୍ତି।
