ପୁରୀ ଜିଲା କୃଷ୍ଣପ୍ରସାଦ ବ୍ଲକ ଅନ୍ତର୍ଗତ ବଡ଼ଝାଡ଼ ଗାଁରେ ମୋର ଜନ୍ମ। ନାରାୟଣ ବିଦ୍ୟାପୀଠରୁ ଏକାଦଶ ଶ୍ରେଣୀ ପାସ୍ କରି ଗୋଦାବରୀଶ ମହାବିଦ୍ୟାଳୟରେ ଆଇ.ଏ. ଓ ଓଡ଼ିଆ ଅନର୍ସ ରଖି ବି.ଏ. ପଢିଥିଲି। ତା’ପରେ ବ୍ରହ୍ମପୁର ୟୁନିଭର୍ସିଟିରେ ପି.ଜି. କଲି। ପି.ଜି.ରେ ମୁଁ ଗୋଲ୍ଡ ମେଡାଲ୍ ବି ପାଇଥିଲି। ଏହାପରେ ମୋତେ ଜୟଦେବ କଲେଜ, ଭୁବନେଶ୍ୱରରେ ଓଡ଼ିଆ ଅଧ୍ୟାପକ ଭାବେ କାମ କରିବାର ସୁଯୋଗ ମିଳିଥିଲା। ହେଲେ ଅଳ୍ପ କିଛିଦିନ ପରେ ଅଞ୍ଚଳବାସୀଙ୍କ ଅନୁରୋଧ କ୍ରମେ ସେଠାରୁ ଚାକିରି ଛାଡି ନିଜ ଅଞ୍ଚଳରେ ଏକ କଲେଜ କରିବାକୁ ନିଷ୍ପତ୍ତି ନେଇଥିଲି। କାରଣ ଆମ ଅଞ୍ଚଳରେ ସେତେବେଳେ ଉଚ୍ଚଶିକ୍ଷା ପାଇଁ କୌଣସି କଲେଜ ନ ଥିଲା। ଯେଉଁମାନେ କଲେଜରେ ପଢ଼ିବାକୁ ଚାହୁଁଥିଲେ ସେମାନଙ୍କୁ ବହୁ କଷ୍ଟରେ ଚିଲିକା ପାର୍ ହୋଇ ଯିବାକୁ ପଡୁଥିଲା। ତେଣୁ ଏ ସମସ୍ୟାର ସମାଧାନ କରିବା ପାଇଁ ଗାଁ ଲୋକଙ୍କ ସହାୟତାରେ କୃଷ୍ଣପ୍ରସାଦ ବ୍ଲକରେ ରୁକ୍ମିଣୀ ଦେବୀ ଚିଲିକା ମହାବିଦ୍ୟାଳୟ ଗଢ଼ି ଉଠିଲା, ଯାହାର ଅଧ୍ୟକ୍ଷ ଦାୟିତ୍ୱ ମୁଁ ସମ୍ଭାଳିଥିଲି। ଏହିଠାରୁ ମୋତେ ପ୍ରଥମ ମାସ ୫୦୦ ଟଙ୍କା ପାରିଶ୍ରମିକ ମିଳିଥିଲା, ଯାହା ଥିଲା ମୋ ଜୀବନର ପ୍ରଥମ ରୋଜଗାର। ଏହି ଟଙ୍କାଟି ପାଇବା ପରେ ଖୁସିରେ ମା’ ହାତରେ ନେଇ ଦେଇଥିଲି। ପ୍ରାୟ ୧୭ ବର୍ଷ ଏହି କଲେଜରେ ଅଧ୍ୟକ୍ଷ ପଦବୀରେ ରହିବା ପରେ ଗ୍ରାମ୍ୟ ବିବାଦକୁ ନେଇ ପରିଚାଳନା କମିଟିରେ ସମସ୍ୟା ଦେଖାଦେବାରୁ ଅସନ୍ତୋଷ ପ୍ରକାଶ କରି ମୁଁ ଅଧ୍ୟକ୍ଷ ପଦରୁ ଓହରି ଯାଇଥିଲି। ଅବଶ୍ୟ ତା’ ଭିତରେ ମୁଁ ‘ଯୁଗ ଯନ୍ତ୍ରଣାର ଶିଳ୍ପୀ କାର୍ତ୍ତିକ ଚନ୍ଦ୍ର ରଥ ଏବଂ ତାଙ୍କ ନାଟକରେ ଜୀବନ ଚେତନା’ ନାମକ ବିଷୟ ଉପରେ ଥେସିସ୍ ଲେଖି ପିଏଚ୍.ଡି ଡିଗ୍ରୀ ହାସଲ କରିସାରିଥିଲି। ଚାକିରି ଛାଡିବା ପରେ ଭୁବନେଶ୍ୱରସ୍ଥ ଏକ ବେସରକାରୀ ଶିକ୍ଷାନୁଷ୍ଠାନରେ ଡେପୁଟି ଡାଇରେକ୍ଟର ଭାବେ କିଛିଦିନ କାମ କରିବା ପରେ ପୁଣି ଚାକିରି ଛାଡି ବ୍ରହ୍ମପୁରରେ ନିଜର ଏକ ଘରୋଇ ଶିକ୍ଷାନୁଷ୍ଠାନ ଗଢିଲି, ଯେଉଁଠାରେ ଯୁକ୍ତ ଦୁଇ, ଯୁକ୍ତ ତିନି ବିଜ୍ଞାନ ଛାତ୍ରୀଛାତ୍ରମାନଙ୍କ ଶିକ୍ଷାଗ୍ରହଣ ନିମନ୍ତେ ସମସ୍ତ ସୁବିଧା ଉପଲବ୍ଧ ଅଛି। ତେବେ ମୁଁ ଏହି ଶିକ୍ଷାନୁଷ୍ଠାନର ପରିଚାଳନା ନିର୍ଦ୍ଦେଶକ ରହିବା ସଙ୍ଗେ ସଙ୍ଗେ ୟା’ଭିତରେ ଅନେକ ନାଟକ, ଯାତ୍ରା, ସମାଲୋଚନା ଭିତ୍ତିକ ଲେଖା ବି ଲେଖିସାରିଲିଣି। ଏକାଦଶ ଶ୍ରେଣୀରେ ପଢିଲା ବେଳୁ ଲେଖାଲେଖିର ଧାରା ମୋର ଆରମ୍ଭ ହୋଇଥିଲା। ‘ଝଡ଼ର ପରିଧି’ ଥିଲା ମୋ ଲିଖିତ ପ୍ରଥମ ନାଟକ। ପୂର୍ଣ୍ଣାହୁତି, ଧବଳ ପିକ, ମନ ଓ ମନନ, ବରଂ ନିବାସ ଭଲ ରଣ କ୍ଷେତ୍ରରେ, ଅସମର୍ଥ ସିଦ୍ଧାର୍ଥମାନେ ଇତ୍ୟାଦି ହେଉଛି ମୋର ଅନ୍ୟ କେତେକ ପ୍ରମୁଖ ନାଟକ। ସେହିପରି ଶୁଖିଲା ନଈର ଝାଉଁଳା କଇଁ, ଆଦର୍ଶର ପୂଜା ଫାଶୀଖୁଣ୍ଟରେ, ମୋ ଠିକଣା ମୋତେ ଅଜଣା ଇତ୍ୟାଦି ହେଉଛି ମୋ ଲିଖିତ କେତୋଟି ପ୍ରମୁଖ ଯାତ୍ରା ନାଟକ, ଯାହା ବିଭିନ୍ନ ମଞ୍ଚରେ ପରିବେଷିତ ହୋଇ ଦର୍ଶକଙ୍କର ପ୍ରଶଂସା ସାଉଁଟି ସାରିଛି। ତା’ଛଡ଼ା ‘ମା’ କାଳିଜାଈ’ ନାମକ ଏକ ଡକ୍ୟୁମେଣ୍ଟାରୀ ଫିଲ୍ମ ଓ ‘ଆଇ ମିସ୍ ୟୁ’ନାମକ ଏକ ଟେଲି ଫିଲ୍ମର କାହାଣୀ ଲେଖିବା ସହ ତା’ର ଚିତ୍ରନାଟ୍ୟ ଓ ସଂଳାପ ରଚନା ବି ମୁଁ କରିଛି। ଏସବୁ ବ୍ୟତୀତ ଝଡ଼ର ପରିଧି, ଧୂପଛାୟା, ବିଜ୍ଞାନ ଯୁଗରେ ସାହିତ୍ୟର ଭୂମିକା, ନିତ୍ୟ ସୁଖ ପାଇଁ ନୀତି ବିଜ୍ଞାନ, ମନ ନିୟନ୍ତ୍ରଣ ଓ ଚାପ ମୁକ୍ତିର ଉପାୟ ନିରୂପଣ, ବିଦ୍ୟାର୍ଥୀଙ୍କ ସମସ୍ୟା ଓ ତା’ର ସମାଧାନ, ଅର୍ଦ୍ଧ ଶତାବ୍ଦୀର ଓଡ଼ିଆ ସାହିତ୍ୟରେ କବି ମାୟାଧର ମାନସିଂହ, ଚିଲିକା ଓ ଶ୍ରୀଜଗନ୍ନାଥ ଇତ୍ୟାଦି ପୁସ୍ତକ ବି ମୋର ପ୍ରକାଶିତ ହୋଇସାରିଛି। ଆଉ ଏ ସମସ୍ତ ଉଲ୍ଲେଖନୀୟ କାର୍ଯ୍ୟ ପାଇଁ ମୋତେ ତରୁଣ ନାଟ୍ୟକାର, ନାଟ୍ୟ ଭୂଷଣ, ନାଟ୍ୟ ମୁନି ଭରତ, ମାନସିଂହ ସମ୍ମାନ ଆଦି ବି ମିଳିସାରିଛି। ଭଗବାନଙ୍କ ଆଶୀର୍ବାଦରୁ ସବୁ କିଛି ଠିକ୍ଠାକ୍ ଚାଲିଛି ଆଉ ଆଗକୁ ବି ଏମିତି ଚାଲୁ ବୋଲି ଆଶା କରୁଛି।
