ଲାହୋର,୧୬।୩(ଏପି)- କ୍ରିସ୍ ଲିନ୍ଙ୍କ ୫୨ ବଲରେ ବିସ୍ଫୋରକ ଶତକ ଯୋଗୁ ଲାହୋର କ୍ୱାଲାଣ୍ଡର୍ସ ପ୍ରଥମ ଥର ପାଇଁ ପିଏସ୍ଏଲ ସେମିଫାଇନାଲରେ ପ୍ରବେଶ କରିଛି। ରବିବାର ଗଦ୍ଦାଫି ଷ୍ଟାଡିୟମରେ ଖେଳାଯାଇଥିବା ମ୍ୟାଚ୍ରେ ପଏଣ୍ଟ ଟେବୁଲ ଟପ୍ପର ମୁଲତାନ ସୁଲତାନକୁ ୯ ଉଇକେଟରେ ହରାଇ ଦେଇଛି ଲାହୋର ଦଳ। ଲିନ୍ଙ୍କ ଇନିଂସରେ ସାମିଲ ଥିଲା ୮ ଛକା ଓ ଡଜନ ଚୌକା। ସେ ୫୫ ବଲରେ ୧୧୩ ରନ୍ କରି ଅପରାଜିତ ଥିଲେ। ତାଙ୍କୁ ଫକର ଜାମନ (୫୭) ପୂର୍ଣ୍ଣ ସହଯୋଗ କରିଥିଲେ। ଏଥିଯୋଗୁ ଦଳ ୧୮.୫ ଓଭରରେ ଏକ ଉଇକେଟ କ୍ଷତିରେ ୧୯୧ ରନ୍ କରି ମ୍ୟାଚ୍ ଜିତି ନେଇଥିଲା। ପୂର୍ବରୁ ପ୍ରଥମେ ବ୍ୟାଟିଂ କରି ମୁଲତାନ ଦଳ ଧାର୍ଯ୍ୟ ୨୦ ଓଭରରେ ୬ ଉଇକେଟ ହରାଇ ୧୮୬ ରନ୍ କରିଥିଲା। ଦଳ ପାଇଁ ଖୁସଦିଲ ଶାହା ୨୯ ବଲରେ ୭୦ ରନ୍ର ଇନିଂସ ଖେଳିଥିଲେ। ଅଧିନାୟକ ଶାନ ମାସୁଦ ୪୨ ଓ ରବି ବେପାରା ୩୩ ରନ୍ କରିଥିଲେ। ଏହି ବିଜୟ ସହ ଲାହୋର ୧୦ ମ୍ୟାଚ୍ରୁ ୧୦ ପଏଣ୍ଟ ସହ ତୃତୀୟ ସ୍ଥାନରେ ରହି ସେମିଫାଇନାଲରେ ସ୍ଥାନ ପକ୍କା କରିଛି। ଦଳ ତା’ର ଅନ୍ତିମ ୩ ମ୍ୟାଚ୍ରେ ୧୮୦ରୁ ଅଧିକ ରନ୍ର ପିଛା କରି ବିଜୟ ହାସଲ କରିଛି। ସିଜନ ଆରମ୍ଭରୁ ଦଳ ହ୍ୟାଟ୍ରିକ ପରାଜୟ ବରଣ କରିଥିଲା। ୨୦୧୬ରେ ପିଏସ୍ଏଲ ଆରମ୍ଭ ହେବାଠାରୁ ଲାହୋର ଏପର୍ଯ୍ୟନ୍ତ ପଏଣ୍ଟ ଟେବୁଲର ଅନ୍ତିମ ସ୍ଥାନରେ ରହିଆସୁଥିଲା।
