ଭୁବନେଶ୍ୱର,୨୧ା୧୨(ବ୍ୟୁରୋ): ରାଜ୍ୟ ଭାଜପା ପକ୍ଷରୁ ଶୁକ୍ରବାର ଦଳର ୩୬ ସାଙ୍ଗଠନିକ ଜିଲା ମଧ୍ୟରୁ ୩୪ଟି ପାଇଁ ସଭାପତିଙ୍କ ନାମ ପ୍ରକାଶ କରାଯାଇଛି। ଗତ ୧୫ ଏବଂ ୧୬ ତାରିଖରେ ଜିଲା ସଭାପତି ଚୟନ ପାଇଁ ଦଳୀୟ ନିର୍ବାଚନ କରାଯାଇଥିଲା। ଏହାର ଫଳାଫଳ ରାଜ୍ୟ ଭାଜପା ପକ୍ଷରୁ ପ୍ରକାଶ କରାଯାଇଥିବା ବେଳେ ୨ଟି ଜିଲା ଯଥା ଭୁବନେଶ୍ୱର ଏବଂ କଳାହାଣ୍ଡି ପାଇଁ ଏ ପର୍ଯ୍ୟନ୍ତ କିଛି ଚୂଡାନ୍ତ ହୋଇନାହିଁ। ରାଜ୍ୟ ନିର୍ବାଚନ ଅଧିକାରୀ ରଞ୍ଜନ ପଟେଲଙ୍କ ଅନୁମୋଦନକ୍ରମେ ସହ ନିର୍ବାଚନ ଅଧିକାରୀ ସୁଦୀପ୍ତ ରାୟ ଏହି ଘୋଷଣା କରିଛନ୍ତି। ଗତଥରର ଦୁଇଜଣ ସଭାପତିଙ୍କୁ ପୁନର୍ବାର ଦାୟିତ୍ୱ ଦିଆଯାଇଥିବାବେଳେ ବାକି ୩୨ଟିରେ ନୂଆ ମୁହଁ ଦେଖିବାକୁ ମିଳିଛି। ଯାଜପୁର ଜିଲା ସଭାପତି ଥିବା ଗୌତମ ରାୟ ଏବଂ ଜଗତ୍ସିଂହପୁରର ସତ୍ୟବ୍ରତ ମହାପାତ୍ରଙ୍କ ଉପରେ ପୁଣିଥରେ ଦଳ ଭରସା କରିଛି। ଅନ୍ୟପଟେ ଏଥର ୪ ବିଧାୟକ ଏବଂ ଦୁଇ ପୂର୍ବତନ ବିଧାୟକଙ୍କୁ ଜିଲା ସଭାପତି ଦାୟିତ୍ୱ ମିଳିଛି। ୪ ବିଧାୟକ ହେଲେ ତଳସରା ବିଧାୟକ ଭବାନୀ ଶଙ୍କର ଭୋଇ, ରାଇରଙ୍ଗପୁର ବିଧାୟକ ନବଚରଣ ମାଝୀ, ମାଲକାନାଗିରି ବିଧାୟକ ଆଦିତ୍ୟ ମାଢ଼ୀ ଏବଂ ପାରଳାଖେମୁଣ୍ଡି ବିଧାୟକ କେ. ନାରାୟଣ ରାଓ। ସେହିପରି ସାଲେପୁରର ପୂର୍ବତନ ବିଧାୟକ ପ୍ରକାଶ ଚନ୍ଦ୍ର ବେହେରା ଏବଂ ପୂର୍ବତନ ବିଧାୟକ(ବୈଶିଙ୍ଗା) କାନ୍ଦରା ସୋରେନଙ୍କୁ ସଭାପତିଭାବେ ନିଯୁକ୍ତି ଦିଆଯାଇଛି।
ଅନ୍ୟପକ୍ଷରେ ଗୋଷ୍ଠୀ ବିବାଦ ଯୋଗୁ ଭୁବନେଶ୍ୱର ଏବଂ କଳାହାଣ୍ଡି ଜିଲା ପାଇଁ ସଭାପତି ଚୟନ ହୋଇ ପାରି ନ ଥିବା ଚର୍ଚ୍ଚା ହେଉଛି। ସେହିପରି ଦଳ ପକ୍ଷରୁ ୧୮୬ଜଣଙ୍କୁ ରାଜ୍ୟ ପରିଷଦର ସଦସ୍ୟଭାବେ ଚୟନ କରାଯାଇଛି। ଏହି ତାଲିକା ମଧ୍ୟ ଖୁବ୍ଶୀଘ୍ର ପ୍ରକାଶ ପାଇବ ବୋଲି ଜଣାପଡିଛି। ଜିଲା ସଭାପତିଙ୍କ ତାଲିକା ରବିବାର କେନ୍ଦ୍ରୀୟ ଟିମ୍ଙ୍କ ନିକଟକୁ ପଠାଇ ଦିଆଯିବ, ଏହାପରେ ରାଜ୍ୟ ସଭାପତି ଚୟନ ଲାଗି ଦିନ ସ୍ଥିର କରାଯିବ ବୋଲି ସୁଦୀପ୍ତ ରାୟ କହିଛନ୍ତି।
