ରାଜକୋଟ,୨୯।୧୨- ଏଠାରେ ଉତ୍ତର ପ୍ରଦେଶ ଓ ସୌରାଷ୍ଟ୍ର ମଧ୍ୟରେ ଅନୁଷ୍ଠିତ ମ୍ୟାଚ୍ରେ ଏଭଳି ଏକ ଘଟଣା ଘଟିଥିଲା, ଯାହା ପ୍ରାୟତଃ ଦେଖିବାକୁ ମିଳେ ନାହିଁ। ମ୍ୟାଚ୍ରେ ସୌରାଷ୍ଟ୍ର ପାଇଁ ଖେଳୁଥିବା ଟେଷ୍ଟ ସ୍ପେଶାଲିଷ୍ଟ ଚେତେଶ୍ୱର ପୂଜାରା ବୋଲିଂ କରି ଉଇକେଟ ହାସଲ କରିଛନ୍ତି। ପ୍ରଥମ ଇନିଂସରେ ୧୬୮ତମ ଓଭରରେ ବୋଲିଂ କରିବାକୁ ସୁଯୋଗ ପାଇଥିଲେ ପୂଜାରା। ସ୍ପିନ ବୋଲିଂ କରିଥିବା ପୂଜାରା ଦ୍ୱିତୀୟ ବଲରେ ଉଇକେଟ ପାଇବା ପରେ ଖୁସିରେ ଦୌଡ଼ିବା ଆରମ୍ଭ କରିଥିଲେ। ଏହାର ଏକ ଭିଡିଓ ଇନ୍ଷ୍ଟାଗାମରେ ଶେୟାର କରି ୩୧ ବର୍ଷୀୟ ବ୍ୟାଟ୍ସମ୍ୟାନ କ୍ୟାପଶନରେ ଲେଖିଛନ୍ତି, ମୁଁ ବ୍ୟାଟ୍ସମାନରୁ ଅଲରାଉଣ୍ଡର ମାନ୍ୟତା ପାଇଛି। ଏହାର ମଜାକ ଉଡାଇ ଭାରତୀୟ ଓପନର ଶିଖର ଧାଓ୍ବନ କମେଣ୍ଟ କରିଛନ୍ତି, ଭାଇ କେବେ ପିଚ୍ରେ ତ ଏତେ ଗତିରେ ଦୌଡ଼। ଅନ୍ୟପକ୍ଷରେ ଭାରତୀୟ ସ୍ପିନର ରବିଚନ୍ଦ୍ରନ ଅଶ୍ୱିନ ସାଥୀ ଖେଳାଳି ପୂଜାରାଙ୍କୁ ପ୍ରଶଂସା କରି ଆହୁରି ବୋଲିଂ କରିବାକୁ କହିଛନ୍ତି।
