କୁଜଙ୍ଗ,୫ା୩(ଡି.ଏନ.ଏ.): ଜଣେ ଯୁବକଙ୍କ ମୃତ୍ୟୁର ୭ମାସ ପରେ ତାଙ୍କ ମା’ହତ୍ୟା ଅଭିଯୋଗ ଆଣିଛନ୍ତି। ପୁଅକୁ ଯୋଜନାବଦ୍ଧଭାବେ ହତ୍ୟା କରାଯିବା ପରେ ରାସ୍ତାରେ ଫିଙ୍ଗାଯାଇ ଦୁର୍ଘଟଣାର ରୂପ ଦିଆଯାଇଛି ବୋଲି ମୃତକଙ୍କ ମା’ କୁଜଙ୍ଗ ପ୍ରଥମ ଶ୍ରେଣୀ ବିଚାର ବିଭାଗୀୟ ଅଦାଲତରେ ଅଭିଯୋଗ କରିଛନ୍ତି। ଅଦାଲତଙ୍କ ନିର୍ଦ୍ଦେଶକ୍ରମେ କୁଜଙ୍ଗ ଥାନାରେ ଅଭିଯୁକ୍ତଙ୍କ ନାମରେ ଦଫା ୩୬୫, ୨୦୧, ୩୭୯, ୩୦୨, ୫୦୬, ୧୨୦ଖ, ୩୪ ଆଇପିସିରେ ମାମଲା ସଂଖ୍ୟା: ୫୦/୨୦ ରୁଜୁ କରାଯାଇଛି। ଏଥିସହିତ ଅଭିଯୋଗକାରିଣୀଙ୍କ ବୟାନ ରେକର୍ଡ କରାଯାଇଛି। ପୋଲିସ ଘଟଣାର ତଦନ୍ତ ଆରମ୍ଭ କରିଥିବା ଥାନା ଅଧିକାରୀ ଦିଲୀପ ସାହୁ ସୂଚନା ଦେଇଛନ୍ତି।
କୁଜଙ୍ଗ ଅଞ୍ଚଳରର ସୁଲୋଚନା ଦାଶ ଅଭିଯୋଗ କରିଛନ୍ତି, ଗତ ଜୁଲାଇ ୨୦ ତାରିଖରେ ତାଙ୍କ ସ୍ବାମୀ ଓ ବଡ଼ପୁଅ ଘରେ ନ ଥିବାବେଳ ସାନପୁଅ ଅମୃତ ଶୋଇଥିଲେ। ସେହିଦିନ ସକାଳ ୭ଟାରୁ ୧୨ଟା ମଧ୍ୟରେ ଅମୃତଙ୍କ ମୋବାଇଲ ଫୋନକୁ ୧୫ଥର କଲ ଆସିଥିଲା। କିନ୍ତୁ ଦିନ ୧୨ଟା ବେଳେ ଭୂତମୁଣ୍ଡାଇ କୁଜଙ୍ଗ ଅଞ୍ଚଳର କେତେଜଣ ଯୁବକ ଆସି ପୁଅକୁ ବଳ ପୂର୍ବକ ଘରୁ ନେଇଯାଇଥିଲେ। ସୁଲୋଚନା ପ୍ରତିବାଦ କରିବାରୁ ସେମାନେ କହିଥିଲେ, ଏକ ଘଟଣା ବିଷୟରେ ପ୍ରମାଣ କରିବାକୁ ଜଗତ୍ସିଂହପୁର ଯାଉଛୁ। ଅପରାହ୍ନ ୪ଟା ସୁଦ୍ଧା ଫେରି ଆସିବୁ। ମାତ୍ର ଅମୃତ ନିର୍ଦ୍ଦିଷ୍ଟ ସୁଦ୍ଧା ଘରକୁ ଫେରି ନ ଥିଲେ। ଫଳରେ ସୁଲୋଚନା ୪ଟା ୩୦ରେ ତାଙ୍କ ମୋବାଇଲକୁ ଫୋନ କରିବାରୁ ପୁଅ ଭୟଭୀତ ଓ ଥରଥର କଣ୍ଠରେ କହିଥିଲେ ଅଧା ଘଣ୍ଟା ମଧ୍ୟରେ ଘରେ ପହଞ୍ଚତ୍ବେ। ପରବର୍ତ୍ତୀ ସମୟରେ ଅମୃତଙ୍କ ମୋବାଇଲ ସୁଇଚଅଫ ହୋଇଯାଇଥିଲା। ମାତ୍ର ରାତ୍ର ୯ଟାରେ ସୁଲୋଚନା ଖବର ପାଇଲେଯେ, ତାଙ୍କ ପୁଅର ଦୁର୍ଘଟଣାରେ ମୃତ୍ୟୁ ହୋଇଯାଇଛି। ସୁଲୋଚନା ଓ ତାଙ୍କ ପରିବାର ମଣିଜଙ୍ଗା ଡାକ୍ତରଖାନାରେ ପହଞ୍ଚତ୍ ପୁଅର ମୃତଦେହ ଦେଖିଲା ପରେ ଏହା ଏକ ହତ୍ୟାକାଣ୍ଡ ବୋଲି ସନ୍ଦେହ କରିଥିଲେ। ମାତ୍ର ପୁଅର ମୃତ୍ୟୁକୁ ନେଇ ସୁଲୋଚନା ମାନସିକ ଭାରସାମ୍ୟ ହରାଇଥିବାର ସୁଯୋଗ ନେଇ ଅଭିଯୁକ୍ତ ତାଙ୍କ ସ୍ବାମୀଙ୍କଠାରୁ ସାଦା କାଗଜରେ ଦସ୍ତଖତ ନେଇ ତିର୍ତ୍ତୋଲ ଥାନାରେ ଏହା ଏକ ଦୁର୍ଘଟଣା ଜନିତ ବୋଲି ଲିଖିତ ଅକାରରେ ଜଣାଇଥିଲେ। ପରବର୍ତ୍ତୀ ସମୟରେ ସୁଲୋଚନା ବିଭିନ୍ନ ସୂତ୍ରରୁ ତଥ୍ୟ ଓ ସାଖୀ ଯୋଗାଡ କଲାପରେ ପୁଅର ଦୁର୍ଘଟଣା ଜନିତ ମୃତ୍ୟୁ ହୋଇନାହିଁ, ବରଂ କୁଜଙ୍ଗ ଭୂତମୁଣ୍ଡାଇ, କେନ୍ଦ୍ରାପଡା ଅଞ୍ଚଳର କେତେଜଣ ପେସାଦାର ଅଭିଯୁକ୍ତ ତାଙ୍କୁ ହତ୍ୟାକରି ତା’ଙ୍କ ଗାଡିକୁ ଭାଙ୍ଗି ରାସ୍ତାରେ ଫିଙ୍ଗିଥିବା ଜାଣିବାକୁ ପାଇଥିଲେ। ଏହି ଅଭିଯୁକ୍ତମାନେ ପୂର୍ବରୁ ବହୁବାର ଅମୃତଙ୍କୁ ମରଣାନ୍ତକ ଆକ୍ରମଣ କରିଥିଲେ ବି ଅମୃତ ରକ୍ଷା ପାଇଯାଇଥିଲେ ବୋଲି ତାଙ୍କ ମା’ କହିଛନ୍ତି। ସୂଚନାଯୋଗ୍ୟ, ଜୁଲାଇ ୨୦ ତାରିଖ ରାତିରେ ତିର୍ତ୍ତୋଲ ଥାନା ଅଧୀନ ବାଲିପାଟଣାଠାରେ ଅମୃତଙ୍କ ମୃତଦେହ ଉଦ୍ଧାର କରାଯାଇଥିଲା। ଘଟଣାର କ୍ରାଇମ ବ୍ରାଞ୍ଚ ତଦନ୍ତ ପାଇଁ ସୁଲୋଚନା ଦାବି କରିଛନ୍ତି।
