ପାରାଦୀପ,୨୫ା୧୨(ସ୍ବ.ପ୍ର.): ସମାଜରେ ବଞ୍ଚତ୍ବାକୁ କିନ୍ନରମାନେ ଅନେକ ସଂଘର୍ଷ କରିଥାନ୍ତି। ସେମାନଙ୍କ ରୋଜଗାର ଉତ୍ସଶୈଳୀ ଭିନ୍ନ ହୋଇଥାଏ। ତେଣୁ ଏସବୁକୁ ପରିବର୍ତ୍ତନ କରିବା ପାଇଁ ଏବେ ସରକାରୀ ଭାବେ ପ୍ରୟାସ ଆରମ୍ଭ ହୋଇଛି। ମଙ୍ଗଳବାର ପାରାଦୀପ ପୌର ପ୍ରଶାସନିକ ଭବନରେ କିନ୍ନରଙ୍କ ଅଧିକାର ସମ୍ପର୍କରେ ସମନ୍ବୟ ବୈଠକ ଅନୁଷ୍ଠିତ ହୋଇଥିଲା। ସ୍ବେଚ୍ଛାସେବୀ ସଙ୍ଗଠନ ଆଇଆର୍ଡିଏମଏସ୍ ଓ ଏସ୍ସିଏଏସ୍ ପକ୍ଷରୁ ମିଳିତ ଉଦ୍ୟମରେ ଆୟାଜିତ ବୈଠକରେ ଭିନ୍ନଭିନ୍ନ ବିଭାଗ ପ୍ରତିନିଧି ଯୋଗ ଦେଇଥିଲେ। ସେଥିରେ କିପରି କିନ୍ନରଙ୍କ କିପରି କୌଶଳ ବିକାଶ କରାଯାଇ ପାରିବ ସେ ସମ୍ପର୍କରେ ଆଲୋଚନା ହୋଇଥିଲା। ଜାତୀୟ ସହରାଞ୍ଚଳ ଜୀବିକା ମିଶନରେ ସେମାନଙ୍କୁ ସାମିଲ କରାଯାଇ କିପରି କର୍ମସଂସ୍ଥାନ ଯୋଗାଇ ହେବ, ମୌଳିକ ଅଧିକାର ଯଥା ବାସସ୍ଥାନ, ଶିକ୍ଷା, ପରିଚୟପତ୍ର ଦିଆଯିବ ସେ ସମ୍ପର୍କରେ ନିଷ୍ପତ୍ତି ହୋଇଥିଲା। ଏଥିସହ ରୋଜଗାର ପାଇଁ ଯେପରି ସ୍ବୟଂ ସହାୟିକା ଗୋଷ୍ଠୀକୁ ତାଲିମ ଦିଆଯାଉଛି ସେହିପରି କିନ୍ନରଙ୍କୁ ତାଲିମ ଦିଆଯାଇ କର୍ମ ସଂସ୍ଥାନରେ ସାମିଲ କରିବାକୁ କ’ଣ ପ୍ରବଧାନ ଅଛି ସେ ସମ୍ପର୍କରେ ଜିଲା ଟିଜି ଅଫିସର ଡା. ଚନ୍ଦ୍ରିକା ଆଚାର୍ଯ୍ୟ ମତବ୍ୟକ୍ତ କରିଥିଲେ। ପୌରାଞ୍ଚଳରେ ଥିବା ୨୮ଜଣ କିନ୍ନରଙ୍କ ମଧ୍ୟରୁ ଏବେ ସୁଦ୍ଧା ୧୦ଜଣଙ୍କୁ ଆଧାର କାର୍ଡ ଓ ରାଶାନ କାର୍ଡ ଦିଆଯାଇଛି ବୋଲି ପୌର ନିର୍ବାହୀ ଅଧିକାରୀ ଦିଲୀପ କୁମାର ମହାନ୍ତି କହିଥିଲେ। ସେମାନେ କିପରି ବ୍ୟାଙ୍କରେ ଖାତା ଖୋଲିବା ସହ ଋଣ ନେଇ ପାରିବେ ସେ ସମ୍ପର୍କରେ ୟୁକୋ ବ୍ୟାଙ୍କ ମ୍ୟାନେଜର ଅମରକାନ୍ତ ସାହୁ ମତବ୍ୟକ୍ତ କରିଥିଲେ। ବୈଷୟିକ ତାଲିମ, ରୋଜଗାରପନ୍ଥା ଆଦି ସମ୍ପର୍କରେ ବୈଷୟିକ ଟିମ୍ ସଦସ୍ୟ ଶୁଭାଶିଷ ସାମଲ ଆଲୋଚନା କରିଥିଲେ। ଅନ୍ୟମାନଙ୍କ ମଧ୍ୟରେ ରାଧାକାନ୍ତ ମହାପାତ୍ର, ନିର୍ମଳ କୁମାର ସାହୁ ପ୍ରମୁଖ ଯୋଗଦେଇ ମତ ରଖିଥିଲେ। ବୈଠକ ପରେ ପାରାଦୀପ କିନ୍ନର ସଂଘ ସଭାପତି ରାଧା ମା’ ଆଗକୁ କାମ କରି ସମାଜର ମୁଖ୍ୟ ଶ୍ରୋତରେ ସାମିଲ ହୋଇ ସାମାଜିକ ଦୃଷ୍ଟିଭଙ୍ଗୀ ପରିବର୍ତ୍ତନ ପାଇଁ ଚେଷ୍ଟା କରିବୁ ବୋଲି ମତ ରଖିଥିଲେ।
