କୁନ୍ଦୁରା,୨୪।୪(ଡି.ଏନ୍.ଏ.):କୁନ୍ଦୁରା ସଦରରୁ ୨୫ କିମି ଦୂର ଫୁଲଭଟ୍ଟା ପଞ୍ଚାୟତ ବିଶୁଭଟ୍ଟାରେ ୨ ମାସ ହେଲା ପିଇବା ପାଣି ପାଇଁ ଡହଳବିକଳ ହେଉଛନ୍ତି ଲୋକେ। ଗତ ମାର୍ଚ୍ଚରୁ ଗ୍ରୀଷ୍ମ ପ୍ରକୋପ ଦେଖାଦେଇଛି। ଫୁଲଭଟ୍ଟା ପଞ୍ଚାୟତ ଅଧୀନରେ ଥିବା ବିସୁଭଟ୍ଟା, କାଉଁଝରନ୍, ଭଟ୍ଟାପାଣି, ପଡେରକୁଣ୍ଡ, ଡୁଡୁମପଦର, କୁସୁମଗୁଡ଼ା, ପୋଡ଼ାପଦର ଗ୍ରାମର ଲୋକେ କୁନ୍ଦୁରାସ୍ଥିତ ପାନୀୟ ଜଳ ଯୋଗାଣ ବିଭାଗ କନିଷ୍ଠ ଯନ୍ତ୍ରୀଙ୍କ ନିକଟରେ ଅଭିଯୋଗ କରିଥିଲେ ମଧ୍ୟ ଏଯାବତ ପଦକ୍ଷେପ ହୋଇନାହିଁ। ପଥୁରିଆ ଅଞ୍ଚଳ ହୋଇଥିବାରୁ ସେଠାକାର ନଳକୂପରୁ ଖରାଦିନ ହେଲେ ପାଣି ବାହାରିବା କଷ୍ଟକର ହୋଇପଡୁଛି। ପ୍ରଶାସନ ପ୍ରତିବର୍ଷ ଟ୍ୟାଙ୍କର ଯୋଗେ ଏ ସବୁ ଅଞ୍ଚଳକୁ ଜଳ ଯୋଗାଉଛି। ଚଳିତ ବର୍ଷ ଖରା ଆରମ୍ଭ ହେବାର ୨ ମାସ ପରେ ବି ପ୍ରଶାସନ ଜଳ ଯୋଗାଣରେ ଉଦାସୀନତା ଦେଖାଉଛି। ବିସୁଭଟ୍ଟା ଗ୍ରାମର ୩ କି.ମି. ରାସ୍ତା ସରକାରୀ ମଞ୍ଜୁରୀ ପାଇଥିବାବେଳେ ପ୍ରଶାସନ କିନ୍ତୁ ୧ ବର୍ଷ ହେବ ନିର୍ମାଣ ଅଧାରେ ରଖିଥିବା ଯୋଗୁ ଜଳ ଯୋଗାଣ ଟ୍ୟାଙ୍କ ପହଞ୍ଚତ୍ ପାରୁନାହିଁ। କୁନ୍ଦୁରା ବ୍ଲକ ସଦରରେ ପାନୀୟ ଜଳ ଯୋଗାଣ ପ୍ରକଳ୍ପ ବିଭାଗ ଅଧୀନରେ ଦୁଇଜଣ କନିଷ୍ଠ ଯନ୍ତ୍ରୀ କାର୍ଯ୍ୟରତ ଥିବାବେଳେ ଜଣେ ଛୁଟିରେ ରହିଛନ୍ତି ା ଗତ ଦିନରେ ନଳକୂପ ଖନନ, ମରାମତି, ପୁନଃ ନିର୍ମାଣ ପ୍ରକ୍ରିୟା ବ୍ଲକ ଅଧୀନରେ ଥିବାବେଳେ ଏହା ଏବେ ପଞ୍ଚାୟତ ଅଧୀନରେ ରହିଛି। ଗ୍ରାମାଞ୍ଚଳରେ ନଳକୂପ ସମସ୍ୟା ହେଲେ ଏଥିପ୍ରତି ପିଇଓମାନେ କର୍ଣ୍ଣପାତ କରୁନାହାନ୍ତି ା ବିଶୁଭଟ୍ଟା ଏକ ବିଚ୍ଛିନ୍ନାଞ୍ଚଳ ଭଳି ଥିବାବେଳେ ଏଠାରେ କୌଣସି ପ୍ରଶାସନିକ ଅଧିକାରୀଙ୍କ ପାଦ ବର୍ଷ ବର୍ଷ ଧରି ପଡ଼ୁନାହିଁ ା ବିଶୁଭଟ୍ଟା ଅଞ୍ଚଳରେ ପଥୁରିଆ ଜମିକୁ ଖୋଳିବା ସମ୍ଭବ ହୋଇପାରୁ ନ ଥିବା ଯୋଗୁଁ ଝରଣା ଉପରେ ଭରସା କରୁଛନ୍ତି ଏଠାକାର ବାସିନ୍ଦା। ପ୍ରଶାସନିକ ଉଦାସୀନତା ଯୋଗୁ କୁନ୍ଦୁରା ବ୍ଲକର ୧୬ଟି ପଞ୍ଚାୟତରେ ଏଭଳି ପାଣି ସମସ୍ୟା ଲାଗିରହିଛି। ଏବେଠୁ ପ୍ରଶାସନ ପଦକ୍ଷେପ ନ ନେଲେ ଆନ୍ଦୋଳନକୁ କେହି ରୋକିପାରିବେ ନାହିଁ ।
