ନୂଆଦିଲ୍ଲୀ, ୨୪।୧୧ (ପି.ଟି.)- ଆଘାତଜନିତ ସମସ୍ୟା ଲାଗି ପାକିସ୍ତାନ ବିପକ୍ଷ ଆଗାମୀ ଡେଭିସ କପ୍ ଟାଇରୁ ଭାରତୀୟ ଟେନିସ ଖେଳାଳି ଶଶି ମୁକୁନ୍ଦ ଓହରି ଯାଇଛନ୍ତି। ମୁକୁନ୍ଦଙ୍କ ପାଦରେ ଆଘାତ ଲାଗିଥିବା ଜଣାପଡ଼ିଛି। ଏହି ଡେଭିସ କପ୍ ମୁକାବିଲା ଲାଗି ଭାରତୀୟ ଦଳର ରିଜର୍ଭ ଖେଳାଳି ଭାବେ ସ୍ଥାନ ପାଇଥିବା ମୁକୁନ୍ଦ ପର୍ତ୍ତୁଗାଲରେ ଏକ ଟୁର୍ନାମେଣ୍ଟ ଖେଳୁଥିବାବେଳେ ଆଘାତ ପାଇଥିଲେ। ‘ଦୁର୍ଭାଗ୍ୟଜନକ ଭାବେ ମୁକୁନ୍ଦ ଆମ ସହ ଗସ୍ତ କରିପାରିବେ ନାହିଁ। ପୂରବ ରାଜାଙ୍କ ସହ ପାର୍ଟନର ହୋଇ ଡବଲ୍ସ ମ୍ୟାଚ୍ ଖେଳୁଥିବାବେଳେ ଆଘାତ ପାଇଥିବା ଶଶି ଆମକୁ ଜଣାଇଛନ୍ତି’ ବୋଲି ଭାରତୀୟ ଡେଭିସ କପ୍ ଦଳର କୋଚ୍ ଜିସାନ ଅଲି ଅଭ୍ୟାସ ସେସନ ଅବସରରେ ଏହା କହିଛନ୍ତି। ଫଳରେ ୨ୟ ଭାରତୀୟ ଖେଳାଳି ଭାବେ ମୁକୁନ୍ଦ ଡେଭିସ କପ୍ ମୁକାବିଲାରୁ ଓହରି ଯାଇଛନ୍ତି। ଏଥିପୂର୍ବରୁ ରୋହନ ବୋପାନ୍ନା କହୁଣିଜନିତ ସମସ୍ୟା ଲାଗି ଓହରି ଯାଇଥିଲେ।
