କୋଲକାତା,୬ା୬: ଲୋକ ସଭା ନିର୍ବାଚନ ଶେଷ ହୋଇଥିଲେ ମଧ୍ୟ ପଶ୍ଚିମବଙ୍ଗରେ ଶାସକ ତୃଣମୂଳ କଂଗ୍ରେସ(ଟିଏମ୍ସି) ଏବଂ ଭାଜପା ମଧ୍ୟରେ ବିବାଦ ଶେଷ ହେବାର ନାଁ ନେଉନାହିଁ। ଏବେ ସ୍ଲୋଗାନକୁ ନେଇ ଦୁଇ ଦଳ ମୁହାଁମୁହିଁ ହୋଇଛନ୍ତି। ଭାଜପାର ଜୟ ଶ୍ରୀରାମ ସ୍ଲୋଗାନକୁ ଟିଏମ୍ସି କର୍ମୀ ଜୟ ହିନ୍ଦ୍ ଏବଂ ଜୟ ବଙ୍ଗଳା ସ୍ଲୋଗାନ ଦ୍ୱାରା ପ୍ରତିହତ କରିବେ ବୋଲି ଗତ ସପ୍ତାହରେ ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଥିଲେ। ଏବେ ରାମଙ୍କ ପରେ ହିନ୍ଦୁ ଦେବୀ ମା’ କାଳୀଙ୍କୁ ପଶ୍ଚିମବଙ୍ଗରେ ତୃଣମୂଳ କଂଗ୍ରେସ ଅସ୍ତ୍ର କରିଛି। ଫଳରେ ସେଠାରେ ଦେଖାଦେଇଛି ସ୍ଲୋଗାନ ଯୁଦ୍ଧ। ଭାଜପା ପଶ୍ଚିମବଙ୍ଗକୁ ଉତ୍ତର ଭାରତୀୟ ସଂସ୍କୃତି ଆଣୁଥିବା ଟିଏମ୍ସି ଅଭିଯୋଗ କରିଛି। ପଶ୍ଚିମବଙ୍ଗର ସବୁଠୁ ଲୋକପ୍ରିୟ ଦେବୀଙ୍କ ପ୍ରଶଂସାରେ ଭାଜପା ନେତାମାନେ ଜୟ ମା’ କାଳୀ ସ୍ଲୋଗାନ ଦେଇପାରିବେ କି ବୋଲି ଟିଏମ୍ସି ନେତାମାନେ ସେମାନଙ୍କୁ ପଚାରିବାକୁ ମମତା କହିଛନ୍ତି।
ଅନ୍ୟପକ୍ଷରେ ପଶ୍ଚିମବଙ୍ଗ ଦାୟିତ୍ୱରେ ଥିବା ଭାଜପା ରାଷ୍ରୀୟ ସାଧାରଣ ସମ୍ପାଦକ କୈଳାସ ବିଜୟଭର୍ଗୀୟ କହିଛନ୍ତି, ମା’ କାଳୀଙ୍କ ନାଁରେ ସ୍ଲୋଗାନ ଦେବାରେ ଆମର ଅସୁବିଧା କେଉଁଠି। ଆମେ ଜୟ ମା’ କାଳୀ, ଜୟ ବଙ୍ଗଳା, ଜୟ ଦୁର୍ଗା ସହିତ ଜୟ ଶ୍ରୀରାମ କହିବୁ ବୋଲି ସେ କହିଛନ୍ତି। ଜୟ ହିନ୍ଦ୍ ଉଚ୍ଚାରଣ କରିବାରେ ଆମେ ଗର୍ବ ଅନୁଭବ କରିବୁ ବୋଲି ଭାଜପା ରାଜ୍ୟ ସଭାପତି ଦିଲୀପ ଘୋଷ କହିଛନ୍ତି।
