ଜଟଣୀ,୩୦ା୧(ଡି.ଏନ.ଏ.): ଜଟଣୀ ଥାନା ବାଲିଛକ ମୁଣ୍ଡିଆସାହିରେ ଜଣେ ନିଶା ମାଫିଆଙ୍କ ଘର ଉପରେ ଜଟଣୀ ପୋଲିସ ମଙ୍ଗଳବାର ଚଢ଼ାଉ କରିଥିଲା। ଚଢ଼ାଉ ସମୟରେ ନିଶାବେପାରୀ ଖସି ଯାଇଥିଲେ। ହେଲେ ଘର ମଧ୍ୟରୁ ଖଣ୍ଡା ଆଦି ବିଭିନ୍ନ ମାରଣାସ୍ତ୍ର, ୧୧ଟି ବୋମା, ୨୫ ଲିଟର ଦେଶୀମଦ ପୋଲିସ ଜବତ କରିଥିଲା। ଖସିଯିବାରେ ସକ୍ଷମ ହୋଇଥିବା ମାଫିଆ ବିଭିନ୍ନ ନିଶାଦ୍ରବ୍ୟ କାରବାର କରୁଥିବା ଖବରପାଇ ଆଇଆଇସି ବିଶ୍ୱରଞ୍ଜନ ସାହୁଙ୍କ ନେତୃତ୍ୱରେ ଏହି ଚଢ଼ାଉ କରାଯାଇଥିଲା। ତେବେ ନିଶାବେପାରୀଙ୍କ ଘର ମଧ୍ୟରୁ ଏତେ ସଂଖ୍ୟାରେ ବୋମା ଓ ମାରଣାସ୍ତ୍ର ଜବତ ହେବା ପରେ ନାନା କଳ୍ପନା ଜଳ୍ପନା ସୃଷ୍ଟି କରିଛି। କୌଣସି ଅପରାଧ ସଙ୍ଗଠିତ କରିବା ଉଦ୍ଦେଶ୍ୟରେ ନିଶାବେପାରୀ ଜଣକ ଏହି ବୋମା ଓ ମାରଣାସ୍ତ୍ର ରଖିଥିବା ନେଇ ସନ୍ଦେହ ସୃଷ୍ଟି କରିଛି। ଫେରାର ହେବାରେ ସକ୍ଷମ ହୋଇଥିବା ନିଶାବେପାରୀ ଧରାପଡ଼ିବା ପରେ ଏହା ସ୍ପଷ୍ଟ ହେବ। ଏ ନେଇ ବିଭିନ୍ନ ଦଫାରେ ନଂ. ୫୪/୨୦ରେ ମାମଲା ରୁଜୁ କରି ପୋଲିସ ତଦନ୍ତ କରୁଛି।
