ତିର୍ତ୍ତୋଲ,୧୧ା୧୨(ଡି.ଏନ.ଏ.): ତିର୍ତ୍ତୋଲ ବ୍ଲକ ଅନ୍ତର୍ଗତ ତୁଳଙ୍ଗ ପଞ୍ଚାୟତ ନାଉଲ ସରକାରୀ ପ୍ରାଥମିକ ବିଦ୍ୟାଳୟ ପରିସରରେ ଏକ ଶ୍ରେଣୀଗୃହ ବିପଦସଙ୍କୁଳ ଅବସ୍ଥାରେ ରହିଛି। ଏହି ଶ୍ରେଣୀଗୃହର କାନ୍ଥରେ ଫାଟ ସୃଷ୍ଟିହେବା ସହ ଖୁଣ୍ଟଗୁଡିକର ମୂଳ ଖାଇଗଲାଣି। କବାଟ, ଝରକା ଭାଙ୍ଗିରୁଜିଯାଇଛି। ଫଳରେ ଏହା ପାଠ ପଢାଇବା ନିମନ୍ତେ ଅନୁପଯୁକ୍ତ ହୋଇପଡିଛି। ଶ୍ରେଣୀଗୃହ କାନ୍ଥରେ ଏହିଘର ବିପଦପୂର୍ଣ୍ଣ ବୋଲି ସୂଚନା ଦିଆଯାଇଛି। ହେଲେ ବିଦ୍ୟାଳୟ ପରିସରରେ ଥିବା ଏହି ବିପଦସଙ୍କୁଳ ଶ୍ରେଣୀଗୃହ ପାଖଦେଇ ଛୋଟପିଲାମାନେ ଯିବାଆସିବା କରୁଛନ୍ତି। ବିଦ୍ୟାଳୟ ଖେଳକୁଦ ସମୟରେ ପିଲାମାନେ ମଧ୍ୟ ଏହାର ବାରଣ୍ଡା ମଧ୍ୟକୁ ଚାଲିଯାଉଛନ୍ତି। ବିଦ୍ୟାଳୟରେ ପଢୁଥିବା ପିଲାଙ୍କ ପ୍ରତି ଏହି ଶ୍ରେଣୀଗୃହ ବିପଦର କାରଣ ଭାବରେ ଠିଆହୋଇଛି। ତେଣୁ ଏହି ଗୃହକୁ ଭାଙ୍ଗିବା ପାଇଁ ଅଭିଭାବକ ଏବଂ ଗ୍ରାମବାସୀ ବିଡିଓଙ୍କ ନିକଟରେ ଅଭିଯୋଗ କରିଥିଲେ। ବିଡିଓ ରଞ୍ଜନ କୁମାର ପରିଡା ଅଭିଯୋଗ ପାଇବା ପରେ ବିଦ୍ୟାଳୟ ପରିଦର୍ଶନରେ ଯାଇ ସ୍ଥିତି ଅନୁଧ୍ୟାନ କରି ଶ୍ରେଣୀଗୃହକୁ ଭାଙ୍ଗିବା ପାଇଁ ବିଦ୍ୟାଳୟ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଥିଲେ। ତେବେ ନିର୍ଦ୍ଦେଶକୁ ବହୁ ଦିନ ବିତିଯାଇଥିଲେ ମଧ୍ୟ ଏହି ବିପଦସଙ୍କୁଳ ଘର ଭଙ୍ଗାଯିବା ସମ୍ଭବ ହୋଇନାହିଁ। ଫଳରେ ଏହାକୁ ନେଇ ଅଭିଭାବକ ମହଲରେ ଅସନ୍ତୋଷ ପ୍ରକାଶ ପାଇଛି। ତେଣୁ ଶୀଘ୍ର ଏହି ବିପଦସଙ୍କୁଳ ଶ୍ରେଣୀଗୃହ ଭାଙ୍ଗିବା ଦିଗରେ ପ୍ରଶାସନ ଦୃଷ୍ଟି ଦେବାକୁ ଅଭିଭାବକମାନେ ନିବେଦନ କରିଛନ୍ତି। ଏ ସମ୍ପର୍କରେ ବିଦ୍ୟାଳୟ ପ୍ରଧାନଶିକ୍ଷୟିତ୍ରୀ ଜ୍ୟୋସ୍ନାରାଣୀ ବିଶ୍ୱାଳଙ୍କୁ ପଚାରିବାରୁ ବିଦ୍ୟାଳୟରେ ଦୀର୍ଘମାସ ହେବ ପରିଚାଳନା କମିଟି ନ ଥିଲା। ଏହି ଘର ଭାଙ୍ଗିବା ନିମନ୍ତେ କମିଟିର ଅନୁମତି ନେବାର ଆବଶ୍ୟକତା ଥିବାରୁ ଏହା ସମ୍ଭବ ହୋଇପାରି ନ ଥିଲା। ନିକଟରେ କମିଟି ଗଠନ କରାଯାଇଛି। ତେଣୁ ଖୁବ୍ଶୀଘ୍ର ଏହି ବିପଦସଙ୍କୁଳ ଅବସ୍ଥାରେ ଥିବା ଶ୍ରେଣୀଗୃହ ଭାଙ୍ଗିବା ଦିଗରେ ପଦକ୍ଷେପ ନିଆଯିବ ବୋଲି କହିଥିଲେ। ଏବେ ଦେଖିବାକୁ ଅପେକ୍ଷା କେବେ ଏହି ବିପଦସଙ୍କୁଳ ଶ୍ରେଣୀଗୃହ ଭଙ୍ଗାଯାଉଛି।
