ଭୁବନେଶ୍ୱର,୧୨।୬(ବ୍ୟୁରୋ): ଗୋଟିଏ ପଟେ ପ୍ରଶଂସା ଆଉ ଗୋଟିଏ ପଟେ ସମାଲୋଚନା। ଏପରି କିଛି କରିଛନ୍ତି ବରିଷ୍ଠ କଂଗ୍ରେସ ନେତା ନରସିଂହ ମିଶ୍ର। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସେ ଗୋଟିଏ ପ୍ରସଙ୍ଗରେ ସମାଲୋଚନା କରିବା ସହ ଅନ୍ୟଟିରେ ପ୍ରଶଂସା କରିଛନ୍ତି। ନବୀନ କେନ୍ଦ୍ର ସରକାରଙ୍କ ନିକଟରେ ‘ଓଡ଼ିଶାକୁ ଫୋକସ୍ ଷ୍ଟେଟ୍’ କରିଥିବା ଦାବି ପ୍ରସଙ୍ଗରେ ନରସିଂହ ସମର୍ଥନ ଜଣାଇଛନ୍ତି। ମାତ୍ର ସ୍ବତନ୍ତ୍ର ପାହ୍ୟା ଦାବି ପ୍ରସଙ୍ଗରେ ସମାଲୋଚନା କରିବାକୁ ମଧ୍ୟ ପଛାଇନାହାନ୍ତି।
ଦିଲ୍ଲୀ ଗସ୍ତ କାଳରେ ନବୀନ ମୋଦିଙ୍କୁ ଭେଟି ଓଡ଼ିଶାକୁ ‘ଫୋକସ୍ ଷ୍ଟେଟ’ ଦାବି ରଖିଥିବା ପ୍ରସଙ୍ଗରେ ପ୍ରତିକ୍ରିୟା ରଖି ନରସିଂହ କହିଛନ୍ତି, ଏହି ଦାବି ଯୁକ୍ତିଯୁକ୍ତ। ମୁଁ ଏହାକୁ ସମର୍ଥନ କରୁଛି। ପ୍ରାକୃତିକ ଦୁର୍ବିବାକ ଯୋଗୁ ଦାବିର ଯଥାର୍ଥତା ରହିଛି ବୋଲି ସେ କହିଛନ୍ତି।
ସେହିଭଳି ଓଡ଼ିଶାକୁ ‘ସ୍ବତନ୍ତ୍ର ରାଜ୍ୟ ପାହ୍ୟା’ ଦାବି ପ୍ରସଙ୍ଗରେ ସେ କହିଛନ୍ତି, ନବୀନ କେନ୍ଦ୍ରରେ ମନ୍ତ୍ରୀ ଥିବା ବେଳେ ଏନ୍ଡିଏ ଅଂଶୀଦାର ଥିଲା। ସେତେବେଳେ କ’ଣ ପାଇଁ ସେ ଏହା କରି ନ ଥିଲେ। ଏହାର ଉତ୍ତର ନବୀନ ରାଜ୍ୟବାସୀଙ୍କୁ ଦେବା ଉଚିତ ବୋଲି ସେ ସମାଲେଚନା କରିଛନ୍ତି।
