ଚୌଦ୍ୱାର,୧୨ା୧୦ (ଡି.ଏନ୍.ଏ): ଶନିବାର ଅପରାହ୍ନରେ ବିରୁପା ନଦୀ ବ୍ୟାରେଜ ନିକଟରେ ଗାଧୋଉଥିବାବେଳେ ୨ଜଣ ଯୁବକ ଭାସିଯାଇଥିଲେ। ସେମାନଙ୍କ ମଧ୍ୟରୁ ଜଣଙ୍କୁ ଉଦ୍ଧାର କରାଯାଇଥିବାବେଳେ ଅନ୍ୟ ଜଣେ ନିଖୋଜ ହୋଇଯାଇଛନ୍ତି। ମିଳିଥିବା ସୂଚନା ଅନୁଯାୟୀ, ଚୌଦ୍ୱାର ହିଙ୍ଗୁଳାଇସାହି ହରିଜନ ବସ୍ତିର ଅବିନାଶ ନାଏକ, ତାଙ୍କ ସାନଭାଇ ଦେବା ଓ ପଡୋଶୀ ବଟ ଭୋଇ ଅପରାହ୍ନ ପ୍ରାୟ ୧୨ଟାରେ ବିରୁପା ନଦୀରେ ଗାଧୋଇବା ପାଇଁ ଘରୁ ଆସିଥିଲେ। ଦେବା କୂଳରେ ଠିଆହୋଇଥିବାବେଳେ ବଟ ଓ ଅବିନାଶ ପାଣି ଭିତରେ ପଶିଥିଲେ। ହେଲେ ପାଣିର ସ୍ରୋତ ପ୍ରଖର ଥିବାରୁ ଉଭୟ ଭାସି ଯାଇଥିଲେ। ଏହାଦେଖି ଦେବା ଚିତ୍କାର କରିବାରୁ ପାଖରେ ମାଛ ଧରୁଥିବା ଅଜିତ ସାହୁ ନାମକ ଯୁବକ ପାଣିରେ ପଶି ବଟଙ୍କୁ ଉଦ୍ଧାର କରିଥିଲେ। ହେଲେ ଅବିନାଶ ପାଣିରେ ଭାସି ନିଖୋଜ ହୋଇଯାଇଛନ୍ତି। ଜଗତ୍ପୁର ପୋଲିସ, ଅଗ୍ନିଶମ ବାହିନୀ ଓ ଓଡ୍ରାଫ୍ ଟିମ୍ ଘଟଣାସ୍ଥଳରେ ପହଞ୍ଚି ନଦୀରେ ଖୋଜାଖୋଜି କରିଥିଲେ ମଧ୍ୟ ରିପୋର୍ଟ ଲେଖାଯିବା ସୁଦ୍ଧା ଅବିନାଶଙ୍କ ପତ୍ତା ମିଳିପାରିନାହିଁ।
