ରଣପୁର,୩୧।୮(ସ୍ବ.ପ୍ର.)-ବାରମ୍ବାର ପୋଖରୀ ନିଲାମ ବାତିଲ ହେବା ପରେ ରଣପୁର ବ୍ଲକ ବୃନ୍ଦାବନପୁରରେ ଚାପା ଉତ୍ତେଜନା ପ୍ରକାଶ ପାଇଛି। ପଞ୍ଚାୟତବାସୀ ପଞ୍ଚାୟତ କାର୍ଯ୍ୟାଳୟ ସମ୍ମୁଖରେ ଶୁକ୍ରବାର ଅପରାହ୍ନରେ ଧାରଣା ଦେବା ପାଇଁ ସଜବାଜ ହେଉଥିବାବେଳେ ବିବାଦୀୟ ପୋଖରୀ ସମେତ ୫ପୋଖରୀ ନିଲାମ ହୋଇଛି । ସମୟ ଅଭାବରୁ ନିଲାମ ହୋଇ ପାରି ନଥିବା ପୋଖରୀ ପରବର୍ତ୍ତୀ ସମୟରେ ନିଲାମ କରାଯିବ ବୋଲି କୁହାଯିବା ପରେ ଉତ୍ତେଜନା ହ୍ରାସ ପାଇଥିଲା ।
ସୂଚନା ଅନୁସାରେ, ବୃନ୍ଦାବନପୁର ପଞ୍ଚାୟତର ୧୩ଟି ୱାର୍ଡ ଓ ୯ ରାଜସ୍ବ ଗଁାରେ କୋଚିଲା ସାହି ପୋଖରୀ ଲେଖନପୁର, ଗଁାମୁଣ୍ଡ ଗାଡିଆ ପୋଖରୀ ଲେଖନପୁର, କୁଣ୍ଡାଗରମ ପୋଖରୀ ବିନୋଦପଡା, ବ୍ରଜସୁନ୍ଦରପୁର ପୋଖରୀ, ଅଁଳାପଲ୍ଲୀ ପୋଖରୀ, ମାଳୁଆ ପୋଖରୀ ତାରପଲ୍ଲୀ, ଗୋଟ ପୋଖରୀ, ଅରାକାଠ ପୋଖରୀ ଗାଈଝର, ରାମଚଣ୍ଡୀ ପୋଖରୀ ପାଇକେରାପୁର ପରି ୯ ପୋଖରୀ ରହିଛି । ପଞ୍ଚାୟତର ୯ଟି ପୋଖରୀ ନିଲାମ ନିମନ୍ତେ ରଣପୁର ବିଡିଓ ରଶ୍ମିରେଖା ଦାସ ନିର୍ଦ୍ଦେଶ ଦେଇଥିଲେ। ପରେ ପଞ୍ଚାୟତ ପକ୍ଷରୁ ଗତ ଜୁଲାଇ ୨୫ରେ ନିଲାମ ହେବା ପାଇଁ ନୋଟିସ ଲଗା ଯାଇଥିଲା । ପ୍ରଶାସନିକ ଅଧିକାରୀ ନ ଆସିବାରୁ ପୋଖରୀ ନିଲାମ ବାତିଲ୍ ହୋଇଥିଲା । ଲୋକମାନେ ଅସନ୍ତୋଷ ବ୍ୟକ୍ତ କରି ଫେରିଥିଲେ । ପୁଣି ଚଳିତମାସ ୧୩ରେ ପଞ୍ଚାୟତ ପୋଖରୀ ନିଲାମ ନୋଟିସ୍ ଦେଇଥିଲା । ତାହା ପୁଣି ବାତିଲ୍ ହୋଇଥିଲା । ବାରମ୍ବାର ନିଲାମ ବାତିଲ୍ ପରେ ପଞ୍ଚାୟତବାସୀ ରଣପୁର ବିଡିଓଙ୍କୁ ଫେରାଦ ହୋଇଥିଲେ । ବିଡିଓଙ୍କ ପତ୍ରାଙ୍କ ନଂ ୧୬୮୧ରେ ଅଗଷ୍ଟ ୩୦ରେ ପୋଖରୀ ପୁଣି ନିଲାମ ହେବବୋଲି ନୋଟିସ୍ ହୋଇଥିଲା । ଶୁକ୍ରବାର ପୁଣି ପ୍ରଶାସନିକ ଅଧିକାରୀ ନ ଆସିବାରୁ ପୋଖରୀ ନିଲାମ ବାତିଲ ହେଲା । ନିଲାମ ବାତିଲ ହେବା ପ୍ରଚାର ପରେ ଚାପା ଉତ୍ତେଜନା ଦେଖା ଦେଇଥିଲା । ପଞ୍ଚାୟତ କାର୍ଯ୍ୟ ନିର୍ବାହୀ ଅଧିକାରୀ ସୁନୀଲ କୁମାର ବେହେରା କୁହନ୍ତି ବ୍ଲକ ପ୍ରଶାସନର କୌଣସି ଉଚ୍ଚ ଅଧିକାରୀ ନଆସିବାରୁ ନିଲାମ ବାରମ୍ବାର ବାତିଲ୍ କରିବାକୁ ପଡୁଥିଲା । ପଞ୍ଚାୟତବାସୀ ଧାରଣା ଦେବା ପାଇଁ ପ୍ରସ୍ତୁତ ହେବା ଓ ଉତ୍ତେଜନା ବଢ଼ିବା ଦେଖି ଅପରାହ୍ନରେ ୫ଟି ପୋଖରୀ ନିଲାମ ହୋଇଛି । ସରପଞ୍ଚ ସୌଦାମିନୀ ପ୍ରଧାନଙ୍କୁ ପଚାରିବାକୁ ସେ କହିଥିଲେ ବାରମ୍ବାର ନିଲାମ ନୋଟିସ ହୋଇଥିଲେ ମଧ୍ୟ ରାଜନୈତିକ ଚାପରେ ପୋଖରୀ ନିଲାମ ହେଉ ନଥିଲା । ଚାପା ଉତ୍ତେଜନା ପ୍ରକାଶ ପାଇବା ଓ ଆନ୍ଦୋଳନ ପାଇଁ ପ୍ରୟାସ ହେବା ଜାଣିପାରି ତରବରିଆ ପୋଖରୀ ନିଲାମ କରିଛନ୍ତି। ବିବାଦୀୟ ପୋଖରୀ ନିଲାମ ହୋଇଥିବାରୁ ଅନ୍ୟ ପୋଖରୀ ନିଲାମ କରିବାରେ ଆଉ ଅସୁବିଧା ହେବ ନାହିଁ ବୋଲି ସେ କହିଥିଲେ।
