ବାରିପଦା ଅଫିସ, ୩୦।୬- ବିଶ୍ୱ ବିଖ୍ୟାତ ପୁରୀ ରଥଯାତ୍ରା ପରେ ବାରିପଦା ସ୍ବତନ୍ତ୍ର ଗୁରୁତ୍ୱ ରଖୁଥିବାରୁ ଏହାକୁ ‘ଦ୍ୱିତୀୟ ଶ୍ରୀକ୍ଷେତ୍ର’ ମାନ୍ୟତା ପ୍ରଦାନ ଦାବି ଜୋର ଧରିଛି। ବାରିପଦା ଜଗନ୍ନାଥ ମନ୍ଦିରର ସେବାୟତମାନେ ଶନିବାର ଭୁବନେଶ୍ୱର ଯାଇ ରାଜ୍ୟ ସଚିବାଳୟଠାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସାକ୍ଷାତ କରି ଦାବି ଉପସ୍ଥାପନ କରିଛନ୍ତି। ମନ୍ଦିରର ବିଭିନ୍ନ ସମସ୍ୟା ସମ୍ପର୍କରେ ସେମାନେ ଦୃଷ୍ଟି ଆକର୍ଷଣ କରି ୧୧ ଦଫା ଦାବିପତ୍ର ଦେଇଛନ୍ତି। ପୂର୍ଣ୍ଣ କ୍ଷମତାପ୍ରାପ୍ତ ସ୍ଥାୟୀ ଦେବୋତ୍ତର ନିର୍ବାହୀ ନିଯୁକ୍ତି, ଦେବୋତ୍ତର ସମ୍ପତ୍ତିର ପୁନରୁଦ୍ଧାର ସହ ସୁରକ୍ଷା ଏବଂ ସେବାୟତମାନେ ପାଉଥିବା ସର୍ବନିମ୍ନ ମାସିକ ଭତ୍ତା ବୃଦ୍ଧି ଲାଗି ଏଥିରେ ଦାବି କରାଯାଇଛିି। ମୁଖ୍ୟମନ୍ତ୍ରୀ ଦାବିଗୁଡିକୁ ଶୁଣିବା ପରେ ଏହାକୁ ପୂରଣ କରିବା ଲାଗି ବିଚାର କରାଯିବ ବୋଲି କହିଛନ୍ତି।
ଚଳିତବର୍ଷ ରଥଯାତ୍ରା ପାଖେଇ ଆସିଥିବାରୁ ଏହା ସରିବା ପରେ ଆଗାମୀ ଜୁଲାଇ ୧୭ ତାରିଖରେ ଭୁନନେଶ୍ୱରରେ ଆଇନ ମନ୍ତ୍ରୀଙ୍କ ଅଧ୍ୟକ୍ଷତାରେ ସେବାୟତବୃନ୍ଦ, ମୟୂରଭଞ୍ଜ ଜିଲାପାଳ, ବାରିପଦା ଉପଜିଲାପାଳ ଓ ବିଭିନ୍ନ ଅଧିକାରୀଙ୍କୁ ନେଇ ଏକ ବୈଠକ ବସିବ। ଏସବୁ ପ୍ରସଙ୍ଗ ନେଇ ଆଲୋଚନା କରାଯିବ। ଦାବି ପୂରଣ ହେବା ପରେ ମୁଖ୍ୟମନ୍ତ୍ରୀ ବାରିପଦା ଆସିବେ ବୋଲି ସେବାୟତମାନଙ୍କୁ କହିଥିଲେ। ଆଲୋଚନା ବେଳେ ଆଇନ ମନ୍ତ୍ରୀ ପ୍ରତାପ ଜେନା, ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁଦାମ ମାରାଣ୍ଡି, ମନ୍ଦିର ପୂଜକ କାମେଶ୍ୱର ତ୍ରୀପାଠୀ, ବିମଳ ଲୋଚନ ଦେଓଘରିଆ, ରାଧାଶ୍ୟାମ ମହାପାତ୍ର, ଜୟନ୍ତ ତ୍ରୀପାଠୀ, ରଥ ମହାପାତ୍ର ମୃତ୍ୟୁଞ୍ଜୟ ମହାପାତ୍ର , ଚଣ୍ଡି ପ୍ରସାଦ ଦାସ, ମାଙ୍ଗାତ ସୋରେନ, ରବି ନାରାୟଣ ଦ୍ୱିବେଦୀ, ବିଜେଡି ନେତା ସୁନିଲ ଦାଶ ଓ ବାରିପଦା ପୌର ପରିଷଦର ପୂର୍ବତନ ନଗରପାଳ କୃଷ୍ଣାନନ୍ଦ ମହାନ୍ତିି ପ୍ରମୁଖ ଉପସ୍ଥିତ ଥିଲେ। ଏହି ଅବସରରେ ସେବାୟତମାନେ ମୁଖ୍ୟମନ୍ତ୍ରୀଙ୍କୁ ବାରିପଦା ଜଗନ୍ନାଥ ମନ୍ଦିରର ଜଗନ୍ନାଥ, ବଳଭଦ୍ର ଓ ସୁଭଦ୍ରାଙ୍କ ଏକ ଫଟୋଚିତ୍ର ପ୍ରଦାନ କରିଥିଲେ।
ଗତ ସାଧାରଣ ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀ ମୟୂରଭଞ୍ଜ ଗସ୍ତରେ ଆସିଥିବା ବେଳେ ଗତ ଏପ୍ରିଲ ୨୫ତାରିଖରେ ବାରିପଦା ଜଗନ୍ନାଥ ମନ୍ଦିରକୁ ଯାଇ ପୂଜାର୍ଚ୍ଚନା କରିଥିଲେ। ଏହି ସମୟରେ ସେବାୟତମାନେ ଉପରୋକ୍ତ ଦାବି ସମ୍ପର୍କରେ ତାଙ୍କୁ ଲିଖିତ ଭବେ ଜଣାଇଥିଲେ। ନିର୍ବାଚନ ପ୍ରକିୟା ଚାଲୁ ରହିଥିବାରୁ ଏ ବିଷୟରେ ପରେ ପଦକ୍ଷେପ ନିଆଯିବ ବୋଲି ମୁଖ୍ୟମନ୍ତ୍ରୀ କହିଥିଲେ ା ନିର୍ବାଚନ ସରିବା ପରେ କୌଣସି ପଦକ୍ଷେପ ନିଆ ନ ଯିବାରୁ ଗତ ୧୯ତାରଖ ପୂର୍ବାହ୍ନ ୭ରେ ସେବାୟତମାନେ ମହାପ୍ରଭୁଙ୍କ ମନ୍ଦିର ବେଢ଼ାରୁ ଭୁବନେଶ୍ୱର ଅଭିମୁଖେ ପଦଯାତ୍ରାରେ ବାହାରିଥିଲେ। ନବୀନ ନିବାସରେ ମୁଖ୍ୟମନ୍ତ୍ରୀଙ୍କୁ ଭେଟିବା ସକାଶେ ସେମାନେ ଏଭଳି ପଦକ୍ଷେପ ନେଇଥିଲେ। ବାରିପଦା ଉପଜିଲାପାଳ ଦିବ୍ୟଜ୍ୟୋତି ପରିଡ଼ା ଓ ରାଜ୍ୟ ସରକାରଙ୍କ ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ ମନ୍ତ୍ରୀ ସୁଦାମ ମାର୍ଣ୍ଡି ସେବାୟତମାନଙ୍କୁ ବୁଝାସୁଝା କରାଇ ବାଟରୁ ଫେରାଇ ଆଣିଥିଲେ। ଏବେ ବିଧାନସଭା ଅଧିବେଶନ ଆରମ୍ଭ ହୋଇଥିଲେ ମଧ୍ୟ ସେବାୟତଙ୍କ ଦାବି ଉପରେ କୌଣସି ଆଲୋଚନା ନ ହେବାରୁ ସେମାନେ ରଥଯାତ୍ରାରେ ଅସହଯୋଗ କରିବା ସହ ପୁଣି ଥରେ ଭୁବନେଶ୍ୱର ପଦଯାତ୍ରାରେ ବାହାରିବେ ବୋଲି ଚେତାବନୀ ଦେଇଥିଲେ। ଏହି ପରିପ୍ରେକ୍ଷୀରେ ଆଜିର ଆଲୋଚନା ଯଥେଷ୍ଟ ଗୁରୁତ୍ୱ ରଖୁଥିବା କୁହାଯାଇଛି।
