ପୁରୁଣା ଭୁବନେଶ୍ୱର, ୧୨ା୩ (ଡି.ଏନ.ଏ.): ଶ୍ରୀଲିଙ୍ଗରାଜ ମନ୍ଦିରରେ ଥରକୁ ଥର ପରମ୍ପରା ଭଙ୍ଗ ହେବା ନେଇ ଜନ ଅସନ୍ତୋଷ ଦେଖାଦେଇଛି। ସୋମବାର ଦୋଳପୂର୍ଣ୍ଣିମାରେ ପୁଣି ଏକ ପରମ୍ପରାରେ ବ୍ୟତିକ୍ରମ ନେଇ ବିଭିନ୍ନ ମହଲରେ ଅସନ୍ତୋଷ ପ୍ରକାଶ ପାଇଛି। ପ୍ରାତଃରୁ ଶ୍ରୀଜୀଉମାନଙ୍କର ଯଥାରୀତି ନୀତି ସମ୍ପନ୍ନ ପରେ ମନ୍ଦିରର ଉତ୍ତର ଦ୍ୱାର ନିକଟରେ ଥିବା ଦୁଇଟି ମଣ୍ଡପକୁ ଯାତ୍ରା କରିଥିଲେ। ଗୋଟିଏ ଦୋଳବେଦିରେ ଶ୍ରୀଲିଙ୍ଗରାଜ, ମା’ପାର୍ବତୀ ଏବଂ ଋଙ୍କୁଣା ଦେବୀ ଅବସ୍ଥାନ କରିଥିବାବେଳେ ଅନ୍ୟ ଦୋଳବେଦିରେ ପ୍ରଭୁ ବାସୁଦେବ ଅବସ୍ଥାନ କରିଥିଲେ। ମନ୍ଦିରରେ ବେଢାପରେ ପୂଜାର୍ଚ୍ଚନା ସାରି ସେବକମାନେ ଦିଅଁଙ୍କ ଆଜ୍ଞା ଅନୁଯାୟୀ ଶ୍ରୀଜୀଉଙ୍କୁ ଆଜ୍ଞା ପ୍ରସାଦ ଦେବା ପରେ ସେବକମାନେ ଏହି ବିଜେ କରାଇଥିଲେ। ଦୋଳବେଦିରେ ଡ଼ୋରୀ ଲାଗିବା ପରେ ଉଭୟ ଦୋଳବେଦିରେ ସକାଳଧୂପ କରାଯାଇଥିଲା। ମନ୍ଦିରରେ ଦ୍ୱିପ୍ରହର ଏବଂ ସନ୍ଧ୍ୟା ଧୂପ ସରିବା ପରେ ଉଭୟ ଦୋଳବେଦିରେ ଦ୍ୱିପ୍ରହର ଏବଂ ସନ୍ଧ୍ୟା ଧୂପ ହୋଇଥିଲା। ପରେ ଶ୍ରୀଜୀଉମାନେ ମନ୍ଦିରକୁ ପ୍ରତ୍ୟାବର୍ତ୍ତନ କରିଥିଲେ। ପରମ୍ପରା ମୁତାବକ ମନ୍ଦିରରେ ଶ୍ରୀଲିଙ୍ଗରାଜ ଏବଂ ଦୋଳଗୋବିନ୍ଦଙ୍କ ମଧ୍ୟରେ ବଚନିକା ହୋଇଥିଲା। ଉଭୟଙ୍କ ପକ୍ଷରୁ ଦୁଇଜଣ ସେବାୟତ ସଚ୍ଚିକାନ୍ତ ପୂଜାପଣ୍ଡା ଏବଂ ରମାକାନ୍ତ ପୂଜାପଣ୍ଡା ମଧ୍ୟରେ ବଚନିକା ହୋଇଥିଲା। ଏହି ଅବସରରେ ରଥଯାତ୍ରା ପାଇଁ ମନ୍ଦିର ପ୍ରଶାସନର କାର୍ଯ୍ୟନିର୍ବାହୀ ଅଧିକାରୀଙ୍କ ଉପସ୍ଥିତିରେ ତାଙ୍କୁ ରଥକାର୍ଯ୍ୟ ସମ୍ପାଦନ ପାଇଁ ଦାୟିତ୍ୱ ଅର୍ପଣ କରାଯାଇଥାଏ। ମାତ୍ର ଚଳିତବର୍ଷ ଏହି ବିଳମ୍ବିତ ରାତ୍ରିର କାର୍ଯ୍ୟକ୍ରମରେ ମନ୍ଦିର ପ୍ରଶାସନର କାର୍ଯ୍ୟନିର୍ବାହୀ ଅଧିକାରୀ ଉପସ୍ଥିତ ନ ରହି କାର୍ଯ୍ୟାଳୟର ଜଣେ କର୍ମଚାରୀଙ୍କୁ ପଠାଇଥିଲେ ଯାହା ପରମ୍ପରାରେ ବ୍ୟତିକ୍ରମ ବୋଲି ବୁଦ୍ଧିଜୀବୀମାନେ ପ୍ରକାଶ କରିଛନ୍ତି। ଏ ସମ୍ପର୍କରେ ମନ୍ଦିର ପ୍ରଶାସନ କାର୍ଯ୍ୟନିର୍ବାହୀ ଅଧିକାରୀ ପ୍ରସନ୍ନ କୁମାର ଦାଶଙ୍କୁ ପଚାରିବାରେ ଏହା ବ୍ୟତିକ୍ରମ ନୁହେଁ ଆଗରୁ ମଧ୍ୟ ଅନ୍ୟ ଅଧିକାରୀଙ୍କ ଅନୁପସ୍ଥିତିରେ ବଚନିକା ହେବା ନଜିର ରହିଛି। ଅପରପକ୍ଷେ ମୋର ଶାରୀରିକ ଅସୁସ୍ଥତା ଏବଂ ନିଷ୍ଠା ବ୍ୟତିରେକ ଉପସ୍ଥିତ ରହିବାରୁ ବଞ୍ଚତ୍ତ ହୋଇଥିଲି। ତେବେ ନିଷ୍ଠାରେ ଥିବା ମନ୍ଦିର କାର୍ଯ୍ୟାଳୟର ଅନ୍ୟ କର୍ମଚାରୀ ଉପସ୍ଥିତ ଥିଲେ।
