ନୂଆଦିଲ୍ଲୀ,୯।୯: ଦେଶର ଆର୍ଥିକ ସ୍ଥିତି ଏବେ ସଙ୍କଟ ଦେଇ ଗତି କରୁଛି। ସୃଷ୍ଟି ହୋଇଥିବା ମାନ୍ଦାବସ୍ଥାର ସିଧାସଳଖ ପ୍ରଭାବ ଅଟୋ ଶିଳ୍ପ ଉପରେ ପଡ଼ିଛି। ଇତିମଧ୍ୟରେ ଏହି ଶିଳ୍ପରେ ୩ ଲକ୍ଷ ୫୦ ହଜାର କର୍ମଚାରୀ ଛଟେଇ ହୋଇଛନ୍ତି। ଫଳରେ ବେକାର ସଂଖ୍ୟା ବଢ଼ିବାରେ ଲାଗିଛି। ଜିଏସ୍ଟି ବୃଦ୍ଧି ଯୋଗୁ ସୃଷ୍ଟି ହୋଇଥିବା ମାନ୍ଦାବସ୍ଥାର ଏହାର ପ୍ରଭାବ ବୋଲି ଅର୍ଥନୀତିଜ୍ଞ ମତପୋଷଣ କରିଛନ୍ତି। ଅଶୋକ ଲେଲାଣ୍ଡ, ମାରୁତି ସମେତ ଅନ୍ୟ କମ୍ପାନୀଗୁଡ଼ିକର କାରବାର ବହୁ ପରିମାଣରେ ହ୍ରାସ ପାଇଛି। ଅଶୋକ ଲେଲାଣ୍ଡ୍ କ୍ଷତି ଭରଣା କରିବାକୁ ସେପ୍ଟେମ୍ବର ମାସରେ ଏହାର କାରଖାନାଗୁଡ଼ିକୁ ୫ରୁ ୧୮ ଦିନ ପର୍ଯ୍ୟନ୍ତ ବନ୍ଦ ରଖିବ ବୋଲି ନିଷ୍ପତ୍ତି ନେଇଛି। ସେହିପରି ମାରୁତି ଇତି ମଧ୍ୟରେ ଏହାର ୩ ହଜାର ଅସ୍ଥାୟୀ କର୍ମଚାରୀଙ୍କୁ ଛଟେଇ କରିଛି। ଏହା ସହିତ ମାରୁତି ନିଜର ଉତ୍ପାଦନ ମଧ୍ୟ ହ୍ରାସ କରିଛି। ଗତ ୧୦ ମାସ ଧରି ଅଟୋ ଶିଳ୍ପରେ ଏଭଳି ସ୍ଥିତି ଜାରି ରହିଛି। ଅଗଷ୍ଟ ମାସରେ ବିଭିନ୍ନ ଯାନବାହନ ବିକ୍ରିରେ ୨୯ ପ୍ରତିଶତ ପର୍ଯ୍ୟନ୍ତ ହ୍ରାସ ପରିଲକ୍ଷିତ ହୋଇଛି। ଏନେଇ ଅଟୋ ଶିଳ୍ପ ପକ୍ଷରୁ ଜିଏସ୍ଟିକୁ ୨୮ରୁ ୧୮ ପ୍ରତିଶତକୁ କମ୍ କରାଇବା ପାଇଁ ଦାବି ହୋଇଛି। ସେପ୍ଟେମ୍ବର ୨୦ରେ ଗୋଆରେ ଜିଏସ୍ଟି କାଉନସେଲିଂ ବୈଠକ ହେବ। ଏହାକୁ ଉତ୍ସୁକତାର ସହିତ ଅଟୋ ଶିଳ୍ପଗୁଡ଼ିକ ଅପେକ୍ଷା କରିଛନ୍ତି। ଯଦି ଏଥିରେ ଜିଏସ୍ଟି ହ୍ରାସ ପାଇଁ ନିଷ୍ପତ୍ତି ଗ୍ରହଣ କରାଯାଏ ତେବେ ଅଟୋ ଶିଳ୍ପ ପାଇଁ ଏହା ଉପଯୋଗୀ ହେବ ବୋଲି କୁହାଯାଉଛି।
