ଯାଜପୁର ଅଫିସ,୧୮ା୧- ଦଶରଥପୁର ବ୍ଲକରେ କାର୍ଯ୍ୟ କରୁଥିବା ଭିଏଲ୍ଡବ୍ଲ୍ୟୁ ପ୍ରମୋଦ କୁମାର ମହାଳିକ ବିଭିନ୍ନ ଦୁର୍ନୀତିରେ ସମ୍ପୃକ୍ତ ଥିବା ଅଭିଯୋଗ ହୋଇଥିଲା। ଏନେଇ ତାଙ୍କ ନାମରେ ଦଶରଥପୁର ବିଡିଓ ନାରାୟଣ ଚନ୍ଦ୍ର ନାୟକ ଶୁକ୍ରବାର ମଙ୍ଗଳପୁର ଥାନାରେ ଏତଲା ଦେଇଛନ୍ତି। ସୂଚନା ଯେ, ମହାଳିକ ଏହି ବ୍ଲକ ଅଧୀନରେ ଥିବା ଗୋପାଳପୁର ପଞ୍ଚାୟତରେ ଭିଏଲ୍ଡବ୍ଲ୍ୟୁ ଭାବେ କାର୍ଯ୍ୟ କରିଥାନ୍ତି। ଉକ୍ତ ପଞ୍ଚାୟତରେ ଭତ୍ତା, ଆବାସ ଯୋଜନା ଓ ପାଇଖାନା ଇତ୍ୟାଦି ସରକାରୀ ଯୋଜନା ପ୍ରଦାନ କରିବା ପାଇଁ ହିତାଧିକାରୀଙ୍କଠାରୁ ଲାଞ୍ଚ ନେଉଥିବା ଅଭିଯୋଗ ହୋଇଥିଲା। ଏନେଇ ସମ୍ପୃକ୍ତ ପଞ୍ଚାୟତବାସୀଙ୍କ ପକ୍ଷରୁ ରାଜ୍ୟ ପଞ୍ଚାୟତିରାଜ ବିଭାଗ ନିକଟରେ ଅଭିଯୋଗ ହୋଇଥିଲା। ଏହି ଅଭିଯୋଗକୁ କେନ୍ଦ୍ରକରି ରାଜ୍ୟ ପଞ୍ଚାୟତିରାଜ ବିଭାଗ ଓ ପାନୀୟ ଜଳ ବିଭାଗ ପକ୍ଷରୁ ଦଶରଥପୁର ବିଡିଓଙ୍କୁ ଭିଏଲ୍ଡବ୍ଲ୍ୟୁ ମହାଳିକଙ୍କ ନାମରେ ଥାନାରେ ଏତଲା ଦେବା ପାଇଁ ନିର୍ଦ୍ଦେଶ ମିଳିଥିଲା। ନିର୍ଦ୍ଦେଶ ପାଇବା ପରେ ବିଡିଓ ଥାନାରେ ଏତଲା ଦେଇଥିବା ପ୍ରକାଶ କରିଛନ୍ତି। ପଞ୍ଚାୟତବାସୀଙ୍କ ଅଭିଯୋଗର ସତ୍ୟତା ଜାଣିବା ପାଇଁ ଦୁଇମାସ ତଳେ ରାଜ୍ୟର ଏକ ବିଭାଗୀୟ ଟିମ୍ ବ୍ଲକକୁ ଆସି ଘଟଣା ଉପରେ ତଦନ୍ତ କରି ଫେରି ଯାଇଥିଲେ।
