ନୂଆଦିଲ୍ଲୀ,୨୭-୮: ଦୁର୍ନୀତି ବିରୋଧରେ ନରେନ୍ଦ୍ର ମୋଦି ସରକାର ୨.୦ ଦୃଢ଼ ମନୋଭାବ ଆପଣାଇଛନ୍ତି। ସରକାରୀ ବିଭାଗରେ ବ୍ୟାପିଥିବା ଦୁର୍ନୀତିକୁ ଦୂର କରିବା ଲାଗି ଏବେ ଅଭିଯାନ ଆରମ୍ଭ ହୋଇଛି। ଦୁର୍ନୀତି ଓ ଅନ୍ୟ ମାମଲାରେ ଅଭିଯୁକ୍ତ ଅଧିକାରୀଙ୍କୁ ବିଦା କରିବା ଧାରା ଜାରି ରହଛିି। ତଦନୁଯାୟୀ, କେନ୍ଦ୍ରୀୟ ପରୋକ୍ଷ ଟିକସ ଏବଂ ସୀମା ଶୁଳ୍କ ବୋର୍ଡ(ସିବିଆଇସି)ର ୨୨ ବରିଷ୍ଠ ଅଧିକାରୀଙ୍କୁ ଚାକିରିରୁ ବିଦା କରାଯାଇଛି। ବହିଷ୍କୃତ ହୋଇଥିବା ଅଧିକାରୀମାନେ ସୁପରିନ୍ଟେଣ୍ଡେଣ୍ଟ ଓ ଏଓ ର଼୍ୟାଙ୍କର ବୋଲି ଜଣାପଡିଛି। ସେମାନଙ୍କୁ ଫଣ୍ଡାମେଣ୍ଟାଲ ରୁଲ୍ ୫୬(ଜେ) ଅଧୀନରେ ସେମାନଙ୍କୁ ଚାକିରିରୁ ବାଧ୍ୟତାମୂଳକ ଅବସର ଦିଆଯାଇଛି।
ସୂଚନାଥାଉ କି, ଗଣତନ୍ତ୍ର ଦିବସ ଅବସରରେ ଲାଲକିଲ୍ଲାରୁ ଦେଶବାସୀଙ୍କୁ ଉଦ୍ବୋଧନ ଦେଇ ପ୍ରଧାନମନ୍ତ୍ରୀ ମୋଦି କହିଥିଲେ ଯେ, କେତେକ ଦୁର୍ନୀତିଗ୍ରସ୍ତ ଅଧିକାରୀ ସଚ୍ଚୋଟ ଟିକସଦାତାଙ୍କୁ ଅଯଥା ହଇାଣ ହରକର କରୁଛନ୍ତି। ଏହି ଦୁର୍ନୀତିଗ୍ରସ୍ତ ଅଧିକାରୀମାନେ ନିଜ ଶକ୍ତିର ଅଯଥା ପ୍ରୟୋଗ କରି ଟିକସଦାତାଙ୍କୁ ସାମାନ୍ୟ ଭୁଲ୍ ପାଇଁ ଆୟକର ଅଫିସ୍କୁ ଦୌଡାଇବା ସହ ଅତ୍ୟଧିକ ମାତ୍ରାରେ ଜରିମାନା ଆଦାୟ କରୁଛନ୍ତି। ଏହି କାରଣରୁ ଟିକସଦାତାଙ୍କ ମନରେ ଭୟର ବାତାବରଣ ଖେଳିଯାଉଛି। ପ୍ରଧାନମନ୍ତ୍ରୀଙ୍କ ଭାଷଣର ୧୧ ଦିନ ଭିତରେ ସିବିଆଇସିର ୨୨ ଜଣ ଦୁର୍ନୀତିଗ୍ରସ୍ତ ଆୟକର ଅଧିକାରୀଙ୍କୁ ଚାକିରିରୁ ବିଦା କରିବା ବିଶେଷ ପ୍ରଣିଧାନଯୋଗ୍ୟ। ଉଲ୍ଲେଖ କରାଯାଇପାରେ ଯେ, ଏଥିପୂର୍ବରୁ ସରକାର ଜୁନ୍ରେ ୨୭ ଜଣ ବରିଷ୍ଠ ଭାରତୀୟ ରାଜସ୍ବ ସେବା(ଆଇଆର୍ଏସ୍) ଅଧିକାରୀଙ୍କୁ ବାଧ୍ୟତାମୂଳକ ଅବସର ଦେଇଥିଲେ। ଏଥିରେ କେନ୍ଦ୍ରୀୟ ପ୍ରତ୍ୟକ୍ଷ ଟିକସ ବୋର୍ଡ(ସିବିଡିଟି)ର ୧୨ ଜଣ ଅଧିକାରୀ ଥିଲେ। ସେହିପରି ସିବିଆଇସି ପକ୍ଷରୁ ଜୁନ୍ରେ ୧୫ଜଣ ବରିଷ୍ଠ ଅଧିକାରୀଙ୍କୁ ଚାକିରିରୁ ବିଦା କରାଯାଇସାରିଲାଣି। ବିଦା ହୋଇଥିବା ଅଧିକାରୀମାନେ ସମସ୍ତେ ପ୍ରିନ୍ସିପାଲ କମିଶନର, କମିଶନର ଓ ଡେପୁଟି କମିଶନର ର଼୍ୟାଙ୍କର ଥିଲେ। ସୂଚନାଯୋଗ୍ୟ ଯେ, ୫୦ରୁ ୫୫ବର୍ଷ ବୟସ ଅତିକ୍ରମ କରିଥିବା ଅଥବା ଚାକିରିରେ ୩୦ ବର୍ଷର କାର୍ଯ୍ୟକାଳ ଶେଷ କରିଥିବା ସରକାରୀ କର୍ମଚାରୀଙ୍କ କ୍ଷେତ୍ରରେ ଫଣ୍ଡାମେଣ୍ଟାଲ ରାଇଟ(ମୂଳ ଅଧିକାର) ନିୟମ ଲାଗୁ କରାଯାଇଥାଏ। ଏହି ନିୟମ ବଳରେ ଦୁର୍ନୀତିରେ ଲିପ୍ତ କିମ୍ବା ଅନ୍ୟ କୌଣସି କାରଣରୁ ଅଧିକାରୀ/କର୍ମଚାରୀଙ୍କୁ ସରକାର ଚାକିରିରୁ ବାଧ୍ୟତାମୂଳକ ଅବସର ଦେଇ ବିଦା କରିପାରିବେ। ଦେଶରେ ଏହି ନିୟମ ବହୁ ପୂର୍ବରୁ ଲାଗୁ ହୋଇଛି।
