ବୁକାରେଷ୍ଟ, ୧୯।୪: କୋଭିଡ୍-୧୯ କାରଣରୁ ସାରା ବିଶ୍ୱରେ ସବୁ କ୍ରୀଡ଼ା ଇଭେଣ୍ଟ ବାତିଲ ହୋଇଛି କିମ୍ବା ସ୍ଥଗିତ ରହିଛି। ଏପରି ସ୍ଥଳେ ରୁଦ୍ଧଦ୍ୱାରରେ ବା ଦର୍ଶକଙ୍କ ଅନୁପସ୍ଥିତିରେ ଟେନିସ ଟୁର୍ନାମେଣ୍ଟଗୁଡିକ ଆୟୋଜନ ପାଇଁ ଦୁଇ ଟେନିସ ତାରକା ସ୍ପେନ୍ର ରାଫାଲ ନାଡାଲ ଓ ସର୍ବିୟାରେ ନୋଭାକ ଜୋକୋଭିଚ୍ ପ୍ରସ୍ତାବ ଦେଇଥିଲେ। ତେବେ ଏହାକୁ ବିରୋଧ କରିଛନ୍ତି ରୋମାନିଆ ମହିଳା ଟେନିସ ତାରକା ସିମୋନା ହାଲେପ। ଦର୍ଶକଙ୍କ ବିନା ଟେନିସ୍ ଖେଳିବାର କିଛ ମାନେ ନାହିଁ ବୋଲି ସେ ମତ ଦେଇଛନ୍ତି। ବିନା ଦର୍ଶକରେ ଟେନିସ ଖେଳିବା ନେଇ ଜୋକୋଭିଚ୍ଙ୍କ ସହ ଆଲୋଚନା କରିଛି ବୋଲି ନାଡାଲ ବୁଧବାର କହିଥିଲେ।
ବର୍ତ୍ତମାନ ପରିସ୍ଥିତିରେ ଟେନିସ ଖେଳିବା ସମ୍ଭବ ନୁହଁ। କାରଣ ସ୍ବ୍ୟାସ୍ଥ ହେଉଛି ସବୁଠାରୁ ଗୁରୁତ୍ୱପୂର୍ଣ୍ଣ। ତେବେ ଦର୍ଶକଙ୍କ ଅନୁପସ୍ଥିତିରେ ଟେନିସ ଖେଳାଗଲେ ଆମେ ଖୁସି ହେବୁ ବୋଲି ନାଡାଲ କହିଥିଲେ। ଜୋକୋଭିଚ୍ଙ୍କ ସହ ଏ ନେଇ ଦୀର୍ଘ ସମୟ ଧରି କଥା ହୋଇଛି ବୋଲି ସେ କହିଛନ୍ତି। ଏହା ଦ୍ୱାରା ଟେନିସ୍ ତଥା କ୍ରୀଡ଼ା ଲାଭବାନ ହୋଇପାରିବ। କିନ୍ତୁ ୨୮ ବର୍ଷୀୟା ରୋମାନିଆର ଓ୍ବିମ୍ବେଲଡନ ବିଜେତା ହାଲେପ ଏହାକୁ ନାପସନ୍ଦ କରିଛନ୍ତି। ବ୍ୟକ୍ତିଗତ କ୍ରୀଡ଼ାରେ ଦର୍ଶକ ସବୁଠାରୁ ଗରୁତ୍ୱପୂର୍ଣ୍ଣ। ତେଣୁ ନାଡାଲଙ୍କ ଏହି ପ୍ରସ୍ତାବ ଗ୍ରହଣୀୟ ନୁହଁ ବୋଲି ସେ ସ୍ପଷ୍ଟ କରିଛନ୍ତି। ପୂର୍ବତନ ଓ୍ବିମ୍ବେଲଡନ ଚାମ୍ପିୟନ ଚେକ୍ଗଣରାଜ୍ୟର ପେଟ୍ରା କ୍ୱିଟୋଭା ମଧ୍ୟ ଏ ନେଇ ହାଲେପଙ୍କୁ ସମର୍ଥନ କରିଛନ୍ତି। ଟେନିସ୍ରେ ଦର୍ଶକ ତଥା ପ୍ରଶଂସକ ସବୁଠାରୁ ଗୁରତ୍ୱବହନ କରିନ୍ତି। ଖାସ୍ କରି ବ୍ୟକ୍ତିଗତ କ୍ରୀଡ଼ାରେ ଏମାନଙ୍କ ଭୂମିକା ଗୁରୁତ୍ୱପୂର୍ଣ୍ଣ କ୍ୱିଟୋଭା କହିଛନ୍ତି। ଉଲ୍ଲେଖଥାଉ କି, କରୋନ ଭାଇରସ କାରଣରୁ ଓ୍ବେମ୍ବେଲଡନ, ଫ୍ରେଞ୍ଚ୍ ଓପନକୁ ଘୁଞ୍ଚାଇ ଦିଆଯାଇଛି। ପୁଣି ବିନା ଦର୍ଶକରେ ବର୍ଷର ଅନ୍ତିମ ତଥା ଚତୁର୍ଥ ଗ୍ରାଣ୍ଡସ୍ଲାବ ୟୁଏସ୍ ଓପନ୍ ଆୟୋଜନ ହେବା ନେଇ ବିଚାର କରାଯାଉଛି।
