ବନ୍ତଳା,୨୪।୯(ଡି.ଏନ.ଏ.)
ଅନୁଗୋଳ ବ୍ଲକ ନନ୍ଦପୁର ପଞ୍ଚାୟତ ମଧୁପୁର ପୂର୍ତ୍ତ ବିଭାଗ ରାସ୍ତାକୁ ସଂଯୋଗ କରୁଥିବା ଗ୍ରାମ୍ୟ ରାସ୍ତା ୨୦୧୮ ସାମୁଦ୍ରିକ ଝଡ଼ ତିତ୍ଲିରେ ନଷ୍ଟ ହେବା ସହିତ ପୋଖରୀ ହୁଡା ମଧ୍ୟ ଭାଙ୍ଗି ଯାଇଥିଲା। ସେହି ସମୟରେ ପଞ୍ଚାୟତ ପାଣ୍ଠିରୁ ୩୦ ଟ୍ରିପ୍ ମୋରମ ଅସ୍ଥାୟୀ ଭାବେ ପକା ଯାଇଥିଲା। ପରବର୍ତ୍ତୀ ସମୟରେ ଜିଲା ଗ୍ରାମ୍ୟ ଉନ୍ନୟନ ସଂସ୍ଥା ମାଧ୍ୟମରେ ୧୦ ଲକ୍ଷ ଟଙ୍କା ଅନୁଦାନ ଆସିବା ପରେ ରାସ୍ତାର ଉନ୍ନତୀକରଣ ଓ ପୋଖରୀକୁ ସୁରକ୍ଷା ପାଇଁ ପକ୍କା କାନ୍ଥ ବ୍ୟବସ୍ଥା ହୋଇଥିଲା। ବ୍ଲକ ପ୍ରଶାସନ ପକ୍ଷରୁ କନିଷ୍ଠ ଯନ୍ତ୍ରୀଙ୍କ ନାମରେ ଆସିଥିବା ଏହି କାର୍ଯ୍ୟ ୨୦୧୯ ଜୁନରେ ଶେଷ ହୋଇଥିଲା। ପ୍ରାୟ ୬୦ ମିଟର ପକ୍କା ସୁରକ୍ଷା କାନ୍ଥ କରାଯାଇଥିଲା। କିନ୍ତୁ ବର୍ତ୍ତମାନ ଲଘୁଚାପ ଜନିତ ବର୍ଷା ଓ ପୋଖରୀରେ ପାଣି ପୂର୍ଣ୍ଣ ହୋଇଯିବା ଯୋଗୁ ପକା କାନ୍ଥ ଦବିବା ସହିତ ବିଭିନ୍ନ ଜାଗାରେ ଫାଟ ସୃଷ୍ଟି ହୋଇଛି। ଏଥିସହିତ ମାଟି ଅତଡା ଖସୁଛି। ଏପରି କ୍ଷେତ୍ରରେ କୌଣସି ମୁହୂର୍ତ୍ତରେ ପୋଖରୀ ହୁଡା ଭାଙ୍ଗିବାର ଆଶଙ୍କା ରହିଛି। ଫଳରେ ଗ୍ରାମବାସୀ ଭୟଭୀତ ଅବସ୍ଥାରେ ଅଛନ୍ତି। ଅନ୍ୟପକ୍ଷରେ ଯେଉଁ ଜାଗାରେ ପକା କାନ୍ଥ ଦିଆଯାଇଛି ସେଠାରେ ୫୦ ବର୍ଷ ପୂର୍ବରୁ ବଉଳି ନାଳ ଭାଙ୍ଗି ବିରାଟ ଘାଇ ସୃଷ୍ଟି ହୋଇଥିଲା। ତୁରନ୍ତ ଏହାକୁ ମରାମତି କରିବା ପାଇଁ ଗ୍ରାମବାସୀ ଦାବି କରିଛନ୍ତି।
