ନୂଆପଡ଼ା ଅଫିସ,୧୧ା୮
ସାଧାରଣତଃ ସରକାରୀ ଅନୁଦାନ କିମ୍ବା ପ୍ରୋତ୍ସାହନକୁ ଅପେକ୍ଷା କରିବା ଲୋକଙ୍କ ଅଭ୍ୟାସରେ ପରିଣତ ହୋଇଛି । ହେଲେ ନିଜସ୍ବ ଉଦ୍ୟମ ଏବଂ ଶ୍ରମଦାନ କରି ପାଣ୍ଠି ସଂଗ୍ରହ କରିବା ଓ ସେହି ଅର୍ଥରେ ଗରିବ ନିଃସହାୟଙ୍କୁ ସହାୟତା ପ୍ରଦାନ କରିବାର ନୂତନ କୌଶଳ ଶିଖାଇଛି ନେହେରୁ ଯୁବ କେନ୍ଦ୍ର (ଏନୱାଇକେ) । ଏନୱାଇକେ ଏବଂ ଯୁବ କ୍ଲବର ପରାମର୍ଶ କ୍ରମେ ଯୁବଗୋଷ୍ଠୀ ଶ୍ରମଦାନ କରି ସେଥିରେ ଉପାର୍ଜିତ ଅର୍ଥରେ ଗରିବ ନିଃସହାୟଙ୍କୁ ସାହାଯ୍ୟ କରିବାକୁ ଆଗେଇ ଆସିଛନ୍ତି । ନୂଆପଡ଼ା ଜିଲା କୋମନା ବ୍ଲକ ଗୋଇଜୋର ଗାଁର ଯୁବକମାନେ କେତେଜଣ ଚାଷୀଙ୍କ ଜମିରେ ତଳି ରୋଇ ପାଣ୍ଠି ସଂଗ୍ରହ କରିବା ଜିଲାରେ ଉଦାହରଣ ସୃଷ୍ଟି କରିଛି ା
ଏନୱାଇକେର ଜିଲା ସଂଯୋଜକଙ୍କ ପରାମର୍ଶ କ୍ରମେ କୋମନା ବ୍ଲକ ଅଗ୍ରେନ ଗ୍ରାମପଞ୍ଚାୟତର ଗୋଇଜୋର ଗାଁରେ ଶନିବାର ସକାଳେ ମା’ ବଞ୍ଜାରୀ ଯୁବକ ସଂଘର କର୍ମକର୍ତ୍ତାମାନେ ଏକାଠି ହୋଇଥିଲେ । ସଂଘ ନେତୃତ୍ୱରେ ଗାଁର ବହୁ ଯୁବକ ଆଗକୁ ଆସି ୨ ଚାଷୀଙ୍କ ତଳିରୁଆ କାମ କରିଥିଲେ । ସକାଳୁ ସନ୍ଧ୍ୟା ଯାଏ ସେମାନଙ୍କୁ କାମ କରିବାକୁ ପଡିଥିଲା ା ଶେଷରେ ସେମାନଙ୍କୁ ପାରିଶ୍ରମିକ ମିଳିଥିଲା ା ସେହି ଅର୍ଥକୁ ସେମାନେ ଗାଁର ଗରିବ ମହିଳା ପୁରୁଷ, ଛାତ୍ରୀଛାତ୍ରଙ୍କୁ ସହାୟତା ପ୍ରଦାନ କରିଥିଲେ। ଏହାକୁ ବିଭିନ୍ନ ମହଲରେ ସ୍ବାଗତ କରାଯାଇଥିଲା । ମା’ ବଞ୍ଜାରୀ ଯୁବକ ସଂଘର ଏପରି କାମକୁ ଉକ୍ତ ବ୍ଲକର ରୋୟାଲ କ୍ଲବ ଗନିଆରୀ, କଲାର ଯୁବକ ସଂଘ, ଅଭ୍ୟୁଦୟ ଯୁବକ ସଂଘ ଭେଲା, ସମାଜ ଦର୍ପଣ କ୍ଲବ ମାନିଗୁଡାର ଯୁବକମାନେ ଅନୁସରଣ କରିଥିଲେ । ଉକ୍ତ ଗ୍ରାମଗୁଡିକରେ ଚାଷୀମାନଙ୍କ କ୍ଷେତରେ ଶ୍ରମଦାନ କରି ତାର ପ୍ରତିବଦଳରେ ପାଣ୍ଠି ସଂଗ୍ରହ କରିବା ପାଇଁ ପଦକ୍ଷେପ ନେଇଛନ୍ତିି । ଗୋଇଜୋର ଗାଁରେ ଉକ୍ତ କାର୍ଯ୍ୟକ୍ରମର ନେତୃତ୍ୱ ନେଇଥିଲେ ଜୟତରାମ ନିଆଲ, ନବୀନ ବାଗ, ଜାତୀୟ ସ୍ବେଚ୍ଛାସେବୀ (ଏନୱାଇକେ)ସଂଗ୍ରାମ ସିଂ, ଟେକରାମ ପାଣ୍ଡେ, ଟିକେଶ୍ୱର ହଂସ, ସଂଯୁକ୍ତା ଶବର ପ୍ରମୁଖ । ଏହି କାର୍ଯ୍ୟକ୍ରମକୁ ଜିଲାବ୍ୟାପୀ କରାଯିବାକୁ ବିଭିନ୍ନ ଯୁବ ଅନୁଷ୍ଠାନଗୁଡିକୁ ପରାମର୍ଶ ଦିଆଯାଇଥିବା ଜିଲା ସଂଯୋଜକ ଆଶୀଷ କୁମାର ଠାକୁର କହିଛନ୍ତି । ଏହାଦ୍ୱାରା ପାଣ୍ଠି ସଂଗ୍ରହ କରି ଗରିବଙ୍କୁ ସହାୟତା କରିବା ସହ ସମ୍ପୃକ୍ତ ଚାଷୀଙ୍କ କାମ କମ ସମୟ ମଧ୍ୟରେ ଶେଷ ହେଉଥିବାରୁ ଚାଷୀମାନେ ମଧ୍ୟ ଖୁସି ପ୍ରକଟ କରିଛନ୍ତି ।
