ଜୁନାଗଡ଼,୨୭।୯(ଡି.ଏନ୍.ଏ.)-କଳାହାଣ୍ଡି ଜିଲା ଜୁନାଗଡ଼ ଥାନା ଅଞ୍ଚଳରେ ଘଟିଥିବା ଗଣବଳାତ୍କାର ଓ ଭିଡିଓ ଭାଇରାଲ ଘଟଣାରେ ପୀଡ଼ିତା ଗୁରୁବାର ଚାଞ୍ଚଲ୍ୟକର ବୟାନ ଦେଇଛନ୍ତି। ଏକ ୱେବ୍ ଚ୍ୟାନେଲକୁ ସାକ୍ଷାତକାର ଦେଇ ସେ କହିଛନ୍ତି, ଏହି ଘଟଣାରେ ତାଙ୍କୁ ବାଇକ୍ରେ ଲିପ୍ଟ ଦେଇଥିବା ବସ୍ ଡ୍ରାଇଭର ଧର୍ମଗଡ ବ୍ଲକ ପର୍ଲା ଗ୍ରାମର ଲଳିନ୍ଦ୍ର ଶବର ମଧ୍ୟ ସମ୍ପୃକ୍ତ ଅଛନ୍ତି। ସେ ମଧ୍ୟ ତାଙ୍କୁ ବଳାତ୍କାର କରିଛନ୍ତି। ତାଙ୍କ ଉପରେ ମଧ୍ୟ ମଧ୍ୟ କାର୍ଯ୍ୟାନୁଷ୍ଠାନ ନିଆଯାଉ। ତାଙ୍କ ସମେତ ସମସ୍ତ ଅଭିଯୁକ୍ତଙ୍କୁ ଫାଶୀ ଦିଆଯାଉ। ନଚେତ ସେ ଆତ୍ମହତ୍ୟା କରିବେ ବୋଲି ବୟାନ ଦେଇଛନ୍ତି। ଏ ସମ୍ପର୍କରେ କଳାହାଣ୍ଡି ଏସ୍ପି ବି. ଗଙ୍ଗାଧରଙ୍କୁ ପଚାରିବାରୁ ପୀଡିତାଙ୍କ ଲିଖିତ ଅଭିଯୋଗ ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯାଇଛି ବୋଲି କହିଛନ୍ତି। ଅପରପକ୍ଷେ ଉକ୍ତ ଘଟଣାର କିଛିଦିନ ପରେ ପୀଡିତା ଏପରି ବୟାନ ଦେବାକୁ ନେଇ ସାଧାରଣରେ ସନ୍ଦେହ ସୃଷ୍ଟି ହୋଇଛି।
ପ୍ରକାଶଯୋଗ୍ୟ,ଗତ ୧୪ ତାରିଖରେ ବସ୍ ଡ୍ରାଇଭର ଲଳିନ୍ଦ୍ର ତାଙ୍କୁ ବାଇକରେ ବସାଇ ଭବାନୀପାଟଣାରୁ ଘରକୁ ଆଣୁଥିଲେ। ବାଟରେ ଜୁନାଗଡ ବନମାଲୀପୁର ନିକଟ ଘନା ଜଙ୍ଗଲରେ ଉକ୍ତ ଘଟଣାଟି ଘଟିଥିଲା। ପରେ ଏହାର ଭିଡିଓ ଭାଇରାଲ ହେବା ପରେ ପୀଡିତା ଜୁନାଗଡ଼ ଥାନାରେ ଅଭିଯୋଗ କରିଥିଲେ। ଅଭିଯୋଗରେ ୬ ଜଣ ତାଙ୍କୁ ବଳାତ୍କାର କରିଥିବା ଲେଖିଥିବାବେଳେ ଡ୍ରାଇଭର ଲଲିନ୍ଦ୍ର ବଳାତ୍କାରରେ ସମ୍ପୃକ୍ତ ରହିଥିବା କଥା ଉଲ୍ଲେଖ କରି ନ ଥିଲେ। ଏବେ ପୀଡିତାଙ୍କ ଏପରି ଚାଞ୍ଚଲ୍ୟକର ବୟାନ ପରେ ପୋଲିସ ଆଗାମୀ ପଦକ୍ଷେପ କ’ଣ ନେବ ତାହା ଏବେ ଚର୍ଚ୍ଚାର ବିଷୟ ପାଲଟିଛି।
