ନୟାଗଡ଼ ଅଫିସ,୯।୧୧: ନୟାଗଡ଼ ଜିଲା ନୂଆଗାଁ ବ୍ଳକ ଜନଶକ୍ତି ନୋଡ଼ାଲ ଉଚ୍ଚ ବିଦ୍ୟାଳୟ ପରିସରରେ ମୋ ସ୍କୁଲ ଅଭିଯାନ ଆନୁକୂଲ୍ୟରେ ହୋଇଥିବା ବିଜ୍ଞାନାଗାର ଓ ଡିଜିଟାଲ ଶ୍ରେଣୀଗୃହକୁ ଶୁକ୍ରବାର ଜିଲାପାଳ ଡ. ପୋମା ଟୁଡୁ ଉଦ୍ଘାଟନ କରିଥିଲେ। ଏହି ଅବସରରେ ସେ ଛାତ୍ରୀଛାତ୍ରଙ୍କୁ ଶିକ୍ଷାର ଆବଶ୍ୟକତା ସବୁ ସମୟରେ ରହିଥିବା ନେଇ ଉପଦେଶ ଦେଇଥିଲେ। ଡିଜିଟାଲ୍ କ୍ଲାସରୁମ୍ ହେବା ଦ୍ୱାରା ପିଲାମାନେ ସମସ୍ତ ପାଠକୁ ଠିକ୍ ଭାବେ ବୁଝିପାରିବେ ଏବଂ ବିଜ୍ଞାନାଗାର ମାଧ୍ୟମରେ ଛାତ୍ରୀଛାତ୍ରମାନେ ବିଭିନ୍ନ ପରୀକ୍ଷା ନିରୀକ୍ଷା କରିପାରିବେ ବୋଲି ପ୍ରକାଶ କରିଥିଲେ। ଅନ୍ୟମାନଙ୍କ ମଧ୍ୟରେ ଏହି କାର୍ଯ୍ୟକ୍ରମରେ ପୂର୍ବତନ ପ୍ରଧାନ ଶିକ୍ଷକ ହରିହର ମିଶ୍ର, ସୁଦର୍ଶନ ବିଶ୍ୱାଳ, କୃଷ୍ଣଚନ୍ଦ୍ର ଶତପଥୀ, ରବୀନ୍ଦ୍ର ନାଥ ବିଶ୍ୱାଳ, ବଂଶୀଧର ସାହୁ, ରମେଶ ଚନ୍ଦ୍ର ବିଶ୍ୱାଳ, ଜ୍ଞାନ ପ୍ରକାଶ ବାରିକ ପ୍ରମୁଖ ପୁରାତନ ଛାତ୍ରମାନେ ଉପସ୍ଥିତ ଥିଲେ। ପ୍ରଧାନ ଶିକ୍ଷକ ତ୍ରିନାଥ ମହାପାତ୍ରଙ୍କ ସମତେ ବିଦ୍ୟାଳୟର ଅନ୍ୟ ଶିକ୍ଷକମାନେ ଉପସ୍ଥିତ ଥିଲେ।
