ପୁରୀ ଅଫିସ,୭।୨: ଭୁବନେଶ୍ୱର ବିମାନବନ୍ଦରରେ ନିର୍ମାଣାଧୀନ କୋଠାର ଛାତ ଭୁଶୁଡ଼ିବା ଘଟଣାରେ ଗିରଫ ହୋଇ ଝାରପଡ଼ା ଜେଲରେ ଥିବା ଠିକାଦାର ଦିଲୀପ ଖଟେଇଙ୍କ ବିରୋଧରେ ଆଇନଜୀବୀ ପ୍ରିୟଦର୍ଶନ ପଟ୍ଟନାୟକ ଗୁରୁବାର ଏସ୍ଡିିଜିଏମଙ୍କ କୋର୍ଟରେ ଅଭିଯୋଗ କରିଛନ୍ତି। ଏନେଇ ୱାନସିସି କେସ୍ ନଂ. ୬୯/୨୦୨୦ ରୁଜୁ ହୋଇଛି। ସେହିପରି ମୁମ୍ବାଇରେ ଅଦିନିଆ ରଥଯାତ୍ରା ଆୟୋଜନ କରିଥିବା ଇସ୍କନ ବିରୋଧରେ ମଧ୍ୟ ପଟ୍ଟନାୟକ କୋର୍ଟରେ ଅଭିଯୋଗ କରିଛନ୍ତି। ଏନେଇ ୱାନସିସି କେସ୍ ନଂ. ୬୯/୨୦୨୦ ରୁଜୁ ହୋଇଛି।
୨୦୧୫ ନବକଳେବର ସମୟରୁ ଗୁରୁବାର ପର୍ଯ୍ୟନ୍ତ ପୁରୀରେ କାର୍ଯ୍ୟ କରିଥିବା ଠିକାଦାର ଦିଲୀପଙ୍କ ସମସ୍ତ କାର୍ଯ୍ୟର ଭିଜିଲାନ୍ସ କିମ୍ବା କ୍ରାଇମ୍ବ୍ରାଞ୍ଚ ସ୍ତରୀୟ ତଦନ୍ତ ଲାଗି ପଟ୍ଟନାୟକ କୋର୍ଟରେ ପ୍ରାର୍ଥନା କରିଛନ୍ତି। ସେ ଦର୍ଶାଯାଇଛନ୍ତି ଯେ, ୨୦୧୫ ନବକଳେବର ସମୟରେ ୨ହଜାରରୁ ଊର୍ଦ୍ଧ୍ୱ କୋଟି ଟଙ୍କାର ଉନ୍ନୟନମୂଳକ କାର୍ଯ୍ୟରେ ବ୍ୟାପକ ହରିଲୁଟ୍ କରାଯାଇଛି। ଶ୍ରୀମନ୍ଦିର ଜଗମୋହନ ମରାମତି ଲାଗି ୧୦କୋଟି, ନବକଳେବର ନୂତନ କାର୍ଯ୍ୟାଳୟ ଲାଗି ୫କୋଟି, ଭକ୍ତଙ୍କ ଲାଗି ଉଦ୍ଦିଷ୍ଟ ନୂତନ ଟେଣ୍ଟ, ଟାଉନ ଥାନା ଅଧୀନ ନୀଳାଚଳ ଭକ୍ତ ନିବାସ ପାଇଁ ୧୫କୋଟି, ଅନ୍ୟାନ୍ୟ ନିର୍ମାଣ ଲାଗି ୫୦କୋଟି, ହବିଷ୍ୟାଳି କୋଠା ନିର୍ମାଣ ପାଇଁ ୩୩କୋଟି, ପୁରୁଣା ଜେଲ ରୋଡ ଭକ୍ତ ନିବାସ ଲାଗି ୨୦କୋଟି, ବହୁତଳ ପାର୍କିଂ ଲାଗି ୧୧୩ କୋଟି, ମ୍ୟୁନିସିପାଲିଟି ମାର୍କେଟ କମ୍ପେକ୍ସ ନିର୍ମାଣ ଲାଗି ୪୪କୋଟି ଟଙ୍କାର କାର୍ଯ୍ୟାଦେଶ ଠିକାଦାର ଦିଲୀପ ବିନା ଟେଣ୍ଡରରେ ପାଇଛନ୍ତି। ଦିଲୀପ ଓ କେତେଜଣ ସରକାରୀ କର୍ମଚାରୀ ମିଳିମିଶି ସରକାରୀ ଅର୍ଥ ତୋସରପାତ କରିଛନ୍ତି ବୋଲି ପଟ୍ଟନାୟକ କୋର୍ଟରେ ଦାଖଲ କରିଥିବା ଅଭିଯୋଗରେ ଦର୍ଶାଇଛନ୍ତି। ଭୁବନେଶ୍ୱର ବିମାନବନ୍ଦରର ନିର୍ମାଣାଧୀନ ଛାତ ଭୁଶୁଡ଼ିବା ଘଟଣାରୁ ସନ୍ଦେହ ହେଉଛି ଯେ, ଦିଲୀପ ଅତୀତରେ ଶ୍ରୀକ୍ଷେତ୍ରରେ କରିଥିବା ଅନେକ ସରକାରୀ କାର୍ଯ୍ୟ ମଧ୍ୟ ନିମ୍ନମାନର ହୋଇଥାଇପାରେ। ଏବେ ପୁଣି ତାଙ୍କୁ ଶ୍ରୀକ୍ଷେତ୍ର ଐତିହ୍ୟ କରିଡର ଲାଗି ବିଭିନ୍ନ ଉନ୍ନୟନମୂଳକ କାର୍ଯ୍ୟ ଦେବାକୁ ସରକାରୀ ସ୍ତରରେ ମସୁଧା ଚାଲିଛି। ଦିଲୀପ ବଡ଼ ନେତାଙ୍କ ଛତ୍ରଛାୟା ରହିିଛନ୍ତି। ଫଳରେ ପୂର୍ବରୁ ତାଙ୍କ ବିରୋଧରେ ସିଂହଦ୍ୱାର, ଟାଉନଥାନା, କୁମ୍ଭାରପଡ଼ା ଥାନାରେ ଏତଲା ଦିଆଯାଇଥିଲେ ମଧ୍ୟ କୌଣସି ମାମଲା ରୁଜୁ ହୋଇନାହିଁ। ତେଣୁ ଦିଲୀପଙ୍କ ସମସ୍ତ କାର୍ଯ୍ୟର ଭିଜିଲାନ୍ସ ଅଥବା କ୍ରାଇମବ୍ରାଞ୍ଚ ସ୍ତରୀୟ ତଦନ୍ତ କରାଯାଉ ବୋଲି ପଟ୍ଟନାୟକ କୋର୍ଟକୁ ଅନୁରୋଧ କରିଛନ୍ତି।
ଅନ୍ୟପକ୍ଷରେ ଇସ୍କନ ବିରୋଧରେ ଆଇନଜୀବୀ ପଟ୍ଟନାୟକ ଦର୍ଶାଇଛନ୍ତି ଯେ, ଇସ୍କନ ପକ୍ଷରୁ ଗତ ଜାନୁୟାରୀ ୩୦ରେ ମୁମ୍ବାଇରେ ଅଦିନିଆ ରଥଯାତ୍ରା ଆୟୋଜନ ହୋଇଥିଲା। ଏହା କୋଟି କୋଟି ଭକ୍ତଙ୍କ ଧାର୍ମିକ ଭାବନାକୁ ଆଘାତ ଦେଇଛି। ତେଣୁ ଇସ୍କନ ବିରୋଧରେ ଦୃଢ଼ କାର୍ଯ୍ୟନୁଷ୍ଠାନ ଲାଗି ସେ କୋର୍ଟକୁ ନିବେଦନ କରିଛନ୍ତି। ସେ ଦର୍ଶାଇଛନ୍ତି ଯେ, ରୀତିନୀତି, ଶାସ୍ତ୍ର, ପୁରାଣ ଅନୁଯାୟୀ ମହାପ୍ରଭୁଙ୍କ ପବିତ୍ର ରଥଯାତ୍ରା ଆଷାଢ଼ ଶୁକ୍ଲ ଦ୍ୱିତୀୟା ତିଥିରେ ହୋଇଥାଏ। କିନ୍ତୁ ଇସ୍କନ ପକ୍ଷରୁ ବିଭିନ୍ନ ସମୟରେ ରଥଯାତ୍ରା କରାଯାଉଛି। ଏହାଦ୍ୱାରା ଗୋଷ୍ଠୀ ଏବଂ ଧାର୍ମିକ ସଂଘର୍ଷ ଘଟିବା ଆଶଙ୍କା ରହିଛି। ପୂର୍ବରୁ ଏ ନେଇ ପୁରୀ ସିଂହଦ୍ୱାର ଥାନାରେ ଏତଲା ଦିଆଯାଇଛି। ତେବେ ଏହା ବାହାର ରାଜ୍ୟରେ ହୋଇଥିବାରୁ ପୋଲିସ କୌଣସି ପଦକ୍ଷେପ ନେବାକୁ କୁଣ୍ଠାବୋଧ କରୁଛିି। ତେଣୁ ଇସ୍କନ ବିରୋଧରେ ଦୃଢ଼ କାର୍ଯ୍ୟନୁଷ୍ଠାନ ଲାଗି ପଟ୍ଟନାୟକ କୋର୍ଟଙ୍କୁ ନିବେଦନ କରିଛନ୍ତି।
