ଓ୍ବାଶିଂଟନ, ୨୪ା୬: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଙ୍ଗଳବାର ଏକ ନୂଆ ଭିଜା କଟକଣା ଲଗାଇଛନ୍ତି। ପ୍ରଚଳିତ ଏଚ୍-୧ବି ଭିଜା ସମେତ ଅନ୍ୟ ଭିଜାକୁ ସେ ଅସ୍ଥାୟୀ ଭାବେ ରଦ୍ଦ କରିଛନ୍ତି। ଫଳରେ ବିଦେଶରେ ରହୁଥିବା ଅନେକ ଲୋକ ଏହାଦ୍ୱାରା ପ୍ରଭାବିତ ହେବା ଆଶଙ୍କା ଦେଖାଦେଇଛି। ତେବେ ଉପଯୁକ୍ତ ଭିଜାଧାରୀ କିମ୍ବା ଅନ୍ୟ ଆମେରିକୀୟ ଟ୍ରାଭେଲ ଡକ୍ୟୁମେଣ୍ଟ, ଆଡ୍ଭାନ୍ସ ପାରୋଲ ଥାଇ ବାହାରେ ଥିବା ଲୋକଙ୍କର କୌଣସି ଅସୁବିଧା ହେବନାହିଁ ବୋଲି କୁହାଯାଇଛି। ଜୁନ୍ ୨୪ରୁ ଏହି ଭିଜା କଟକଣା ଲାଗୁ କରାଯାଉଥିବା ବେଳେ ବର୍ଷକ ଲାଗି ଏହା ବଳବତ୍ତର ରହିବ। ଉପଯୁକ୍ତ ଭିଜା ନ ଥାଇ ଆମେରିକା ବାହାରେ ଥିବା ଛାତ୍ରୀଛାତ୍ର, ଶିକ୍ଷକ କିମ୍ବା ଛୁଟି କଟାଇବାକୁ ଯାଇଥିବା ଲୋକ ଏହାଦ୍ୱାରା ବିଶେଷ ପ୍ରଭାବିତ ହେବେ ବୋଲି ଜଣାପଡ଼ିଛି। ଏହା ସହ ନୂଆ ନିଯୁକ୍ତି କ୍ଷେତ୍ରରେ ଭିଜା ମିଳିବା କଷ୍ଟକର ହୋଇପଡ଼ିବ ବୋଲି ଜଣାପଡ଼ିଛି। ଏବେ ପ୍ରାୟ ୩ ଲକ୍ଷ ଭାରତୀୟଙ୍କ ପାଖରେ ଏଚ୍-୧ବି ଭିଜା ରହିଛି। ଆମେରିକାରେ କୁଶଳୀ କାରିଗରଙ୍କ ଆବଶ୍ୟକତା ପଡ଼ିଲେ, ଭାରତରୁ ଅଧିକ ଲୋକଙ୍କୁ ସେଠାକୁ ଯିବାକୁ ପଡ଼ପାରେ। ଫଳରେ ଏଭଳି କଟକଣା ଭାରତ ଉପରେ ସେଭଳି ପ୍ରଭାବ ପକାଇବ ନାହିଁ ବୋଲି କୁହାଯାଉଛି। ଆମେରିକା ବାର୍ଷିକ ୮୫ ହଜାର ଏଚ୍-୧ବି ଭିଜା ପ୍ରଦାନ କରିଥାଏ। ଏଥିରୁ ପ୍ରାୟ ୬୦ ହଜାର ଭିଜା ଭାରତୀୟଙ୍କୁ ମିଳିଥାଏ। ଏଥର ବେରୋଜଗାରୀ ସଂଖ୍ୟା ଅଧିକ ଯୋଗୁ ଆମେରିକା ଏଭଳି ପଦକ୍ଷେପ ଗ୍ରହଣ କରିଥିବା କୁହାଯାଉଛି। ପ୍ରଥମେ ଆମେରିକୀୟଙ୍କୁ ଅଗ୍ରାଧିକାର ଦିଆଯିବା ସ୍ବାଭାବିକ। ହେଲେ ଆଇଟି, ବିଜ୍ଞାନ ଓ କାରିଗରି କ୍ଷେତ୍ର ହେଉ କିମ୍ବା ଅନ୍ୟ କୁଶଳୀ କାରିଗରଙ୍କ କଥା ବିଚାରକୁ ନିଆଯାଏ, ଆମେରିକା ଭାରତ ଉପରେ ନିର୍ଭର କରିବା ସ୍ବାଭାବିକ। ତେଣୁ ଅଧିକରୁ ଅଧିକ ଭାରତୀୟଙ୍କୁ ଆମେରିକା ସାମିଲ କରିବାକୁ ବାଧ୍ୟ ହେବ। ଅନ୍ୟପକ୍ଷରେ ଆମେରିକାର ଏଭଳି କଟକଣାକୁ ନେଇ ପ୍ରଶ୍ନ ଉଠାଇଛନ୍ତି ଗୁଗଲ ସିଇଓ ସୁନ୍ଦର ପିଚାଇ। ସେ କଛଛନ୍ତି, ପ୍ରବାସୀଙ୍କ ଦ୍ୱାରା ଆମେରିକା ଅଧିକ ଲାଭବାନ ହେଉଥିଲା। ଆମରିକାକୁ ବିଶ୍ୱର ପ୍ରମୁଖ ଶକ୍ତି ଭାବେ ଗଢ଼ି ତୋଳିବାରେ ବାହାର ଲୋକଙ୍କ ଅବଦାନ ଅଧିକ ଥିଲା। ଏଭଳି ଟ୍ରାଭେଲ ବ୍ୟାନ୍ କେବେ ବି ଠିକ୍ ପଦକ୍ଷେପ ନୁହେଁ। ଏହା ଦ୍ୱାରା ଅନେକେ ନିଯୁକ୍ତିଭିତ୍ତିକ ଭିଜା ପାଇବାରୁ ଭାରତୀୟମାନେ ବଞ୍ଚିତ ହେବେ।
