ଦୁବାଇ, ୩୦ା୧୦ (ପି.ଟି.)-ଅଷ୍ଟ୍ରେଲିଆରେ ଆସନ୍ତା ବର୍ଷ ହେବାକୁଥିବା ଟି୨୦ ବିଶ୍ୱକପ୍ ପାଇଁ ନେଦରଲାଣ୍ଡ୍ସ ଯୋଗ୍ୟତା ଅର୍ଜନ କରିଛି। ମଙ୍ଗଳବାର ଅନୁଷ୍ଠିତ ଏକ କ୍ୱାଲିଫାଇଙ୍ଗ ପ୍ଲେ-ଅଫ୍ ମ୍ୟାଚ୍ରେ ଏହି ଦଳ ସଂଯୁକ୍ତ ଆରବ ଏମିରେଟ୍ସ (ୟୁଏଇ)କୁ ୮ ଉଇକେଟରେ ହରାଇ ଦେଇଛି। ମ୍ୟାଚ୍ରେ ସଂଯୁକ୍ତ ଆରବ ଏମିରେଟ୍ସ (ୟୁଏଇ) ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ୯ ଉଇକେଟ ବିନିମୟରେ ମାତ୍ର ୮୦ରନ କରି ପାରିଥିଲା। ନେଦରଲାଣ୍ଡ୍ସ ପକ୍ଷରୁ ବ୍ରାଣ୍ଡନ ଗ୍ରୋଭର ୪ ଉଇକେଟ ସଫଳତା ପାଇଥିବାବେଳେ ପଲ୍ ଭାନ୍ ମିକରେନ୍ ଏବଂ ଟି. ଭାନ୍ ଡର୍ ଗଗ୍ଟେନ୍ ଦୁଇଟି ଲେଖାଏଁ ଉଇକେଟ ଅକ୍ତିଆର କରିଥିଲେ। ପରେ ବ୍ୟାଟିଂ କରିଥିବା ନେଦରଲାଣ୍ଡ୍ସ ୮୧ ରନର ବିଜୟ ଲକ୍ଷ୍ୟକୁ ୧୫.୧ ଓଭରରେ ୨ ଉଇକେଟ ବିନିମୟରେ ହାସଲ କରିନେଇଥିଲା। ଦଳ ପକ୍ଷରୁ ଓପନର ବେନ୍ କୁପର ୫୩ ବଲ୍ରେ ୪୧ରନର ଏକ ଆକର୍ଷଣୀୟ ଇନିଂସ ଖେଳିଥିଲେ। ଆୟର୍ଲାଣ୍ଡ ଓ ପାପୁଆ ନ୍ୟୁ ଗିନି ପରେ ନେଦରଲାଣ୍ଡ୍ସ ତୃତୀୟ ଦଳ ଭାବେ ଟି୨୦ ବିଶ୍ୱକପ୍ରେ ସ୍ଥାନ ପାଇଛି। ଆସନ୍ତା ବର୍ଷ ଅକ୍ଟୋବରରେ ଅଷ୍ଟ୍ରେଲିଆରେ ହେବାକୁଥିବା ଏହି ଟୁର୍ନାମେଣ୍ଟର ପ୍ରଥମ ରାଉଣ୍ଡ ୮ଟି ଦଳକୁ ନେଇ ହେବ। ଏଥିଲାଗି ନେଦରଲାଣ୍ଡ୍ସ ସ୍ଥାନ ପକ୍କା କରିଛି।
