କେନ୍ଦୁଝର, ୧୮ା୭ (ସ୍ବ.ପ୍ର.)- କେନ୍ଦୁଝର ସହରରେ ଜବରଦଖଲ ସମସ୍ୟା ଦିନକୁ ଦିନ ଜଟିଳ ହୋଇ ପଡୁଛି । କିଏ ସରକାରୀ ଜମିରେ ଘରବାଡି ଜବରଦଖଲ କରିଛି ତ କିଏ ରାସ୍ତା ଘାଟ ଜବରଦଖଲ କରିଛି । ଫଳରେ ଯାତାୟାତ ଅସୁରକ୍ଷିତ ହୋଇପଡୁଛି । ସହରର ବ୍ୟସ୍ତବହୁଳ ଗାନ୍ଧୀ ଛକ ଚାରିପାଖ ଜବରଦଖଲ ହୋଇଯାଇଥିବାରୁ ରାସ୍ତା ସଙ୍କୁଚିତ ହେବା ସହ ଯାତାୟାତ ବ୍ୟାହତ ହେଉଛି। ଅନେକ ସମୟରେ ଦୁର୍ଘଟଣା ଘଟି ଧନଜୀବନ ହାନି ଘଟୁଥିଲେ ହେଁ ଏହାକୁ ଜବରଦଖଲମୁକ୍ତ କରି ପ୍ରଶସ୍ତ କରାଯାଇପାରୁ ନ ଥିବାରୁ ସାଧାରଣରେ ଅସନ୍ତୋଷ ବଢୁଛି।
ଏହି ଛକ ଦେଇ ଏନ୍ଏଚ ୪୯ ଯାଇଥିବା ବେଳେ ଛକ ଦେଇ ସହରରୁ ପାଣିକୋଇଲି-ରିମୁଳି ଯାଇଥିବା ଏନ୍ଏଚ୍ ୨୦କୁ ସଂଯୋଗ ହୋଇଛି। ଛକ ନିକଟରେ ବିପଦପୂର୍ଣ୍ଣ ଭାବେ ବଡ ବଡ ସପିଂ କମ୍ପ୍ଲେକ୍ସ ନିର୍ମାଣ ହେଉଥିବା ଯୋଗୁ ଆଗାମୀ ଦିନରେ ବିପଦ ଅଧିକ ହେବା ଆଶଙ୍କା ରହିଛି ା ବିନା ପାର୍କିଂ ଓ ଡ୍ରେନେଜ ବ୍ୟବସ୍ଥାରେ କିପରି ଟାଉନ ପ୍ଲାନିଂ ଓ ପାୈରପାଳିକା ବ୍ୟବସାୟିକ କୋଠା ନିର୍ମାଣ କରିବାକୁ ଅନୁମତି ଦେଉଛନ୍ତି ତାହାକୁ ନେଇ ନାନା ସନ୍ଦେହ ଉପୁଜିଛି। ଏଥିରେ ବ୍ୟାପକ ଅର୍ଥ କାରବାର ହୋଇଥିବାରୁ ଏହି ଛକର ଜମି ମାପଚୁପ କରିବାକୁ ଜିଲାପାଳ ହସ୍ତକ୍ଷେପ କରି ତଦନ୍ତ କରିବାକୁ ଦାବି ହେଉଛି। ସେହିପରି ଏହି ବ୍ୟସ୍ତବହୁଳ ଛକ ନିକଟରେ ଘର ନିର୍ମାଣ ପାଇଁ ସାମଗ୍ରୀ ଜମା ହୋଇ ରହିଥିବାରୁ ରାସ୍ତା ସଂକୁଚିତ ହୋଇପଡୁଛି ା ପ୍ରଶାସନ ସାଧାରଣ ଗରିବ ଛୋଟ ଛୋଟ ବେପାରୀଙ୍କୁ ରାସ୍ତା କଡ଼ରୁ ଉଚ୍ଛେଦ କରି ବାଃ ବାଃ ନେଉଥିବା ବେଳେ ଏଭଳି ବଡବଡିଆଙ୍କ ପ୍ରତି କୋହଳ ମନୋଭାବ ପ୍ରତିପୋଷଣ କରାଯାଉଛି ବୋଲି ସାମାଜିକ କର୍ମୀ ମନସୁର ଆଲାମ କହିଛନ୍ତି। ସେହିପରି ଏହି ଛକରେ ଟ୍ରାଫିକ ଅବସ୍ଥା ସଙ୍ଗିନ ଥିବା ବେଳେ ସିଗନାଲ ଟ୍ରାଫିକ ଲାଇଟ ଦୀର୍ଘ ଦିନ ହେଲା ଅଚଳ ହୋଇରହିଛି। ଏହାକୁ ସଜଡ଼ା ଯାଉ ନ ଥିବାରୁ ନାନା ସମସ୍ୟା ସୃଷ୍ଟି ହେଉଛି। ବିନା ପାର୍କିଂ ବ୍ୟବସ୍ଥାରେ ହୋଟେଲ, ବ୍ୟାଙ୍କ, ମାର୍କେଟ ଆଦି ଚାଲୁଥିବା ବେଳେ ଅନତିଦୂରରେ ତେଲ ପମ୍ପ ଟ୍ରାଫିକ ସମସ୍ୟାକୁ ଅଧିକ ଜଟିଳ କରୁଛି ବୋଲି ସହରବାସୀ ମତବ୍ୟକ୍ତ କରିଛନ୍ତି। ଏହାକୁ ପ୍ରଶାସନ ପକ୍ଷରୁ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ପରିବର୍ତ୍ତେ ପ୍ରୋତ୍ସାହିତ କରୁଥିବା ସ୍ଥାନୀୟ ଅଧିବାସୀ ଅଭିଯୋଗ କରିଛନ୍ତି।
