ଭବାନୀପାଟଣା,୩୦।୧୦(ଡି.ଏନ୍.ଏ.)- ଯେତେବେଲେ ଛୋଟ ଥିଲେ ମା’ ସେମାନକୁ ଛାଡ଼ି କେନ୍ଆଡ଼େ ପଲେଇଗଲେ। ମା’ ଚାଲିଯିବାର ବଛରେ ଉତାରୁ ବାପ୍ ଆରପାରକେ ଚାଲିଗଲେ। ପୂରାପୂରି ଏକ୍ଲା ହେଇଗଲେ ଗୁଟେ ପରିବାରର ଛୋଟ ଛୋଟ ତିନ୍ ଭାଇବହେନ୍। ଯେନ୍ ବଏସେ ମା’ବାପ୍ର ଉଢ଼ାଲେ ଲାଡ଼ଗେଲରେ ବଢ଼ବାର କଥା ସେ ବଏସେ ଛେଉଁଡ ହେଇଗଲେ ବିନୋଦ ଆର ତାକର ଦୁଇ ବହେନ୍। ବିନୋଦର ବଏସ୍ ଏହେଦେ ୧୦ ବଛର। ବହେନ୍ ଦୁଇଟାକ ଏହେଦେ ସିନାପାଲିରେ ରହୁଥିବାର ତାକର ପିଉସୀ ଘରେ ରହୁଛନ୍। ଏନ୍ତା ଗୁଟେ ଦୁଖଦ୍ ଘଟନା ଦେଖ୍ବାକେ ମିଲିଛେ କଳାହାଣ୍ଡି ଜିଲା ଧର୍ମଗଡ଼ ବ୍ଲକ ଅଂଚଲରେ।
ସୂଚ୍ନା ଅନ୍ସାରେ କଳାହାଣ୍ଡି ଜିଲା ଧର୍ମଗଡ଼ ବ୍ଲକ ଡୁମେରଗୁଡ଼ା ପଁଚେତ୍ ଅଧୀନ କେରମୁଣ୍ଡା ଗଁାର ବିନୋଦ ସାଗର(୧୦)। ସେ ଦୁନିଅଁାକେ ଭଲଭାବେ ଜାନ୍ବାର ଆଗରୁ ମା’ ସିନ୍ଦୁକା ସାଗର ତାହାକୁ ଛାଡ଼ି କେନ୍ଆଡ଼େ ପଲେଇଗଲେ। ଏନ୍ତାଥି ମାଏକିନାକେ ଝୁରି ଝୁରି ବାପ୍ ପବିତ୍ର ସାଗର ୨୦୧୪ରେ ଆରପାରକେ ଚାଲିଗଲେ। ଏନ୍ତାଥି ମା’ବାପ୍ ଛେଉଁଡ ହେଇଗଲେ ବିନୋଦ ଆର ତାକର ଦୁଇ ବହେନ୍। ପାଠ୍ପଢ଼ାରେ ତାକର ଗଏଁଠ୍ ପଡ଼ିଥିଲାବେଲେ ବିନୋଦ ବାରଦୁଆର ବୁଲୁଥିଲେ। କେତେବେଲେ କେନ୍ ଲାଗେଲେସର ଘରେ ଖାଏବାକେ ମିଲିଯାଉଥିଲା ତ ଆର କେତେବେଲେ ଖାଡ଼ା ଉପାସରେ ରହେବାକେ ପଡ଼ୁଥିଲା। ଏନ୍ତା ଉଦେଶ୍ହୀନ ଜୀବନ ବିତଉଥିବାର ବିନୋଦକେ ଭେଟିଥିଲେ ଏସ୍ସି.ଏସ୍ଟି ଓବିସି ସଂଘର କରମ୍କରତା। ସେମାନେ ଘଟନାଟାକେ ଲୁକ୍କର ନଜରକେ ଆନ୍ଲାରୁ ଜିଲା ଶିଶୁ ମଙ୍ଗଳ ସମିତିର ଅଧ୍ୟକ୍ଷକଁର ନିରଦେଶରେ ଜିଲା ଶିଶୁ ସୁରକ୍ଷା ଟିମରେ ଗୁଲାମ ହବିବୁଲ୍ଲା ଖାନ, ସୁଧାଂଶୁ ଶେଖର ମହାପାତ୍ର, ସୁଧୀର ରଞ୍ଜନ ମହାପାତ୍ର କେରମୁଣ୍ଡା ଗାଁକେ ଯାଇ ମା’ବାପ୍ ଛେଉଁଡ ବିନୋଦକୁଁ ଉଧାର କରିଥିଲେ।
