ରୂପ୍ସା, ୧୨।୮(ଡି.ଏନ.ଏ.)-କେନ୍ଦ୍ର ଓ ରାଜ୍ୟ ସରକାର ପ୍ରାଥମିକ ବିଦ୍ୟାଳୟ ସ୍ତରରେ ଛାତ୍ରୀଛାତ୍ରଙ୍କ ସୁରକ୍ଷା ପ୍ରତି ଗୁରୁତ୍ୱ ଦେଉଥିବା ବେଳେ ବିଭିନ୍ନ ସ୍ଥାନରେ ସୁରକ୍ଷିତ ଶ୍ରେଣୀଗୃହ ଅଭାବ ଏବଂ ବିଦ୍ୟାଳୟ ହତା ସାଙ୍ଗକୁ ପାଚେରି ନ ଥିବାରୁ ସମସ୍ୟା ସୃଷ୍ଟି ହେଉଛି। ବାଲେଶ୍ୱର ଜିଲା ବସ୍ତା ବ୍ଲକ ଅଞ୍ଚଳରେ ‘ସଭିଏଁ ପଢ଼ିବା, ସଭିଏଁ ବଢ଼ିବା’ କାର୍ଯ୍ୟକ୍ରମରେ ଏଭଳି ବ୍ୟତିକ୍ରମ ଦେଖିବାକୁ ମିଳିଛି। ଏହି ବ୍ଲକରେ ଅଧିକାଂଶ ବିଦ୍ୟାଳୟରେ ପାଚେରି ନଥିବାରୁ ପିଲାଙ୍କ ସୁରକ୍ଷାକୁ ଦୃଷ୍ଟିରେ ରଖି ବିଦ୍ୟାଳୟ କର୍ତ୍ତୃପକ୍ଷ ବାଡ଼ ତିଆରି କରିବାକୁ ବାଧ୍ୟ ହେଉଛନ୍ତି। ଏ ପରିକି ରାସ୍ତାକଡ ବିଦ୍ୟାଳୟର ସୁରକ୍ଷା ପ୍ରତି ଧ୍ୟାନ ଦିଆଯାଉ ନାହିଁ ା
ଏହି ବ୍ଲକରେ ଥିବା ଗଡ଼ପଦା ପ୍ରାଥମିକ ବିଦ୍ୟାଳୟ ରୂପ୍ସା-ଗଡ଼ପଦା-ନୂଆଗାଁ ମୁଖ୍ୟରାସ୍ତାକୁ ଲାଗି ରହିଛି। ଏହି ରାସ୍ତା ୬୦ନଂ. ଜାତୀୟ ରାଜପଥକୁ ଗହୀରସିମୁଳିଆ ଠାରେ ସଂଯୋଗ କରୁଛି। ସେହିପରି ମୟୂରଭଞ୍ଜର ବଡ଼ଗୁମା ରାସ୍ତାକୁ ଏହା ସଂଯୋଗ କରୁଥିବାରୁ ଦୈନନ୍ଦିନ ଶହ ଶହ ବାଇକ୍, ଭ୍ୟାନ୍, ଟ୍ରାକ୍ଟର, ଟ୍ରକ୍ ପ୍ରଭୃତି ଚଳାଚଳ କରୁଛି। ଗଡ଼ପଦା ପ୍ରାଥମିକ ବିଦ୍ୟାଳୟ ପ୍ରତିଷ୍ଠା ହେବାର ଏହାମଧ୍ୟରେ ୭୦ବର୍ଷ ବିତିଗଲାଣି। ଏହା ସତ୍ତ୍ୱେ ଏଠାରେ ପାଚେରି ନିର୍ମାଣ କରାଯାଇ ନାହଁି ା ଏକ ବ୍ୟସ୍ତବହୁଳ ରାସ୍ତାକଡରେ ଶିକ୍ଷାନୁଷ୍ଠାନ ଥିବାରୁ ଛାତ୍ରୀଛାତ୍ରଙ୍କ ସୁରକ୍ଷା ନେଇ ବିପଦ ଦେଖା ଦେଇଛି।
ବସ୍ତା ଗୋଷ୍ଠୀ ଶିକ୍ଷାଧିକାରୀଙ୍କ କାର୍ଯ୍ୟାଳୟ ଅଧୀନ ଏହି ବିଦ୍ୟାଳୟରେ ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ୧୪୬ଜଣ ପିଲା ଅଧ୍ୟୟନ କରୁଛନ୍ତି। ବିଦ୍ୟାଳୟ କର୍ତ୍ତୃପକ୍ଷ ଓ ପରିଚାଳନା କମିଟି ସଦସ୍ୟ ଏହି ରାସ୍ତା ପାର୍ଶ୍ୱ ବିଦ୍ୟାଳୟର ସୁରକ୍ଷା ଲାଗି ପାଚେରି ନିର୍ମାଣ ସକାଶେ ବାରମ୍ବାର ପ୍ରଶାସନ, ସରକାରଙ୍କ ଦୃଷ୍ଟି ଆକର୍ଷଣ କରୁଥିଲେ ମଧ୍ୟ କୌଣସି ସୁଫଳ ମିଳି ନ ଥିବା ଅଭିଯୋଗ କରିଛନ୍ତି। ଅଭିଭାବକ ଦୀପିକା ଦାସ କହିଛନ୍ତି, ରାସ୍ତା ପାର୍ଶ୍ୱ ସ୍କୁଲର ସୁରକ୍ଷା ପ୍ରଶ୍ନ ନେଇ ସମସ୍ତେ ଚିନ୍ତା କରୁଥିବା ବେଳେ ବିଭାଗୀୟ କର୍ତ୍ତୃପକ୍ଷ ନିଦାବିଷ୍ଣୁ ପାଲଟିଛନ୍ତି। ବିଦ୍ୟାଳୟ ପରିଚାଳନା କମିଟି ଚେୟାରମ୍ୟାନ ଯୁଗେନ୍ଦ୍ର କୁମାର ଦାସ କହନ୍ତି, ସ୍କୁଲରେ ପାଚେରି ନ ଥିବାରୁ ପ୍ରତିବର୍ଷ ଏସ୍ଏମ୍ସି ସଭ୍ୟାସଭ୍ୟଙ୍କ ପରାମର୍ଶକ୍ରମେ ବାଡ଼ ଘେରାଯାଏ। ବାଡ଼ ଘେରାରେ ମଧ୍ୟ ବହୁ ଅର୍ଥ ବ୍ୟୟ ହୁଏ। ବିଦ୍ୟାଳୟର ସୁରକ୍ଷା ଓ ଛାତ୍ରୀଛାତ୍ରଙ୍କ ନିରାପତ୍ତା ଦୃଷ୍ଟିରୁ ପାଚେରି ନିର୍ମାଣ ଜରୁରୀ। ଭାରପ୍ରାପ୍ତ ପ୍ରଧାନଶିକ୍ଷୟିତ୍ରୀ ଜୟନ୍ତୀ ବେହେରା କୁହନ୍ତି ଛାତ୍ରୀଛାତ୍ରଙ୍କ ସୁରକ୍ଷା ଦୃଷ୍ଟିରୁ ବିଦ୍ୟାଳୟରେ ପାଚେରି ନିର୍ମାଣ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଏଥିପାଇଁ ବିଭାଗୀୟ ଅଧିକାରୀଙ୍କୁ ବହୁବାର ଅବଗତ କରାଯାଇଛି।
