ଛତ୍ରପୁର,୨୯।୩(ଡି.ଏନ୍.ଏ.): କରୋନା ଭୟାବହତା ପରିପ୍ରେକ୍ଷୀରେ ଏହାର ମୁକାବିଲା ପାଇଁ ଗଞ୍ଜାମ ଜିଲା ପ୍ରଶାସନ ଆଗୁଆ ପଦକ୍ଷେପ ନେଇଛି। ରାଜ୍ୟ ସରକାର ଓ ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେଙ୍କ ନିର୍ଦ୍ଦେଶ କ୍ରମେ ଛତ୍ରପୁର ସହର ଓ ଗ୍ରାମାଞ୍ଚଳରେ ୨୩ଟି ଆଇସୋଲେଶନ ସେଣ୍ଟର ଖୋଲିଛି। ଛତ୍ରପୁର ଉପଖଣ୍ଡ ହସ୍ପିଟାଲ, ମୁନିସିପେଣ୍ଠ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର, ସୁନ୍ଦରପୁର, ନରେନ୍ଦ୍ରପୁର ଓ ନୋଳିଆନୂଆଗାଁ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଏବଂ ୧୮ଟି ପଞ୍ଚାୟତର ବିଭିନ୍ନ ସ୍କୁଲ କୋଠାରେ ଏହି ସେଣ୍ଟର ପ୍ରସ୍ତୁତ ହୋଇଛି। ଉକ୍ତ ସେଣ୍ଟରରେ ବେଡ୍, ଆଲୋକ, ଫ୍ୟାନ, ପାନୀୟଜଳ, ପାଇଖାନାର ବ୍ୟବସ୍ଥା ରହିଛି। ଆବଶ୍ୟକ ପଡ଼ିଲେ ବିଦେଶ ଓ ଅନ୍ୟ ରାଜ୍ୟରୁ ଫେରନ୍ତା ଲୋକଙ୍କୁ ଉକ୍ତ ଆଇସୋଲେଶନ ସେଣ୍ଟରରେ ରଖାଯାଇ ଚିକିତ୍ସାର ବ୍ୟବସ୍ଥା କରାଯିବ ବୋଲି ସୂଚନା ଦିଆଯାଇଛି। ପଞ୍ଚାୟତ ନିର୍ବାହୀ ଅଧିକାରୀ, ଅଙ୍ଗନବାଡ଼ି କର୍ମୀ, ସ୍ବାସ୍ଥ୍ୟକର୍ମୀମାନେ ଏହାର ଦାୟିତ୍ୱରେ ରହିବେ।
