କୃଷ୍ଣପ୍ରସାଦ, ୧୫ା୪ (ଡି.ଏନ.ଏ.): ମହାମାରୀ କରୋନା ଭୟ ଲାଗି ରହିଥିବାବେଳେ ପୁରୀ ଜିଲା କୃଷ୍ଣପ୍ରସାଦ ବ୍ଲକ ରାଜହଂସଠାରେ ବଙ୍ଗୋପସାଗର କୂଳ ଲଘିଂବାରେ ଲାଗିଛି। ସମୁଦ୍ର ଓ ଚିଲିକା ମଝିରେ ବାଡ ଭଳି ଥିବା ୭ଶହ ମିଟର ବାଲିବନ୍ଧ ଜୁଆର ମାଡରେ ଖାଇ ଚାଲିଛି। ଯଦି ବାଲିବନ୍ଧଟି ନଷ୍ଟ ହୋଇଯାଏ, ତେବେ ଚିଲିକାରେ ୩ୟ ମୁହାଣ ସୃଷ୍ଟି ହୋଇପାରେ ବୋଲି ସ୍ଥାନୀୟ ଲୋକେ କହିଛନ୍ତି। ସମୁଦ୍ର କୂଳ ଖାଇବା ଦ୍ୱାରା ଏହାର ନିକଟରେ ଥିବା ୧୦ରୁ ଊର୍ଦ୍ଧ୍ୱ ଗଁା ସମୁଦ୍ର ଗର୍ଭରେ ଲୀନ ହୋଇଯିବ ବୋଲି ଏଠାକାର ଲୋକେ ଆଶଙ୍କା ପ୍ରକାଶ କରିଛନ୍ତି।
କିଛିମାସ ତଳେ ମାଲେସିଆରୁ ଏକ ଜାହାଜ ସମୁଦ୍ରରେ ଯାଉଥିବା ବେଳେ ଯାନ୍ତ୍ରୀକ ତ୍ରୁଟି ଯୋଗୁ ଆସି ଖିରିସାହି ନିକଟ ରାଜହଂସ ପାଖରେ ଅଟକି ଥିଲା। ବହୁ ଚେଷ୍ଟା ପରେ ମାଲବାହୀ ଜାହାଜଟି ସଜଡା ଯାଇ କୂଳରୁ ଚାଲି ଯାଇଥିଲା। ହେଲେ କଣ୍ଟେନରଟି ଏଯାଏ ସେହିଠାରେ ପଡି ରହିଛି। ସମୁଦ୍ରର ଢେଉ ଏହି କଣ୍ଟେନରରେ ମାଡ ଖାଇ ସେଠାରେ କୂଳକୁ ଖାଇବାରେ ଲାଗିଥିବା ବ୍ରହ୍ମପୁର ଗଁାର ସଂଗ୍ରାମ ଜେନା କହିଛନ୍ତି। ପ୍ରତିଦିନ ସମୁଦ୍ରର ଢେଉ ଲଗାତର କୂଳ ଖାଇବା ଯୋଗୁ ଝାଉଁ ଗଛ ସବୁ ଉପୁଡି ପଡିଲାଣି। ସମୁଦ୍ର କୂଳ ଖାଇବାକୁ ଦେଖି ଏଠାକାର ଗ୍ରାମବାସୀ କରୋନା ଭୂତାଣୁ ରୋକିବା ଲାଗି କରାଯାଇଥିବା ଲକ୍ଡାଉନକୁ ଭୁଲି ଗଲେଣି। ଲୋକେ ଭୟଭୀତ ହୋଇ କେଉଁଠି ଆଶ୍ରୟ ନେବେ ସେହି ଚିନ୍ତାରେ ପଡିଛନ୍ତି। ଉପକୂଳ ବ୍ରହ୍ମପୁର ଗଁାର କୃଷ୍ଣଚନ୍ଦ୍ର ଜେନା କୁହନ୍ତି, ସରକାର କରୋନା ସଂକ୍ରମଣ ରୋକିବାରେ ଲାଗି ପଡିଛନ୍ତି। ହେଲେ ଏଥିପ୍ରତି ବ୍ଲକ କି ଜିଲା ପ୍ରଶାସନ କୌଣସି ଦୃଷ୍ଟି ଦେଉନାହିଁ। ଯଦି ସମୁଦ୍ର କୂଳ ଲଘିଂବା ଏହିପରି ଲାଗି ରହେ ତେବେ ବ୍ରହ୍ମପୁର, ମଏଁସା, ଖିରିସାହି ଆଦି ୧୦ରୁ ଊର୍ଦ୍ଧ୍ୱ ଗ୍ରାମ ସମୁଦ୍ରରେ ମିଶିଯିବ ଏଥିରେ ସନ୍ଦେହ ନାହିଁ।
