ବଲାଙ୍ଗୀର ଅଫିସ, ୧୦ା୪ – କରୋନା ସଂକ୍ରମଣ ଭୟ ଚାଷବାସ, କ୍ଷୁଧା, ରୋଜଗାର ଉଜାଡିବା ଆରମ୍ଭ କରିଦେଲାଣି। ଦୀର୍ଘ ୨୧ଦିନର ଲକ୍ଡାଉନ୍ ପରେ ରାଜ୍ୟ କ୍ୟାବିନେଟ୍ରେ ଆହୁରି ୧୫ଦିନ ବୃଦ୍ଧି ପାଇଁ ସୁପାରିଶ ପରେ ଅନେକଙ୍କ ଚିନ୍ତା ବଢ଼ିଯାଇଛି। ରୋଗ ସଂକ୍ରମଣ ଠୁ ଅନେକଙ୍କ ଭବିଷ୍ୟତ ଚିନ୍ତା ଭୟଙ୍କର ରୂପ ନେବାରେ ଲାଗିଛି। ବଲାଙ୍ଗୀର ଜିଲାର ଲକ୍ଷାଧିକ କେନ୍ଦୁପତ୍ର ତୋଳାଳି ଓ ବନ୍ଧେଇ ଶ୍ରମିକ ଏଭଳି ମହାଚିନ୍ତାରେ ପଡିଛନ୍ତି।
ବଲାଙ୍ଗୀର ଜିଲାରେ ୩ଟି କେନ୍ଦୁପତ୍ର ବନଖଣ୍ଡ ରହିଛି। ଏଥିରେ ପ୍ରାୟ ୧୧ଶହରୁ ଉର୍ଦ୍ଧ୍ୱ ଗ୍ରାମରେ କେନ୍ଦୁପତ୍ର ସଂଗ୍ରହ ପାଇଁ ଫଡିଘର ରହିଛି। ବିଭାଗୀୟ ପରିଚୟପତ୍ର ବଳରେ ତିନି ବନଖଣ୍ଡର ପ୍ରାୟ ୧ ଲକ୍ଷ ୩୦ ହଜାରରୁ ଊର୍ଦ୍ଧ୍ୱ ଲୋକେ କେନ୍ଦୁପତ୍ର ସଂଗ୍ରହ କରିଥାନ୍ତି। ଚଳିତବର୍ଷ ଅନିୟମିତ ବର୍ଷା ଯୋଗୁଁ ବହୁ ବିଳମ୍ବରେ ଗୋଛାକଟା ଆରମ୍ଭ ହୋଇଥିଲା। ଫେବୃୟାରୀ ତୃତୀୟ ସପ୍ତାହ ପରିବର୍ତ୍ତେ ମାର୍ଚ୍ଚ ୧୨ରୁ ଆରମ୍ଭ ହୋଇଥିତ୍ବା ଗୋଚ୍ଛାକଟାକୁ ୨୪ତାରିଖ ଦିନ ବନ୍ଦ କରିଦିଆଯାଇଥିଲା। କରୋନା ସଂକ୍ରମଣ ରୋକିବା ପାଇଁ ଲକ୍ଡାଉନ୍ ଘୋଷଣା ପରେ କେନ୍ଦୁପତ୍ର ସଂଗ୍ରହ ମଧ୍ୟ ପ୍ରଭାବିତ ହେବା ଆଶଙ୍କା ସୃଷ୍ଟି ହୋଇଛି। ମିଳିଥିବା ସୂଚନା ମୁତାବକ ଜିଲାରେ ପ୍ରାୟ ୬୦ପ୍ରତିଶତ ଗୋଚ୍ଛାକଟା ହୋଇଛି। ଗୋଛାକଟା ସମୟରୁ ୪୫ଦିନ ବ୍ୟବଧାନରେ କେନ୍ଦୁପତ୍ର ତୋଳିବା ଆରମ୍ଭ ହୋଇଥାଏ। ଏବେ ରାଜ୍ୟ ସରକାର ଲକ୍ଡାଉନ୍ ଅବଧିକୁ ବୃଦ୍ଧି କରିବାକୁ ସୁପାରିଶ କରିବା ପରେ କେନ୍ଦୁପତ୍ର ତୋଳାଳି ଓ ଶ୍ରମିକଙ୍କ ଚିନ୍ତା ବଢ଼ିଛି। ପ୍ରତିବର୍ଷ କେନ୍ଦୁପତ୍ର ତୋଳାଳିମାନେ ପରିବାର ପିଛା ୧୫ରୁ ୨୦ ହଜାର ଟଙ୍କା ପର୍ଯ୍ୟନ୍ତ ରୋଜଗାର କରିଥାନ୍ତି। ତେବେ ଅନିୟମିତ ବର୍ଷା ଓ କରୋନା ଚଳିତବର୍ଷ କେନ୍ଦୁପତ୍ର ତୋଳାଳିଙ୍କ ରୋଜଗାରରେ ପାଣି ପକାଇ ଦେଲାଣି। କରୋନା ପାଇଁ ସାମାଜିକ ଦୂରତା ବଜାୟ ରହିବା ସହ ଲୋକଙ୍କୁ ଘରେ ରହିବାକୁ ପରାମର୍ଶ ଦିଆଯାଉଛି। ଏଭଳି ସ୍ଥିତିରେ ଏହି ଗରିବ ଶ୍ରେଣୀର ଲୋକଙ୍କ ନିଶ୍ଚିତ ରୋଜଗାର ଏବେ ଅନିଶ୍ଚିତତାକୁ ଚାଲିଯାଇଛି। କେନ୍ଦୁପତ୍ର ତୋଳାଳି ଓ ବନ୍ଧେଇ ଶ୍ରମିକମାନେ ରାଜ୍ୟ ସରକାରଙ୍କ ଜନଶ୍ରୀ ବୀମା ଯୋଜନା, କେନ୍ଦୁପତ୍ର କର୍ମଚାରୀ କଲ୍ୟାଣ ପାଣ୍ଠି ବାବଦରେ ମିଳୁଥିବା ଝିଅ ବାହାଘର ସହାୟତା, ଯୁକ୍ତଦୁଇ ଉଚ୍ଚଶିକ୍ଷା ପାଇଁ ଶିକ୍ଷାବୃତ୍ତି, ସ୍ବାସ୍ଥ୍ୟ କଲ୍ୟାଣ ସହାୟତା ଓ ଅନ୍ୟ ସୁବିଧା ପାଇପାରିବେ କି ନାହିଁ ସେହି ଚିନ୍ତାରେ ପଡିଛନ୍ତି। ନିହାତି ଗରିବ ଶ୍ରେଣୀର ଲୋକଙ୍କ ନିର୍ଭରଶୀଳ ରୋଜଗାର କେନ୍ଦୁପତ୍ର ସଂଗ୍ରହ ଏବେ ଘୋର ଅନିଶ୍ଚିତତାକୁ ଠେଲି ହୋଇଯାଇଛି। ଏଭଳି ସ୍ଥିତିିକୁ ଗୁରୁତ୍ୱର ସହ ବିଚାର କରି ସରକାର ବିଧିବଦ୍ଧ ପଦକ୍ଷେପ ଗ୍ରହଣ କଲେ କେନ୍ଦୁପତ୍ର ତୋଳାଳିମାନେ ଉପକୃତ ହେବେ ବୋଲି ଜିଲା ଜଙ୍ଗଲ ସୁରକ୍ଷା ଓ ପରିଚାଳନା ଫୋରମ୍ ଆବାହକ କୁଳମଣି ସାହୁ କହିଛନ୍ତି। ଏନେଇ ଜିଲା କେନ୍ଦୁପତ୍ର ଡିଏଫ୍ଓ ରଞ୍ଜିତ ମଲ୍ଲିକଙ୍କୁ ପଚରାଯିବାରୁ ଚଳିତବର୍ଷ ପ୍ରାୟ ୮୦ ପ୍ରତିଶତ ଗୋଚ୍ଛାକଟା ହୋଇଛି। ଆଗକୁ ରାଜ୍ୟ ସରକାର କ’ଣ ନିଷ୍ପତ୍ତି ନେବେ ସେନେଇ କିଛି ବି ସୂଚନା ମିଳିନାହିଁ। ସାମାଜିକ ଦୂରତ୍ୱ ରଖି କେନ୍ଦୁପତ୍ର ତେଳା ଯାଇପାରିବ। ତେବେ ସରକାରଙ୍କ ନିର୍ଦ୍ଦେଶ ଅନୁଯାୟୀ ହିଁ ଆଗକୁ ପଦକ୍ଷେପ ନିଆଯିବ ବୋଲି ସେ କହିଛନ୍ତି।
