ଟରଣ୍ଟୋ,୨୦।୬: କରୋନା ମହାମାରୀ ଏବେ ସାରା ବିଶ୍ୱ ପାଇଁ ଚିନ୍ତାର କାରଣ ପାଲଟି ଯାଇଥିବା ବେଳେ ଏହି ସଂକ୍ରମଣର ନୂଆ ନୂଆ ଲକ୍ଷଣ ସାମ୍ନାକୁ ଆସିବାରେ ଲାଗିଛି। ଥଣ୍ଡା, ସର୍ଦ୍ଦି, ଜ୍ୱର, ଗଳା ଦରଜ ଏହାର ପ୍ରଥମ ଲକ୍ଷଣ ହୋଇଥିବା ବେଳେ ଏବେ ବିଶେଷଜ୍ଞମାନେ କହୁଛନ୍ତି ଗୋଲାପି ଆଖି ମଧ୍ୟ କରୋନା ସଂକ୍ରମଣର ପ୍ରଥମ ଲକ୍ଷଣ ହୋଇପାରେ। କାନାଡାର ଜର୍ଣ୍ଣାଲ ଅଫ୍ ଓପଥାଲମୋଲୋଜିରେ ପ୍ରକାଶିତ ଏକ ନୂଆ ଅଧ୍ୟୟନରୁ ଏହା ଜଣାପଡିଛି। ଆଖି ଫୁଲିବା ଓ ଆଖି ଗୋଲାପି ହେବା, କର୍ନିଆରେ ସମସ୍ୟା ଦେଖାଦେବା ବା ଆଖି ଲାଲ ପଡିବା କରୋନାର ପ୍ରଥମ ଲକ୍ଷଣ ବୋଲି ଗବେଷକମାନେ କହିଛନ୍ତି। ଅଲବର୍ଟାରେ ଥିବା ରୟାଲ ଆଲେକଜାଣ୍ଡର ହସ୍ପିଟାଲର ଆଇ ଇନଷ୍ଟିଚ୍ୟୁଟରେ ମାର୍ଚ୍ଚ ମାସରେ ଜଣେ ୨୯ ବର୍ଷୀୟା ମହିଳାଙ୍କ ଆଖିରେ ସମସ୍ୟା ଥିବା ଓ ନିଶ୍ୱାସ ନେବାରେ କଷ୍ଟ ଅନୁଭବ କରୁଥିବା ଦେଖାଯାଇଥିଲା। ଏହାପରେ ତାଙ୍କର ଚିକିତ୍ସା କରାଯିବାରୁ ସେ ସାମାନ୍ୟ ସୁସ୍ଥ ହୋଇଥିଲେ। ତେବେ ସେ ବିଦେଶରୁ ଫେରିଥିବା ଜଣାପଡିବା ପରେ ତାଙ୍କର କରୋନା ଟେଷ୍ଟ ହେବାରୁ ରିପୋର୍ଟ ପଜିଟିଭ ଆସିଥିଲା। ଏହାକୁ ନେଇ କାନାଡାର ୟୁନିଭର୍ସିଟି ଅଫ୍ ଅଲବର୍ଟାର ଆସିଷ୍ଟାଣ୍ଡ ପ୍ରଫେସର କାର୍ଲୋସ ସୋଲାର୍ଟେ କହିଛନ୍ତି, ସବୁଠାରୁ ଗୁରୁତ୍ୱପୂଣ୍ଣର୍’ କଥା ହେଲା ଉକ୍ତ ମହିଳାଙ୍କ ପାଖରେ ମୁଖ୍ୟ ରୋଗ ନିଶ୍ୱାସ ନେବା ନ ଥିଲା ବରଂ ଆଖି ସମସ୍ୟା ତାଙ୍କର ମୁଖ୍ୟ ରୋଗ ଥିଲା। ମହିଳାଙ୍କ ପାଖରେ କାଶ, ଜ୍ୱର ଭଳି କୌଣସି ଲକ୍ଷଣ ନ ଥିବାରୁ ସେ କରୋନାରେ ପୀଡ଼ିତ ବୋଲି ସନ୍ଦେହ କରାଯାଇ ନ ଥିଲା। ଏବେ ଉକ୍ତ ମହିଳା ଜଣଙ୍କ ସୁସ୍ଥ ହୋଇ ଯାଇଥିଲେ ମଧ୍ୟ ତାଙ୍କ ସଂସ୍ପର୍ଶରେ ଆସିଥିବା ଡାକ୍ତର ଓ ସ୍ବାସ୍ଥ୍ୟକର୍ମୀଙ୍କୁ କ୍ୱାରାଣ୍ଟାଇନରେ ରହିବାକୁ ପଡିଥିଲା। ହେଲେ ସମସ୍ତଙ୍କ ରିପୋର୍ଟ ପରେ ନେଗେଟିଭ ଆସିଥିଲା।
