ନବରଙ୍ଗପୁର,୨୫।୪(ବି.ପ୍ର.)-କେନ୍ଦୁପତ୍ର ଗୋଦାମ ଓ ରପ୍ତାନୀର ଅଭାବ ଲାଗି ନବରଙ୍ଗପୁର ଜିଲାରେ କେନ୍ଦୁପତ୍ର ସଂଗ୍ରହ ଲକ୍ଷ୍ୟଧାର୍ଯ୍ୟ ଚଳିତ ବର୍ଷ କମାଯାଇଛି। ଜିଲାରେ ଗତ ବର୍ଷ ଠାରୁ ଚଳିତ ବର୍ଷ ୧୦ ହଜାର କମ ଷ୍ଟାଣ୍ଡାର୍ଡ ବ୍ୟାଗ କେନ୍ଦୁପତ୍ର ତୋଲାଯିବ ବୋଲି ଜଣାପଡିଛି। ୨୦୧୭-୧୮ ମସିହାରେ ୫୦ ହଜାର ଷ୍ଟାଣ୍ଡାର୍ଡ ବ୍ୟାଗ କେନ୍ଦୁପତ୍ର ସଂଗ୍ରହ ହୋଇଥିଲା। ସେଥିମଧ୍ୟରୁ ୪୦ ପ୍ରତିଶତ ଷ୍ଟାଣ୍ଡାର୍ଡ ବ୍ୟାଗ କେନ୍ଦୁପତ୍ର ଗଚ୍ଛିତ ରହିଛି। ଏହାକୁ ଦୃଷ୍ଟିରେ ରଖି ଚଳିତ ବର୍ଷ ୪୦ ହଜାର ଷ୍ଟାଣ୍ଡାର୍ଡ ବ୍ୟାଗ କେନ୍ଦୁପତ୍ର ସଂଗ୍ରହ ପାଇଁ ଲକ୍ଷ୍ୟ ଧାର୍ଯ୍ୟ ରଖାଯାଇଛି। ଗତ ବର୍ଷର ବଳକା ଷ୍ଟାଣ୍ଡାର୍ଡ ବ୍ୟାଗ ପତ୍ର ଏଯାଏ ବିକ୍ରି ନହୋଇ ଗୋଦାମରେ ରହିଛି। କେନ୍ଦୁପତ୍ର ରଖିବା ପାଇଁ ସ୍ଥାନର ଅଭାବ ଲାଗି ଚଳିତ ବର୍ଷ ସଂଗ୍ରହ ଧାର୍ଯ୍ୟ କମାଯାଇଛି। ଜିଲାରେ ୧୩ଟି କେନ୍ଦୁପତ୍ର ଗୋଦାମ ରହିଛି। ଯାହାକି ଯଥେଷ୍ଟ ନୁହେଁ ବୋଲି କାର୍ଯ୍ୟାଳୟ ସତ୍ରରୁ ଜଣାପଡିଛି। ଜିଲାରେ ୩୯୩ ଫଡିକେନ୍ଦ୍ର ରହିଛି। ୭୩ ହଜାର ମହିଳା ଶ୍ରମିକ କେନ୍ଦୁପତ୍ର ତୋଳିବା ପାଇଁ ଏଯାଏ ନାମ ପଞ୍ଜିକରଣ କରିଛନ୍ତି। ଜିଲାର ୧୦ଟି ବ୍ଲକରେ ଚଳିତ ମାସ ୧୬ ତାରିଖରୁ କେନ୍ଦୁପତ୍ର ତୋଳିବା ଆରମ୍ଭ ହୋଇଛି। ଚଳିତ ବର୍ଷ କେନ୍ଦୁପତ୍ର ବିଡା ୨ ଟଙ୍କା ରହିଛି। ଶ୍ରମିକମାନେ ଯେଉଁ ଦିପଇସା ଅଧିକ ରୋଜଗାର କରିବାକୁ ଆଶା ବାନ୍ଧିଥିଲେ ଲକ୍ଷ୍ୟ ଧାର୍ଯ୍ୟ କମିବାରୁ ସେମାନଙ୍କ ରୋଜଗାର କମିବ ବୋଲି କହୁଛନ୍ତି। ଅନ୍ୟ ପକ୍ଷେ ମେଘୁଆ ଓ ଅଦିନିଆ ବର୍ଷା ଲାଗି ଫଡି ଗୁଡିକ ଓଦାଳିଆ ରହୁଛି। ଏନେଇ ପତ୍ର ଶୁଖିବାରେ ସମସ୍ୟା ମଧ୍ୟ ଦେଖା ଦେଉଛି। ଏଭଳି ସ୍ଥିତିରେ କେନ୍ଦ୍ର ପତ୍ର ତୋଳାଳିଙ୍କ ରୋଜଗାର କମିବାରେ ଲାଗୁଛି। ତୋଳାଳିମାନେ କେତେ ଫଡି ପତ୍ର ସଂଗ୍ରହ କଲେ ମୁନୁସି ତାହାର ହିସାବ ଦେବା ପରେ ତୋଳାଳିଙ୍କ ବ୍ୟାଙ୍କ ଆକାଉଁଣ୍ଟକୁ ଟଙ୍କା ସିଧାସଳଖ ପଠାଯିବାକୁ ନିୟମ ରହିଥିବା କାର୍ଯ୍ୟାଳୟ ପକ୍ଷରୁ କୁହାଯାଇଛି।
