କଟକ ଅଫିସ,୯ା୮-ଖବର ଦେବାକୁ ଓଡ଼ିଶା କ୍ରିକେଟ ଆସୋସିଏଶନ(ଓସିଏ) ଡରୁଛି। ବୟସ ଜାଲିଆତିଠାରୁ ଆରମ୍ଭ କରି ବାରମ୍ବାର ବେନିୟମ ଓ ଦୁର୍ନୀତିର ଅଭିଯୋଗ ଯୋଗୁ ଏହାର ଅଧିକାରୀମାନେ ବୋଧହୁଏ ଖବରଦାତାଙ୍କଠାରୁ ଦୂରତା ବଜାୟ ରଖୁଛନ୍ତି। ଲୁଚାଛପାରେ ସମସ୍ତ କାର୍ଯ୍ୟ ଆଗେଇ ନେଉଛନ୍ତି, ଫଳରେ ଖେଳାଳି ଓ ଖେଳର ସ୍ବାର୍ଥ ପଛରେ ପଡ଼ିଯାଉଛି। ରାଜ୍ୟ ଦଳ ଗଠନ କରାଯିବା ନେଇ କୌଣସି ଘୋଷଣାନାମା ନ କରି ଦଳ ଚୟନ ପ୍ରକ୍ରିୟା ଆରମ୍ଭ ହୋଇସାରିଲାଣି। ଏହି ସମୟରେ ଏକ ବଡ଼ ଅଭିଯୋଗ ଉଠିଛି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ)ର ଆଗାମୀ ଘରୋଇ ଟୁର୍ନାମେଣ୍ଟଗୁଡ଼ିକରେ ଖବର ସଂଗ୍ରହ କରିବା କ୍ଷେତ୍ରରୁ କ୍ରୀଡ଼ା ଖବରଦାତାମାନଙ୍କୁ ବଞ୍ଚିତ ରଖିବାକୁ ଓସିଏ ଚେଷ୍ଟା କରିଛି ବୋଲି କୁହାଯାଉଛି। ଗୁରୁବାର ବିସିସିଆଇର ମିଡ଼ିଆ ଅଧିସ୍ବୀକୃତି ନିମନ୍ତେ ଫର୍ମ ପୂରଣ କରିବାର ଅନ୍ତିମ ତାରିଖ ଥିଲା। ଏ ନେଇ ଓସିଏ ପାଖରେ ବହୁ ପୂର୍ବରୁ ସୂଚନା ଥିଲେ ମଧ୍ୟ କ୍ରୀଡ଼ା ଖବରଦାତାମାନଙ୍କୁ ଦିଆଯାଇ ନ ଥିଲା। ଏଥିପାଇଁ ରାଜ୍ୟର ଅନେକ ଗଣମାଧ୍ୟମ ପକ୍ଷରୁ ଅସନ୍ତୋଷ ପ୍ରକାଶ କରାଯାଇଛି। ଓସିଏର ଅଧିକାରୀଙ୍କ ସହ ଯୋଗାଯୋଗ କରିବାରୁ ବ୍ୟସ୍ତ ବହୁଳ ସମୟ ଭିତରେ ସୂଚନା ଦିଆଯାଇ ପାରିନାହିଁ ବୋଲି ମତ ଦେଇଛନ୍ତି। ଓସିଏ କାର୍ଯ୍ୟକାରୀ କମିଟି ଅଧ୍ୟକ୍ଷ ଧୀରେନ ପଲାଇଙ୍କୁ ପଚାରିବାରୁ ସେ କହିଥିଲେ ଯେ, ବିସିସିଆଇର ମିଡିଆ କମିଟି ସହ ଆଲୋଚନା ହୋଇଛି। ଆଗାମୀ ସପ୍ତାହରେ ୩ ଦିନ ଅତିରିକ୍ତ ସମୟ ମିଡିଆ ଅଧିସ୍ବୀକୃତି ନିମନ୍ତେ ପ୍ରଦାନ କରାଯିବ।
