ଖଇରା,୨୪।୧୦(ଡି.ଏନ.ଏ.)-ବାଲେଶ୍ୱର ଜିଲା ଖଇରା ତହସିଲ ଅଧୀନ ଶାରୀଶୂଆ ପାହାଡ କପିଳଝୁରୀ ବନ୍ଧନଟା ଏବଂ ବଗେଇପୁର ମୌଜାରେ ଚାଲିଥିବା ଖଣି ପରିବେଶ ପ୍ରତି ବିପଦ ସୃଷ୍ଟି କରୁଥିବା ଅଭିଯୋଗରେ ଜାତୀୟ ଗ୍ରୀନ ଟ୍ରିବ୍ୟୁନାଲ ପକ୍ଷରୁ ଖଣି ବ୍ୟବହାରକୁ ବନ୍ଦ ରଖିବାକୁ ନିର୍ଦ୍ଦେଶ ଦିଆଯାଇଛି ା ତଦନୁଯାୟୀ ଓଡିଶା ଆଡଭୋକେଟ ଜେନେରାଲଙ୍କ ନିର୍ଦ୍ଦେଶ କ୍ରମେ ଖଇରା ତହସିଲ ପକ୍ଷରୁ ବୁଧବାର ମାଇକ ଯୋଗେ ପ୍ରଚାର କରି ନିଲାମଧାରୀଙ୍କୁ ଏ ନେଇ ଅବଗତ କରାଯାଇଛି। ଏହା ପରଠାରୁ ଖଣି ନିଲାମଧାରୀ ଯଦି ଖଣିବ୍ୟବହାର କରନ୍ତି ସେମାନଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଚେତାଇ ଦିଆଯାଉଛି ।
ଉଲ୍ଲେଖନୀୟ ଯେ, ଶାରୀଶୁଆ ପାହାଡ ଜୈବ ସମ୍ବେଦନଶୀଳ କ୍ଷେତ୍ର ପରିସରରେ ଆସୁଥିବା ସତ୍ତ୍ୱେ ଚଞ୍ଚକତା କରି ଏଠାକାର ଖଣି ଅଞ୍ଚଳ ହାତୀଚଲାପଥ ଭିତରେ ଆସୁ ନ ଥିବା ପ୍ରମାଣପତ୍ର ହାସଲକରି କେତେକ ଖଣି ସଂସ୍ଥା ୨୦୧୮ ମାର୍ଚ୍ଚଠାରୁ ଖଣିଜ ଦ୍ରବ୍ୟ ଲୁଟି ଚାଲିଥିଲେ। ଏଠାକାର ୯୭ ଖଣି ମଧ୍ୟରୁ କାଁଭାଁ କେତୋଟି ଖଣର ନିଲାମଧାରୀ ଅର୍ଥ ପୈଠ କରିଥିଲେ। ଅନ୍ୟ ନିଲାମଧାରୀମାନେ ବେଆଇନ ଭାବେ ପଥର ଉତ୍ତୋଳନ କରିଚାଲିଥିଲେ। ଏଭଳି କାର୍ଯ୍ୟକୁ ବିରୋଧ କରି ପାହାଡତଳି ଅଞ୍ଚଳବାସୀ ଭିଟାମାଟି ଛାଡିବାକୁ ଧମକ ଦେଇଥିଲେ ା ଏହ ି ସମୟ ମଧ୍ୟରେ ୨୦ରୁ ଅଧିକ ବନ୍ୟଜନ୍ତୁ ବ୍ଲାଷ୍ଟିଂ ଭୟରେ ଗାଁକୁ ପଳାଇ ଆସି ପ୍ରାଣ ହରାଇଥିଲେ ା ପାହାଡ ସୁରକ୍ଷା ପାଇଁ ୨ଟି ସାମାଜିକ ସଂଗଠନ ରୁରାଲ ଅରଗାଇନାଇଜେନ ଫର ସୋଶିିଆଲ ଏମ୍ପାୱାରମେଣ୍ଟ ଏବଂ ଆସୋସିଏଟେଡ ସୋଶିଆଲ ସର୍ଭିସ ଏଜେନ୍ସି ଗ୍ରୀନ ଟ୍ରିବ୍ୟୁନାଲର ଦ୍ୱାରସ୍ଥ ହୋଇଥିଲେ। ଟ୍ରିବ୍ୟୁନାଲର ବିଚାରପତି ଏସ୍.ପି.ୱାଙ୍ଗଡି,ସତ୍ୟୱାନ ସିଙ୍ଗ ଗାରବବ୍ୟାଲ ଗତ ୧୬ତାରିଖରେ ଦେଇଥିବା ରାୟରେ ଖଣି ଅଞ୍ଚଳ କୁଲଡିଆ-ହଦଗଡ ଆନ୍ତଜିଲା ବନ୍ୟଜନ୍ତୁ ଚଲାପଥ କ୍ଷେତ୍ରରେ ଆସୁଥିବା ତଥା ଏହା ଜୈବ ସମ୍ବେଦନଶୀଳ ଅଞ୍ଚଳ ହୋଇଥିବା କାରଣରୁ ଏହା ଉପରେ ଡିସେମ୍ବର ୧୨ତାରିଖରେ ଆବଶ୍ୟକ ରିପୋର୍ଟ ପ୍ରଦାନ କରିବାକୁ ନିର୍ଦ୍ଦେଶ ଦେଇଥିଲେ ା ତେବେ ଟ୍ରବ୍ୟୁନାଲର ନିର୍ଦ୍ଦେଶ ସମ୍ପର୍କରେ ଖଣି ମାଲିକମାନେ ଜାଣିବା ପରେ ରାତିଦିନ ଶତାଧିକ ଟ୍ରକରେ ମାଲବୋଝେଇ କରି ବାହାରକୁ ଚାଲାଣ କରାଯାଉଥିବା ଅଭିଯୋଗ ହୋଇଥିଲା। ପ୍ରଶାସନ ପକ୍ଷରୁ ମାଇକ ପ୍ରଚାର ସତ୍ତ୍ୱେ ଖଣିରୁ ପଥର ପରିବହନ ଅବ୍ୟାହତ ଥିବା ନେଇ ପାହାଡତଳ ବାସିନ୍ଦା ଅଭିଯୋଗ କରିଛନ୍ତି ା
