ଖଇରା, ୫।୧(ଡି.ଏନ.ଏ.)-ସୋର-କୁପାରୀ ରାଜ୍ୟ ରାଜପଥର ଖଇରା ବଜାରରେ ବିପର୍ଯ୍ୟସ୍ତ ଟ୍ରାଫିକ ବ୍ୟବସ୍ଥା ଯୋଗୁ କ୍ରମାଗତ ଦୁର୍ଘଟଣା ଘଟୁଛି। ରାସ୍ତାରେ ବାଲି ଜମା ହେବା ଯୋଗୁ ଜଣେ ଛାତ୍ରୀ ଗୁରୁତର ଆହତ ହୋଇଛନ୍ତି। ଏହାର ପ୍ରତିବାଦ କରି ଶନିବାର ସ୍ଥାନୀୟ ବ୍ୟବସାୟୀ ଓ ଯାତ୍ରୀଙ୍କ ପକ୍ଷରୁ ରାସ୍ତା ଅବରୋଧ କରାଯାଇଥିଲା। ଦୀର୍ଘ ୧ଘଣ୍ଟା ଧରି ରାସ୍ତାର ଉଭୟପାର୍ଶ୍ୱରେ ଗାଡି ଅଟକି ରହିଥିଲା । ପରେ ଖଇରା ତହସିଲଦାର ପ୍ରଦୀପ ସାହୁ ଏବଂ ଅତିରିକ୍ତ ତହସିଲଦାର ବିଭାସ ରଞ୍ଜନ ପାଣିଗ୍ରାହୀ ଏବଂ ଖଇରା ପୋଲିସ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିବା ପରେ ପରିସ୍ଥିତି ସ୍ବାଭାବିକ ହୋଇଥିଲା।
ରାଜ୍ୟ ରାଜପଥ ନିର୍ମାଣ ସମୟରେ ଟ୍ରାଫିକ ବ୍ୟବସ୍ଥାକୁ ଦୃଷ୍ଟି ଦିଆଯାଇ ନ ଥିବାରୁ ରାସ୍ତାର ଦୁଇ ପାର୍ଶ୍ୱରେ ଗାଡି ପାର୍କିଂ କରାଯାଉଛି । ବିଶେଷକରି ଘର ତିଆରି ପାଇଁ କଞ୍ଚାମାଲ ସଂଗ୍ରହ କରୁଥିବା ବ୍ୟକ୍ତିମାନେ ମାସ ମାସ ଧରି ରାସ୍ତା ଉପରେ ପକାଇ ରଖୁଛନ୍ତି। ଫଳରେ ରାସ୍ତା ସଂକୁଚିତ ହେବା ସହ ଦୈନନ୍ଦିନ ଦୁର୍ଘଟଣା ଘଟିଚାଲିଛି। ବାରମ୍ବାର ଅଭିଯୋଗ ସତ୍ତ୍ୱେ ପ୍ରଶାସନିକ ଅଧିକାରୀ ଜାଣି ନ ଜାଣିଲା ଭଳି ଚୁପ୍ ହୋଇ ବସିଛନ୍ତି । ଶନିବାର ଖଇରା ହାଇସ୍କୁଲର ଅଷ୍ଟମ ଶ୍ରେଣୀ ଛାତ୍ରୀ ଅଙ୍କିତା ପ୍ରିୟଦର୍ଶନୀ ବାରିକ ସ୍କୁଲକୁ ଯାଉଥିବା ବେଳେ ଏକ ମେଡିସିନ ଷ୍ଟୋର ସମ୍ମୁଖରେ ରାସ୍ତା ଉପରେ ବାଲି ରଖାଯାଇଥିବା କାରଣରୁ ବାଇକ ଅଙ୍କିତାଙ୍କୁ ଧକ୍କା ଦେଇଥିଲା । ଏଥିରେ ସେ ଆହତ ହେବା ସହ ମୁହଁରୁ ପ୍ରବଳ ରକ୍ତସ୍ରାବ ହୋଇଥିଲା ା ଏହାର ପ୍ରତିବାଦରେ ସ୍ଥାନୀୟ ବ୍ୟବସାୟୀ ଓ ଯାତ୍ରୀ ଜୟଦେବ ବେହେରା, ସନ୍ତୋଷ ଶତ୍ପଥି, ରଞ୍ଜନ ରାଉତ, ଲକ୍ଷ୍ମୀଧର ସାହୁ, ପୂର୍ଣ୍ଣଚନ୍ଦ୍ର ମୁଖୀ, ଡମ୍ବରୁଧର ମହାନ୍ତି, ଧର୍ମେନ୍ଦ୍ର ପ୍ରଧାନ ପ୍ରମୁଖଙ୍କ ନେତୃତ୍ୱରେ ଶହ ଶହ ଲୋକ ରାସ୍ତା ଅବରୋଧରେ ସାମିଲ ହୋଇଥିଲେ ା ତହସିଲଦାର ସାହୁ ଓ ଖଇରା ଏଏସ୍ଆଇ ପ୍ରଦୀପ ମହାନ୍ତି ବଜାର କମିଟି ସହ ଆଲୋଚନା ପରେ ରାସ୍ତାକଡରୁ ବାଲିଗଦା ତଥା ବ୍ୟାନର ଫଳକ ହଟାଇବାକୁ ନିର୍ଦ୍ଦେଶ ଦେଇଥିଲେ। ଟ୍ରାଫିକ ବ୍ୟବସ୍ଥାରେ ସୁଧାର ପାଇଁ ପ୍ରତିଶ୍ରୁତି ଦେବା ପରେ ବାଇକ ଓ ବସ୍ ଚଳାଚଳ ପୂର୍ବଭଳି ଚାଲୁ ରହିଥିଲା ା
