ଭୁବନେଶ୍ୱର,୧୨।୭(ବ୍ୟୁରୋ) : କ୍ୟାପିଟାଲ ହସ୍ପିଟାଲ ଏସ୍ଏନ୍ସିୟୁ ବିଭାଗର ମହିଳା କର୍ମଚାରୀ ଅନୁପମା ନାୟକଙ୍କ ବୁଧବାର ମୃତ୍ୟୁ ଘଟିଥିଲା। ଏହାପରେ ହସ୍ପିଟାଲର ଭିତିରି ଗୁମର ପଦାକୁ ଆସିବାରେ ଲାଗିଛି। ଅନୁପମାଙ୍କୁ ଆଇସିୟୁ ଆବଶ୍ୟକ ହେଉଥିବା ବେଳେ ହସ୍ପିଟାଲ କର୍ତ୍ତୃପକ୍ଷ ଯୋଗାଇ ନ ଦେବାରୁ ମୃତ୍ୟୁ ଘଟିଥିଲା। ସବୁଠୁ ବଡ କଥା ହେଲା କ୍ୟାପିଟାଲ ହସ୍ପିଟାଲର ଆଇସିୟୁ ବେଡ ଲାଗି ପ୍ରିୟାପ୍ରୀତି ତୋଷଣରେ ଚାଲିଥିବା ଅଭିଯୋଗ ହେଉଛି। ହସ୍ପିଟାଲରେ କାର୍ଯ୍ୟ କରୁଥିବା ଉପରିସ୍ଥ ଅଧିକାରୀଙ୍କ କେହି ପରିଚିତ ବ୍ୟକ୍ତିଙ୍କୁ ଆଇସିୟୁ ଆବଶ୍ୟକ ହେଉଥିଲେ ତାହାଙ୍କୁ ବିନା ସର୍ତ୍ତରେ ମିଳୁଛି। କିନ୍ତୁ ଜଣେ ଗରିବ ଶ୍ରେଣୀର ରୋଗୀଙ୍କୁ ଆଇସିୟୁ ଆବଶ୍ୟକ ହେଉଥିଲେ ମିଳୁନାହିଁ। ଫଳରେ ଅଧିକ ଟଙ୍କା ଦେଇ ପରିବାର ଲୋକେ ରୋଗୀଙ୍କୁ ଘରୋଇ ହସ୍ପିଟାଲ ଆଇସିୟୁକୁ ନେଇ ନ ପାରି ବାଧ୍ୟରେ ଓ୍ବାର୍ଡରେ ରଖି ଚିକିତ୍ସା କରାଉଛନ୍ତି। ଏଥିଯୋଗୁ ରୋଗୀଙ୍କ ମୃତ୍ୟୁ ଘଟୁଛି। ଯାହାକୁ ନେଇ ଅନେକ ଲୋକେ ବିରୋଧ କରି ଆସୁଥିଲେ ମଧ୍ୟ କର୍ତ୍ତୃପକ୍ଷଙ୍କ ଉପରେ କିଛି ଫରକ ପଡୁନାହିଁ।
ଭୁବନେଶ୍ୱରରେ କ୍ୟାପିଟାଲ ହସ୍ପିଟାଲକୁ ପ୍ରତ୍ୟହ ଚିକିତ୍ସା ଲାଗି ବହୁ ରୋଗୀ ଆସୁଛନ୍ତି। କିନ୍ତୁ ଚିକିତ୍ସା ବଦଳରେ ଏଠାରେ ଶୋଷଣ ଚାଲିଥିବା ଅଭିଯୋଗ ହେଉଛି। ଅନେକ ସମୟରେ ଦେଖିବାକୁ ମିଳୁଛି ଯେଉଁମାନଙ୍କୁ ଆଇସିୟୁ ଅତ୍ୟନ୍ତ ଆବଶ୍ୟକ ନାହିଁ ସେମାନଙ୍କୁ ସହଜରେ ମିଳିଯାଉଛି। ଆଇସିୟୁ ଜରୁରୀ ଆବଶ୍ୟକ କରୁଥିବା ରୋଗୀଙ୍କୁ ଦିଆଯାଉନାହିଁ। ଏଭଳି ବାଛ ବିଛାର କ’ଣ ପାଇଁ ବୋଲି ଏବେ ସାଧାରଣରେ ପ୍ରଶ୍ନ ଉଠୁଛି। ଆଇସିୟୁ ପାଇଁ ମଧ୍ୟ ହସ୍ପିଟାଲରେ ମୋଟା ଅଙ୍କର ଅର୍ଥ କାରବାର ହେଉଛି। ଯେଉଁମାନେ ଅଧିକାରୀମାନଙ୍କୁ ଟଙ୍କା ଦେଇ ତୋଷ କରାଇଲେ ସେମାନଙ୍କୁ ସହଜରେ ଆଇସିୟୁ ମିଳିଯାଉଛି। ଅନ୍ୟପକ୍ଷେ କେତେଜଣ ଡାକ୍ତର ଅର୍ଥ ଦେଉଥିବା ରୋଗୀଙ୍କୁ ଆଇସିୟୁ ଯୋଗାଇ ନ ପାରିଲେ ଘରୋଇ ହସ୍ପିଟାଲକୁ ଯିବାକୁ ପ୍ରବର୍ତ୍ତାଉଛନ୍ତି। ଘରୋଇ ହସ୍ପିଟାଲ ଆଇସିୟୁକୁ ରୋଗୀଙ୍କୁ ପଠାଉଥିବା ଡାକ୍ତର ଟଙ୍କା ପାଉଛନ୍ତି। ବିଶେଷକରି ହସ୍ପିଟାଲରେ କାର୍ଯ୍ୟ କରୁଥିବା ଉପରିସ୍ଥ କର୍ମଚାରୀଙ୍କ ସମ୍ପର୍କୀୟ, ଖବରଦାତା ଓ ପୋଲିସକୁ ସହଜରେ ଆଇସିୟୁ ମିଳୁଛି। ଯଦି କେହି ଆଇସିୟୁ ବେଡରେ ଥିବେ ତାଙ୍କୁ ତୁରନ୍ତ ଅନ୍ୟ ହସ୍ପିଟାଲକୁ ଯିବାକୁ କୁହାଯାଉଛି। ଫଳରେ ଆଇସିୟୁରେ ଥିବା ରୋଗୀଙ୍କୁ ଘରୋଇ ହସ୍ପିଟାଲକୁ ସ୍ଥାନାନ୍ତର ସମୟରେ ତାଙ୍କର ମୃତ୍ୟୁ ହେଉଥିବା ଅଭିଯୋଗ ହେଉଛି। କ୍ୟାପିଟାଲ ହସ୍ପିଟାଲରେ ଆଇସିୟୁରେ ୧୧ଟି ବେଡ୍ ରହିଛି। ତେଣୁ ଜରୁରୀ ଆବଶ୍ୟକ ହେଉଥିବା ରୋଗୀଙ୍କୁ ଆଇସିୟୁ ବେଡ୍ ଦିଆଯିବାର ନିୟମ ରହିଥିଲେ ମଧ୍ୟ ତାହାକୁ କେହି ମାନୁନାହାନ୍ତି। ବେଡ୍ ଫାଙ୍କା ନାହିଁ କହି ଫେରାଇ ଦିଆଯାଉଥିବା ଅଭିଯୋଗ ହୋଇଛି। ଆଇସିୟୁ ଦାୟିତ୍ୱରେ ଥିବା ଅଧିକାରୀଙ୍କ ୧୧ ବର୍ଷ ହେବ ଚାକିରିରୁ ଅବସର ନେଇଥିଲେ ହେଁ କିଭଳି ତାଙ୍କୁ ପୁଣି ସେଠାରେ ଦାୟିତ୍ୱରେ ରଖାଯାଇଛି ତାହାକୁ ନେଇ ହସ୍ପିଟାଲର ତଳସ୍ତରର କର୍ମଚାରୀ ପ୍ରଶ୍ନ ଉଠାଇଛନ୍ତି। ଏ ନେଇ ହସ୍ପିଟାଲର ଡେପୁଟି ସୁପରିଣ୍ଟେଣ୍ଡେଣ୍ଟ ଧନଞ୍ଜୟ ଦାସଙ୍କୁ ପଚାରିବାରେ ଏଭଳି ଅଭିଯୋଗର ସତ୍ୟତା ନାହିଁ। ଯେଉଁ ରୋଗୀଙ୍କୁ ଆଇସିୟୁ ଆବଶ୍ୟକ ହେଉଛି ଫାଙ୍କା ଥିଲେ ଦିଆଯାଉଛି। ବୁଧବାର ଖାଲି ନ ଥିବାରୁ କର୍ମଚାରୀଙ୍କୁ ବେଡ ମିଳିପାରି ନ ଥିଲା ବୋଲି ସେ କହିଛନ୍ତି।
