ବେଙ୍ଗାଲୁର୍,୧୬।୫: ଏବେ କର୍ନାଟକରେ ଚାଷୀଙ୍କ ଫସଲ ହାନୀର ଆଶଙ୍କା ରହିବ ନାହିଁ। ବର୍ଷାର ଅଭାବରେ ସରକାର ଏବେ କ୍ଲାଉଡ୍ ସେଡିଂ ଦ୍ୱାରା କୃତ୍ରିମ ବର୍ଷା କରିବା ଲାଗି ଯୋଜନା କରିଛନ୍ତି। ଏଠାକାର ୩୦ଟି ଜିଲାର ୧୫୬ ତାଲୁକକୁ ମରୁଡ଼ିଗ୍ରସ୍ତ ଘୋଷଣା କରାଯାଇଛି। ରାଜ୍ୟର ୧୦୭ ତହସିଲ୍ରେ ମରୁଡି ଜାରି ରହିଛି। ସେଥିମଧ୍ୟରୁ ୪୯ ତହସିଲ୍ରେ କମ୍ ମରୁଡି ଥିବା କୁହାଯାଉଛି। ଏହାପୂର୍ବରୁ ୨୦୧୮-୧୯ରେ କର୍ନାଟକରେ ଖରିଫ୍ ଋତୁରେ ମରୁଡି ପଡ଼ିଥିଲା। ତେବେ ଚାଷୀଙ୍କ ସୁବିଧା ପାଇଁ ରାଜ୍ୟର କଂଗ୍ରେସ-ଜେଡିଏସ୍ ମେଣ୍ଟ ସରକାର ଯୋଜନା କରିଛନ୍ତି। କ୍ଲାଉଡ୍ ସେଡିଂରେ ବର୍ଷା ପାଇଁ ୮୮ କୋଟି ଟଙ୍କା ଖର୍ଚ୍ଚ ହେବ ବୋଲି କୁହାଯାଉଛି। ରାଜ୍ୟର ମରୁଡିଗସ୍ତ ଅଞ୍ଚଳ ପାଇଁ ମୁଖ୍ୟମନ୍ତ୍ରୀ କୁମାରସ୍ବାମୀ କେନ୍ଦ୍ର ସରକାରଙ୍କୁ ୨ ହଜାର ୬୪ କୋଟି ଟଙ୍କାର ଅନୁଦାନ ଯୋଗାଇ ଦେବାକୁ ଅନୁରୋଧ କରିଛନ୍ତି। କେନ୍ଦ୍ର ସରକାର ଏନେଇ ବିଚାର ବିମର୍ଷ ଜାରି ରଖିଛନ୍ତି। କ୍ଲାଲଡ୍ ସେଡିଂରେ ସିଲଭର ଆୟୋଡାଇଡ୍ ଏବଂ ଡ୍ରାଏ ଆଇସ୍ ବାୟୁମଣ୍ଡଳର ଉପର ଭାଗରେ ନେଇ ବିମାନ ଦ୍ୱାରା ପକାଯାଇଥାଏ। ଏହାଦ୍ୱାରା କୃତ୍ରିମ ବର୍ଷା ହୋଇଥାଏ। ଏହି ଜ୍ଞାନକୌଶଳର ଉପଯୋଗ ପ୍ରଥମେ ୧୯୪୭ ଫେବୃୟାରୀରେ ଅଷ୍ଟ୍ରେଲିଆରେ କରାଯାଇଥିଲା। ପରବର୍ତ୍ତୀ ସମୟରେ ଅନେକ ଦେଶରେ ଏହାର ସଫଳ ପ୍ରୟୋଗ କରାଯାଇଛି।
