ଭଦ୍ରକ ଅଫିସ,୮ା୫: ଭଦ୍ରକ ଜିଲାରେ ମୋଟ୍ ଆକ୍ରାନ୍ତଙ୍କ ସଂଖ୍ୟା ୨୩ରେ ପହଞ୍ଚିଥିବା ବେଳେ ଏହା ରେଡ୍ ଜୋନ୍ ତାଲିକାରେ ରହିଛି। ଏଥିମଧ୍ୟରୁ ପର୍ଯ୍ୟାୟକ୍ରମେ ଜିଲାର ମୋଟ ୧୨ ଜଣ ସୁସ୍ଥ ହୋଇ ଘରକୁ ଫେରିଛନ୍ତି। ପ୍ରଥମ ୩ ରୋଗୀଙ୍କୁ ବାଦ୍ ଦେଇ ଅନ୍ୟ ୧୮ ଜଣ ରୋଗୀଙ୍କ ପଶ୍ଚିମବଙ୍ଗ ଲିଙ୍କ୍ ରହିଥିବା ସୂଚନା ମିଳିଛି। ଶୁକ୍ରବାର ଚି଼ହ୍ନଟ ହୋଇଥିବା ଦୁଇ ଜଣ ସୁରଟ ଫେରନ୍ତା ବୋଲି କୁହାଯାଇଛି। କରୋନା ସଂକ୍ରମିତ ନିୟନ୍ତ୍ରଣ ଓ ଚିହ୍ନଟ ପାଇଁ ଜିଲା ପ୍ରଶାସନ ପକ୍ଷରୁ ମୋଟ୍ ୧୯ ପଞ୍ଚାୟତରେ କଣ୍ଟେନ୍ମେଣ୍ଟ୍ ଜୋନ୍ ଘୋଷଣା କରାଯାଇଥିବା ବେଳେ ୩୨ଟି ପଞ୍ଚାୟତକୁ ସର୍ଭିଲାନ୍ସ ଜୋନ୍ ଭାବେ ଚିହ୍ନଟ କରାଯାଇଛି। କଣ୍ଟେନ୍ମେଣ୍ଟ ଜୋନ୍ ମଧ୍ୟରେ ଧାମନଗର ବ୍ଲକର ୩, ବନ୍ତ ବ୍ଲକର ଗୋଟିଏ, ବାସୁଦେବପୁରର ୧୩ ଓ ତିହିଡ଼ି ବ୍ଲକର ୨ଟି ପଞ୍ଚାୟତରେ କଣ୍ଟେନ୍ମେଣ୍ଟ୍ ଜୋନ୍ ଘୋଷଣା କରାଯାଇ ଏହି ସବୁ ପଞ୍ଚାୟତର ପ୍ରବେଶ ପଥକୁ ସିଲ୍ କରାଯାଇଛି। ମୁଖ୍ୟତଃ ଏହି ଜିଲାରେ କୋଲକାତା ଫେରନ୍ତାଙ୍କ ପାଇଁ କରୋନା ସଂକ୍ରମଣ ହେଉଥିବା କୁହାଯାଉଥିଲା। ଏବେ ସୁରଟ ଫେରନ୍ତାଙ୍କ ପାଇଁ ପ୍ରଶାସନର ମୁଣ୍ଡ ବ୍ୟଥା ବଢ଼ିଯାଇଛି।
ସୂଚନାଯୋଗ୍ୟ, ଜିଲାରୁ ମୋଟ୍ ୪୫୦୦ ସ୍ବାବ୍ ସଂଗ୍ରହ ହୋଇଥିବା ବେଳେ ବର୍ତ୍ତମାନ ସୁଦ୍ଧା ୩୭୬୦ ନେଗେଟିଭ୍ ରିପୋର୍ଟ ଆସିଥିବା ସୂଚନା ମିଳିଛି।
