ବରଗଡ଼ ଅଫିସ୍,୧୬।୫: କରୋନା (କୋଭିଡ୍-୧୯) ଭୂତାଣୁ ସଂକ୍ରମଣ ନେଇ ସମଗ୍ର ମାନବ ସମାଜ ଆଜି ଆତଙ୍କିତ । ଏହାର ସଫଳ ସମାଧାନର ବାଟ ଏପର୍ଯ୍ୟନ୍ତ ଫିଟି ପାରି ନାହିଁ । ଏଭଳିସ୍ଥଳେ ବରଗଡ଼ ଜିଲା ବରପାଲି ବ୍ଲକ ଅନ୍ତର୍ଗତ ଭଟିଗାଁର ବୀରେନ୍ଦ୍ର ବିବସ୍ବାନ ସିଂହ ତାଙ୍କ ଏକ କଳାକୃତିରେ କରୋନା ସଂକ୍ରମଣର ବାସ୍ତବତାକୁ ଫୁଟାଇ ନିଜ ପ୍ରତିଭାକୁ ସଭିଁଙ୍କ ସମ୍ମୁଖରେ ଉପସ୍ଥାପନ କରି ପାରିଛନ୍ତି । କେବଳ ସେତିକି ନୁହେଁ, ଆନ୍ତର୍ଜାତୀୟ ଅନୁଷ୍ଠାନ ବିନ୍ଦାସ ଆର୍ଟସ୍ ଗ୍ରୁପ(ବିଏଜି) ଦ୍ୱାରା କରୋନାକୁ ନେଇ ଆୟୋଜିତ ପ୍ରତିଯୋଗିତାରେ ତାଙ୍କର ଏହି କଳାକୃତି ପ୍ରଥମ ୫୦ଜଣଙ୍କ ମଧ୍ୟରେ ଗୋଲ୍ଡ କାଟେଗୋରିରେ ସ୍ଥାନ ପାଇ ରାଜ୍ୟ ପାଇଁ ଗୌରବ ଆଣି ପାରିଛି । ପ୍ରବଚକ ଦୀପ୍ତି କୁମାର ସିଂହ ଏବଂ ମୃଦୁଳା ସିଂହଙ୍କ ପୁଅ ବୀରେନ୍ଦ୍ରଙ୍କ ସେହି କଳାକୃତିର ନାମ ବ୍ଲାଇଣ୍ଡ୍ ଅପ୍ଟିମିଜିମ୍ ଅର୍ଥାତ୍ ଅନ୍ଧ ସମାଜ । ଯାହା ବାସ୍ତବତାଠାରୁ ବହୁ ଦୂରରେ। ଏହି ଭାବନାକୁ ସେ ତାଙ୍କ କଳାକୃତିରେ ନିଖୁଣ ଭାବେ ଫୁଟାଇ ପାରିଛନ୍ତି। କଳାକୃତିରେ କରୋନା ଭୂତାଣୁର ଜୀବନ୍ତ ବୋମା ଉପରେ ଠିଆ ହୋଇଛି ଏକ ଘରଚଟିଆ । ବୋମାର ତାଲା ଖୋଲି ଚାବିଟି ଧରିଛି ଥଣ୍ଟରେ। ଜଣା ନାହିଁ, ପରିଣାମ କଣ ହେବାକୁ ଯାଉଛି । କେଉଁ ମୂହୂର୍ତ୍ତରେ ବିସ୍ଫୋରଣ ହୋଇପାରେ। ବାସ୍ତବତାକୁ ଆଖି ବୁଜି ଆଜି ମାନବ ସମାଜ ଏହି ସ୍ଥିତିରେ ପହଞ୍ଚି ସାରିଛି । ସାମ୍ପ୍ରତିକ ପରିସ୍ଥିତିର ଏକ ବାସ୍ତବ ଆକଳନ ଚିତ୍ରରେ ଚିତ୍ରଣ କରାଯାଇଛି। ବୀରେନ୍ଦ୍ର ବିବସ୍ବାନ ପୂର୍ବତନ ବରଗଡ଼ ଏମପି ଡଃ ପ୍ରଭାସ କୁମାର ସିଂହଙ୍କ ପୁତୁରା ଅଟନ୍ତି । ତାଙ୍କ ଏହି କଳାକ୍ଷେତ୍ରରେ ଅନ୍ତର୍ନିହିତ ପ୍ରତିଭାର ବିକାଶ ତଥା ଅଗ୍ରଗତି ପାଇଁ ପୂର୍ବତନ ଏମ୍ପି ଡଃ ସିଂହ ଏବଂ ସ୍ତ୍ରୀ ମଞ୍ଜୁଶ୍ରୀଙ୍କ ଯଥେଷ୍ଟ ଅବଦାନ ଓ ପ୍ରେରଣା ରହିଛି । ବୀରେନ୍ଦ୍ର ବିବସ୍ବାନ ବର୍ତ୍ତମାନ ସୁନ୍ଦରଗଡ଼ସ୍ଥିତ କଳାୟତନ କଲେଜ ଅଫ୍ ଆର୍ଟସ୍ ଆଣ୍ଡ୍ କ୍ରାଫ୍ଟସରେ ଅଧ୍ୟାପକ ଭାବେ କାର୍ଯ୍ୟରତ ଥିବାବେଳେ ବିଭିନ୍ନ ରାଜ୍ୟ, ଜାତୀୟସ୍ତରୀୟ କର୍ମଶାଳା, ପ୍ରଦର୍ଶନୀରେ ଯୋଗଦେଇ ଭିନ୍ନ ଏକ ପରିଚୟ ସୃଷ୍ଟି କରି ପାରିଛନ୍ତି ।
