ବୃହତ୍ ମୁକ୍ତାକାଶ ରଙ୍ଗମଞ୍ଚ ବରଗଡ଼ ଧନୁଯାତ୍ରା ମହୋତ୍ସବ ଆସନ୍ତା ଡିସେମ୍ବର ୩୧ରୁ ଆରମ୍ଭ ହୋଇ ୨୦୨୦ ଜାନୁୟାରୀ ୧୦ ପର୍ଯ୍ୟନ୍ତ ଚାଲିବ। କଂସ ରାଜୁତିରେ ୧୧ଦିନ ଧରି କମ୍ପି ଉଠିବ ମଥୁରାନଗରୀ। ଏହି ମୁକ୍ତାକାଶ ରଙ୍ଗମଞ୍ଚର ମହାନାୟକ କଂସ ମହାରାଜ ଚରିତ୍ରରେ ଏଥର କିଏ ଅଭିନୟ କରିବ ତାକୁ ନେଇ ଗତ ୨ସପ୍ତାହ ଧରି ନାନା କଳ୍ପନାଜଳ୍ପନା ପ୍ରକାଶ ପାଇଥିଲା। ମାତ୍ର ଗୁରୁବାର ଧନୁଯାତ୍ରା ମହୋତ୍ସବ ସମିତିର ଗୁରୁତ୍ୱପୂର୍ଣ୍ଣ ବୈଠକରେ ଗତଥରର ଅଭିନେତା ଭୁବନେଶ୍ୱର ପ୍ରଧାନଙ୍କୁ ପୁଣିଥରେ କଂସ ଚରିତ୍ର ପାଇଁ ମନୋନୀତ କରାଯାଇଛି। ଏ ନେଇ ଭୁବନେଶ୍ୱରଙ୍କ ମତାମତକୁ ନେଇ ଏକ ସ୍ବତନ୍ତ୍ର ଉପସ୍ଥାପନା…।
ଆପଣ ପୁଣିଥରେ କଂସ ମହାରାଜ ଭୂମିକାରେ ଅଭିନୟ କରିବା ପାଇଁ ମନୋନୀତ ହୋଇଛନ୍ତି। ଏଥିରେ ଆପଣଙ୍କ ପ୍ରତିକ୍ରିୟା ?
୨୦୧୭ ମସିହା କଂସ ଚୟନ ପ୍ରକ୍ରିୟାରେ ୨୨ଜଣ କଳାକାରଙ୍କୁ ପଛରେ ପକାଇ ମନୋନୀତ ହୋଇଥିଲି। ସେତେବେଳେ ଧନୁଯାତ୍ରାରେ କଂସ ଅଭିନୟ ପାଇଁ ମୋର ଅବଧି ୩ ବର୍ଷ ବୋଲି ଧନୁଯାତ୍ର ମହୋତ୍ସବ ସମିତିର କର୍ମକର୍ତ୍ତା କହିଥିଲେ। ଏବେ ପୁଣି ଥରେ ମୋତେ କଂସ ଭୂମିକାରେ ଅଭିନୟର ସୁଯୋଗ ମିଳିଛି। ସେଥିପାଇଁ ମୁଁ ବହୁତ ଖୁସି। ମୁଁ ସମିତିର ସବୁ ନୀତି ନିୟମ ମାନି ରହିଛି।
ପ୍ରଥମରୁ ଏଥିଲାଗି ବିବାଦ ସୃଷ୍ଟି ହୋଇଥିଲା, ଏହାର କାରଣ କ’ଣ?
ମୁଁ ସେହି ବିବାଦର କାରଣ ଖୋଜି ପାଇନାହିଁ।
ଆପଣଙ୍କ ଅଭିନୟରେ କିଛି ତ୍ରୁଟି ଥିଲା କି, ଯାହାକୁ କଳାକାର ମନୋନୟନ କମିଟି ଗ୍ରହଣ କରିପାରି ନ ଥିଲେ?
ଜାଣିବାରେ ମୋର ଅଭିନୟରେ କିଛି ତ୍ରୁଟି ନ ଥିଲା। କାରଣ ମୋର ଅଭିନୟକୁ ଗୁରୁ, ଦର୍ଶକ, କବି, କଳାକାର, ସଂସ୍କୃତିପ୍ରେମୀ ଗ୍ରହଣ କରିଥିଲେ। ମୋତେ ପୁଣି ଅଭିନୟ ସୁଯୋଗ ଦେବା ପାଇଁ ଧନୁଯାତ୍ରା ମହୋତ୍ସବ ସମିତିକୁ ସେମାନେ କହିଥିଲେ।
କଂସ ଭୂମିକା ପାଇଁ କମିଟି ଖୋଜୁଥିବା ଦକ୍ଷ କଳାକାରଙ୍କ ଅଭାବ ଯୋଗୁ ଆପଣ ପୁଣିଥରେ ମନୋନୀତ ହୋଇଛନ୍ତି କି?
ମୋ କଳା ଉପରେ ମୋର ବିଶ୍ୱାସ ଅଛି। ଆଜକୁ ୪୦ବର୍ଷ ହେଲା କଳା ଜଗତରେ ପାଦ ଦେଇଛି। ଆଉ ମୋର ଅଭିନୟରେ ସମସ୍ତେ ଖୁସି ଥିବାବେଳେ କଂସ ଅଭିନୟର ଅବଧି ସରିନାହିଁ। ସେଥିପାଇଁ ମୁଁ ପୁଣି ଥରେ ମନୋନୀତ ହୋଇଛି।
ଏଥର ନିଜ ଅଭିନୟରେ କିଛି ପରିବର୍ତ୍ତନ ଆଣିବେ କି?
ତୁଳନାରେ ଏଥର ଅଭିନୟ ମୋ ପାଇଁ ଚ୍ୟାଲେଞ୍ଜ। ଆଶା ରଖିଛି, ୭୧ତମ ଧନୁଯାତ୍ରା ମୋ ଅଭିନୟ ପାଇଁ ସ୍ବର୍ଣ୍ଣାକ୍ଷରରେ ଲିପିବଦ୍ଧ ହୋଇ ରହିବ।
ଜଣେ କଳାକାର ମନୋନୟନ ପାଇଁ ବାଦବିବାଦ ସୃଷ୍ଟି ହେବା ସମ୍ପର୍କରେ କ’ଣ କହିବେ?
ବାଦ ବିବାଦରେ ଛନ୍ଦିବା ଆଦୌ ଠିକ୍ ନୁହେଁ। କଳାକାରଙ୍କୁ ଉତ୍ସାହ ଦେବା ନିହାତି ଜରୁରୀ। କାରଣ କଳାକାର କିଛି ଖୋଜି ନ ଥାଏ, ଦର୍ଶକଙ୍କ ଭଲ ପାଇବା ହିଁ କଳାକାରଙ୍କ ସମ୍ପତ୍ତି।
ଏଥିପାଇଁ ଶ୍ରେୟ କାହାକୁ ଦେବେ?
ସମଲେଶ୍ୱରୀ। ଜିଲାପାଳ, ଶାସନ, ପ୍ରଶାସନ, ଧନୁଯାତ୍ରା କମିଟି, ବରଗଡ଼ ଜିଲାର ଆବାଳ ବୃଦ୍ଧ ବନିତା, ପଶ୍ଚିମଓଡ଼ିଶା ଧନୁଯାତ୍ରା କଳାକାର ସଂଘ, ମିଳିତ କଳାକାର ମଞ୍ଚ, କବି, କଳାକାର, ସାହିତ୍ୟ, ସଂସ୍କୃତିପ୍ରେମୀ ଏବଂ ବୁଦ୍ଧିଜୀବୀଙ୍କ ଆଶୀର୍ବାଦରୁ ପୁଣିଥରେ ବିଶ୍ୱପ୍ରସିଦ୍ଧ ବରଗଡ଼ ଧନୁଯାତ୍ରାରେ ମୁଁ କଂସ ଭୂମିକାରେ ଅବତୀର୍ଣ୍ଣ ହେବି। ସମସ୍ତଙ୍କୁ ଏଥିପାଇଁ ଶ୍ରେୟ ଦେବି।
