ଭବାନୀପାଟଣା,୧୧।୮(ଡି.ଏନ୍.ଏ.): କର୍ନାଟକକୁ ଦାଦନ ଖଟିବାକୁ ଯାଇଥିବା କଳାହାଣ୍ଡି ଜିଲା ମହୁଲପାଟଣା ଗ୍ରାମର ଶଙ୍କର ସାହୁ (୩୫) ଓ ତାଙ୍କ ସ୍ତ୍ରୀ ରଶ୍ମିତା ସାହୁ (୩୦)ଙ୍କ ସେଠାରେ ମୃତ୍ୟୁ ଘଟିଛି। ଏହି ଘଟଣାକୁ ନେଇ ପରିବାର ଲୋକେ ହତ୍ୟା ଅଭିଯୋଗ ଆଣିଛନ୍ତି। ଅଭିଯୋଗ ଅନୁଯାୟୀ, ଥୁ. ରାମପୁର ବ୍ଲକ ମହୁଲପାଟଣା ଗାଁର ଶଙ୍କର ଓ ରଶ୍ମିତା ୭ ବର୍ଷ ତଳେ କର୍ନାଟକକୁ ଦାଦନ ଖଟିବାକୁ ଯାଇଥିଲେ । ସେଠାକାର ନାଗାମାନଗାଲା ତାଲୁକର ଭେଙ୍କଟେଶ୍ୱର ହେଚେରୀ ପ୍ରାଇଭେଟ ଲିମିଟେଡରେ ଉଭୟେ ଶ୍ରମିକ ଭାବେ କାର୍ଯ୍ୟ କାରୁଥିବାବେଳେ ବର୍ଷକର ଝିଅ ବନ୍ଦନାକୁ ଗାଁରେ ଛାଡ଼ି ଯାଇଥିଲେ । ଗତ ଅଗଷ୍ଟ ୩ ତାରିଖ ଦିନ ସେଠାରେ ରଶ୍ମିତାଙ୍କ ମୃତ୍ୟୁ ଘଟିଥିଲା ତେବେ ତାଙ୍କ ମୃତ୍ୟୁର କାରଣ ଜଣା ପଡ଼ି ନ ଥିବା ବେଳେ ଶୁକ୍ରବାର ଶଙ୍କରଙ୍କ ମଧ୍ୟ ସେଭଳି ମୃତ୍ୟୁ ଘଟିଥିଲା । ତେବେ ଏହି ଦୁଇଜଣଙ୍କୁ ବିଷ ଦେଇ ହତ୍ୟା କରାଯାଇଛି ବୋଲି ପରିବାର ଲୋକେ ଅଭିଯୋଗ କରିଛନ୍ତି । ବର୍ତ୍ତମାନ ପୋଲିସ ଏକ ମାମଲା ରୁଜୁ କରି ତଦନ୍ତ କରୁଛି । ଶଙ୍କରଙ୍କ ମୃତଦେହ ବ୍ୟବଚ୍ଛେଦ ପରେ ପୋଲିସ ଗାଁକୁ ପଠାଇଛି । ଏହି ଘଟଣାର ନିରପେକ୍ଷ ତଦନ୍ତ କରି କାର୍ଯ୍ୟାନୁଷ୍ଠାନ ନେବାକୁ ଗ୍ରାମବାସୀ ଦାବି କରିଛନ୍ତି ।
