ନୂଆଦିଲ୍ଲୀ, ୨୩।୬-କରୋନା ଭାଇରସ ସଂକ୍ରମଣ ଏବେ ସମଗ୍ର ବିଶ୍ୱରେ ଚିନ୍ତାର କାରଣ ହୋଇଛି। ଔଷଧ ବାହାରି ନ ଥିବାରୁ କରୋନା ବିପକ୍ଷ ଲଢ଼େଇରେ ବିଜୟ ହାସଲ ପାଇଁ କ୍ରୀଡ଼ା ସହାୟତା କରିପାରେ ବୋଲି ଅଲିମ୍ପିକ୍ ଓ ବିଶ୍ୱ ଚାମ୍ପିୟନଶିପ୍ ରୌପ୍ୟ ପଦକ ବିଜୟିନୀ ପି.ଭି. ସିନ୍ଧୁ ପ୍ରକାଶ କରିଛନ୍ତି। ସମସ୍ତେ ନିଜ ଜୀବନ ଶୈଳୀରେ କିଛିନା କିଛି ଶାରୀରିକ କାର୍ଯ୍ୟକଳାପ ସାମଲ କରିବା ଆବଶ୍ୟକ ବୋଲି ସିନ୍ଧୁ କହିଛନ୍ତି। କରୋନା ଭାଇରସ ସଂକ୍ରମଣରେ ବିଶ୍ୱରେ ୮.୫ ମିଲିଅନ ଲୋକ ସଂକ୍ରମିତ ହୋଇଥିବାବେଳେ ୪୫୦,୦୦୦ ଲୋକଙ୍କର ପ୍ରାଣ ଗଲାଣି।
”କରୋନା ଭାଇରସ ପାଇଁ ଔଷଧ କିମ୍ବା ନିର୍ଦ୍ଧିଷ୍ଟ ଚିକିତ୍ସା ବାହାରି ନ ଥିବାରୁ ଶରୀରରେ ରୋଗ ପ୍ରତିରୋଧକ ଶକ୍ତି ବଢ଼ାଇବା ଜରୁରୀ ହୋଇ ପଡ଼ିଛି। ତେଣୁ ଏ କ୍ଷେତ୍ରରେ କ୍ରୀଡ଼ା କିମ୍ବା ଅନ୍ୟ ଶାରୀରିକ କାର୍ଯ୍ୟକଳାପ ନିହାତି ଗୁରୁତ୍ୱପୂର୍ଣ୍ଣ। ଏହି ଯୁଦ୍ଧରେ ବିଜୟ ପାଇଁ କ୍ରୀଡ଼ା ସହାୟତା କରିପାରେ“ ବୋଲି ସୋମବାର ଏଫଆଇସିସିଆଇ ପକ୍ଷରୁ ଆୟୋଜିତ ହେଲ୍ଥକେୟାର ଓ ହାଇଜିନ୍ ଏକ୍ସପୋ ୨୦୨୦ ଉଦ୍ଘାଟନ ଅବସରରେ ସିନ୍ଧୁ ପ୍ରକାଶ କରିଛନ୍ତି। ଭାରତରେ ଏହି ଜୀବାଣୁରେ ୪.୨୫ ଲକ୍ଷରୁ ଉର୍ଦ୍ଧ୍ୱ ଲୋକ ସଂକ୍ରମିତ ହୋଇଥିବାବେଳେ ୧୩,୭୦୦ ଲୋକଙ୍କର ମୃତ୍ୟୁ ଘଟିଲାଣି। ବିଶ୍ୱ ସ୍ବାସ୍ଥ୍ୟ ସଙ୍ଗଠନର ସୁପାରିସକୁ ମାନିବା ଏବଂ ଶାରୀରିକ କାର୍ଯ୍ୟକଳାପ ପାଇଁ କିଛି ସମୟ ଦେବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ସିନ୍ଧୁ ପ୍ରକାଶ କରିଛନ୍ତି। ହୃଦରୋଗ, ଡାଇବେଟିସ, ଉଚ୍ଚ ରକ୍ତଚାପ, କ୍ୟାନସର ଏବଂ ମାନସିକ ବିଷାଦ ରୋଗରେ ପୀଡ଼ିତ ବ୍ୟକ୍ତି ପ୍ରତି ସପ୍ତାହରେ ଅତିକମ୍ରେ ୩୦୦ ମିନିଟ ଆରୋବିକ୍ କାର୍ଯ୍ୟକଳାପ କରିବା ଆବଶ୍ୟକ ବୋଲି ବିଶ୍ୱ ସ୍ବାସ୍ଥ୍ୟ ସଙ୍ଗଠନ ପକ୍ଷରୁ ପରାମର୍ଶ ଦିଆଯାଇଛି।
