ନୂଆଦିଲ୍ଲୀ,୨।୫: କରୋନା ସଂକ୍ରମଣ ନେଇ ଭାରତରେ ସଙ୍କଟ ଜନକ ସ୍ଥିତି ସୃଷ୍ଟି ହୋଇଛି। ଏପରିସ୍ଥଳେ କରୋନା ସହିତ ଲଢ଼େଇ ପାଇଁ ଥାଇଲାଣ୍ଡ ସହିତ ଭାରତ ହାତ ମିଳାଇଛି। ଶନିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଥାଇଲାଣ୍ଡର ତାଙ୍କ ପ୍ରତିପକ୍ଷ ପ୍ରାୟୁତ ଚାନ୍-ଓ-ଚାଙ୍କ ସହିତ କରୋନା ମହାମାରୀର ମୁକାବିଲା ଲାଗି ଆଲୋଚନା କରିଛନ୍ତି। ମିଳିତଭାବେ ଲଢ଼େଇ କଲେ କରୋନାର ମୁକାବିଲା ସହଜ ହେବ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି। ଇତିମଧ୍ୟରେ ଦେଶରେ କରୋନା ସଂକ୍ରମଣ ରୋକିବା ପାଇଁ ଲକ୍ଡାଉନ୍ ସମୟସୀମାକୁ ମେ ୧୭ ପର୍ଯ୍ୟନ୍ତ ବୃଦ୍ଧି କରାଯାଇଛି। ଗତ ୨୪ ଘଣ୍ଟାମଧ୍ୟରେ ଦେଶରେ ୨୨୯୩ ଜଣ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି। ସେହିପରି ଦେଶରେ ସଂକ୍ରମିତଙ୍କ ସଂଖ୍ୟା ୩୭୩୩୬ ଥିବାବେଳେ ମୃତ୍ୟୁ ସଂଖ୍ୟା ୧୨୧୮ରେ ପହଞ୍ଚିଛି। ଅପରପକ୍ଷରେ ଥାଇଲାଣ୍ଡରେ ସଂକ୍ରମିତଙ୍କ ସଂଖ୍ୟା ୨୯୬୬ ଥିବାବେଳେ ମୃତକଙ୍କ ସଂଖ୍ୟା ୫୪ ରହିଛି। ଥାଇଲାଣ୍ଡରେ କରୋନା ମୁକାବିଲା ଲାଗି ଗ୍ରହଣ କରାଯାଇଥିବା ପଦକ୍ଷେପକୁ ଭାରତରେ ପ୍ରୟୋଗ କରାଯିବାର ଯୋଜନା ରହିଥିବା କୁହାଯାଉଛି।
