ଭୁବନେଶ୍ୱର, ୧୧ା୪(ବ୍ୟୁରୋ): କରୋନା ମୁକାବିଲା କରିବା ଲାଗି କେନ୍ଦ୍ର ସରକାର ଓଡ଼ିଶାକୁ ୪୬.୩୫କୋଟି ଟଙ୍କାର ଆର୍ଥିକ ସହାୟତା ରାଶି ପ୍ରଦାନ କରିଛନ୍ତି। ହେଲେ ଏହା ଯଥେଷ୍ଟ ନୁହେଁ, ଅଧିକ ଅନୁଦାନ ଦେବା ଲାଗି ସ୍ବାସ୍ଥ୍ୟମନ୍ତ୍ରୀ ନବକିଶୋର ଦାସ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ହର୍ଷବର୍ଦ୍ଧନଙ୍କ ନିକଟରେ ଦାବି କରିଛନ୍ତି। କରୋନା ସଂକ୍ରମଣ ରୋକିବା ଲାଗି ଗ୍ରହଣ କରାଯାଇଥିବା ପଦକ୍ଷେପ ସମ୍ପର୍କରେ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟକୁ ଜଣାଇଛନ୍ତି। ଶୁକ୍ରବାର ହର୍ଷବର୍ଦ୍ଧନ ସବୁ ରାଜ୍ୟର ସ୍ବାସ୍ଥ୍ୟମନ୍ତ୍ରୀମାନଙ୍କ ସହ ଭିଡିଓ କନଫରେନ୍ସିଂ ଜରିଆରେ ଆଲୋଚନା କରିଥିବା ବେଳେ ଏହି ଅବସରରେ ରାଜ୍ୟ ପକ୍ଷରୁ ଅଧିକ ଅନୁଦାନ ଲାଗି ଦାବି କରାଯାଇଛି।
ଏହି ଅବସରରେ ମନ୍ତ୍ରୀ ଦାସ କହିଛନ୍ତି ଯେ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆସନ୍ତା ୩୦ ତାରିଖ ପର୍ଯ୍ୟନ୍ତ ସାରା ଦେଶରେ ଲକ୍ଡାଉନ ଅବଧି ବୃଦ୍ଧି କରିବା ଲାଗି କେନ୍ଦ୍ର ସରକାରଙ୍କୁ ଅନୁରୋଧ କରିଛନ୍ତି। ତେଣୁ ଏହାକୁ ଲାଗୁ କରାଯାଉ। ହାଇଡ୍ରୋ କ୍ଲୋରୋକୁଇନ ଟାବଲେଟ, ଏନ୍-୯୫ ମାସ୍କ, ଭିଟାମିନ ସି ତୁରନ୍ତ ରାଜ୍ୟକୁ ପଠାଯାଉ। କରୋନା ଆକ୍ରାନ୍ତ ରୋଗୀଙ୍କ ଚିକିତ୍ସା ପାଇଁ ୫ଲକ୍ଷ ପିପିଇ ଯୋଗାଇ ଦିଆଯାଉ। କରୋନା ଆକ୍ରାନ୍ତଙ୍କ ରକ୍ତ ପରୀକ୍ଷା ପାଇଁ ଏହା ଅତ୍ୟନ୍ତ ଜରୁରୀ ଆର୍ଟିପିସିଆର୍ କିଟ୍ ଆବଶ୍ୟକ ମୁତାବକ ରାଜ୍ୟ ପାଖରେ ନାହିଁ, ତାହା ମଧ୍ୟ ଆବଶ୍ୟକ। ବର୍ତ୍ତମାନ ଓଡ଼ିଶାରେ ୩୦୦ ଆର୍ଏନ୍ଏସ୍ ରହିଛି ଆହୁରି ୫ ହଜାର ଆବଶ୍ୟକ। ଏସବୁ ଜିନିଷ ଯୋଗାଣକୁ ସୁନିଶ୍ଚିତ କରାଯାଉ। ଅନୁସୂଚିତ ଜାତି ଓ ଜନଜାତି ବହୁଳ ଅଞ୍ଚଳଗୁଡିକରେ ଆଗୁଆ ପଦକ୍ଷେପ ନେବାକୁ ସ୍ବତନ୍ତ୍ର ଗାଇଡ୍ଲାଇନ ପ୍ରସ୍ତୁତ କରିବାକୁ ମନ୍ତ୍ରୀ ଦାଶ ଅନୁରୋଧ କରିଛନ୍ତି। ରାଜ୍ୟରେ ଅନେକ ସମୟରେ ବିପର୍ଯ୍ୟୟ ଲାଗି ରହୁଥିବାରୁ ସ୍ବତନ୍ତ୍ର କୋଭିଡ୍ ପାଣ୍ଠି ଆର୍ଥିକ ସହାୟତା ଦିଆଯାଉ। ସେହିପରି ଭିମ୍ସାର ବୁର୍ଲା, ବ୍ରହ୍ମପୁର ଏମ୍କେସିଜି, ବଲାଙ୍ଗୀର ଏବଂ ଅନ୍ୟାନ୍ୟ ହସ୍ପିଟାଲରେ କରୋନା ରକ୍ତ ପରୀକ୍ଷା ଲାଗି ନିର୍ଦ୍ଦେଶ ଦିଆଯାଉ। ଏଥିସହ ବାଲେଶ୍ୱର ଏମ୍ସ ସାଟେଲାଇଟ ହସ୍ପିଟାଲକୁ କରୋନା ହସ୍ପିଟାଲ କରିବାକୁ ନିଷ୍ପତ୍ତି ନିଅନ୍ତୁ ବୋଲି କେନ୍ଦ୍ର ସ୍ବାସ୍ଥ୍ୟମନ୍ତ୍ରୀଙ୍କୁ ସେ ଅନୁରୋଧ କରିଛନ୍ତି।
